හිටි හැටියේම ශ්රී ලංකාව සමග තුර්කිය සිදුකරන ගුවන් ගමන් තාවකාලිකව අත්හිටුවීම හේතුවෙන් දින ගණනක් තිස්සේ තුර්කියේ ස්ථාන්බූල් ගුවන්තොටුපලෙහි අසරණ වී සිටින ශ්රී ලාංකික වෛද්ය සිසුන් පිරිසක් සම්බන්ධව ලංකාසරට වාර්තා වේ.
පසුගිය 03 වැනිදා රත්රියේ දී තුර්කි ගුවන් සේවයට අයත් භාණ්ඩ ප්රවාහන ගුවන් යානයක් වන ඒ.- 330 – 300 එයා බස් වර්ගයේ භාණ්ඩ ප්රවාහන ගුවන් යානයක් වන .ටී.කේ.- 6050 ගුවන් යානය ශ්රී ලන්කන් ගුවන් සේවා ගුවන් අංගන මෙහෙයුම් සේවකයින්ගේ අකාර්යක්ෂම වගකීම් විරහිත ක්රියාකලාපය (Bad Ground Handling ) නිසා අනතුරට ලක් වීමත්, ශ්රී ලංකාවේ කටුනායක ගුවන් තොටුපළෙන් තම ගුවන් යානා සඳහා තවදුරටත් ඉන්ධන ලබා ගැනීමට නොහැකි වීමත් නිසා සිය ගුවන් මෙහෙයුම් පසුගිය 04 වැනිදා සිට තාවකාලිකව අත්හිටුවීමට තුර්කි ගුවන් සේවය කටයුතු කළේය.
පෙර දැනුම්දීමකින් තොරව සිදුකළ මෙම ගුවන් මෙහෙයුම් අත්හිටුවීම හේතුවෙන් තුර්කිය හරහා කොළඹට පැමිණීමට සැලසුම් කර ගුවන් ටිකට් පත් වෙන් කරගත් බෙලරූස්හි අධ්යාපනය ලබමින් සිටින සිසුන් 69 දෙනෙක් මේ වනවට තුර්කියේ ස්ථාන්බුල් ගුවන්තොටුපලේ අතරමං වී සිටිති.
මින් සිසුන් 19 දෙනෙක් දින 03ක් තිස්සේ ඇඳිවත පිටින් ගුවන් තොටුපලේ ගත කරමින් සිටින බව වාර්තා වේ. මුලින්ම පැමිණි මෙම සිසුන් 19 දෙනා බෙලරූස්වල සිට ස්ථාන්බූල් ගුවන් තොටුපලට පැමිණ ඇත්තේ පසුගිය 04 වැනිදාය. ඒ ඊයේ අලුයම 03ට මාලේ හරහා කොළඹ බලා පැමිණෙන ටී.කේ.730 ගුවන් යානයෙන් ලංකාවට පැමිණීමට ය. එහෙත් ගුවන් ටිකට් පත් ලබාදීමෙන් අනතුරුව ගුවන් ගත වීමට විනාඩි 15ක් තිබිය දී ගුවන් යානය කොළඹට පැමිණීම අවලංගු කර තිබේ.
ඔවුන්ගේ සියලුම බඩු ගුවන් යානයේය. මේ වනවිට එම සිසු පිරිසට හෝටල් හෝ නවාතැන් පහසුකම් සලසා දී නැති බවත්, ආහාර සැපයීම පමණක් සිදුකරන බවත් එම සිසු කණ්ඩායමේ තරුණ වෛද්ය සිසුවෙක් ලංකාසරට පැවසුවේය.
ගුවන්තොටුපල බලධාරින් විසඳුමක් ලබා දෙන බව කියා ඇති නමුත් 03 වැනිදා බෙලරූස්වලින් පිටත් වූ තම කණ්ඩායම ඇඳිවත පිටින් දැනට දින 04ක් මහ මග බව ඔවුහු කියති.
මේ වනවිට ඔවුන් සමග තවත් සිසුන් 50ක් එක් වී සිටින බවත්, නිවාඩුවට ශ්රී ලංකාවට පැමිණෙන සිසුන් 69ක් විසඳුමක් අපේක්ෂාවෙන් ස්ථාන්බූල් ගුවන්තොටුපලේ ගත කරන බවත් එම සිසුහු පවසති.
ඔවුන්ට ගුවන් යානයක් ඇත්තේ 09 වැනිදා බවත්, මාලේ හරහා කොළඹට එමිරේට් සේවයේ ගුවන් යානයකින් පිටත් කර හරින බවත් සිසුන්ට දැනුම් දී ඇත. කණ්ඩායමේ වැඩිමනත් පිරිස ගැහැණු ළමයින් බවත්, ඒ වනතුරු ඇඳිවත පිටින් ගුවන්තොටුපලේ ඇතුළුවීමේ පර්යන්තයේ ගත කිරීමට සිදුවීම ඉතාම කටුක අත්දැකීමක් බව මේ පිලිබඳ අදහස් දක්වමින් එක් සිසුවෙක් ලංකාසරට පැවසුවේය.
