ශ්‍රීදේවී ඒරියපොල –
ඇය නිසැකවම දෙව් ලොව වැඩ හිඳිනා බව අපි විශ්වාස කරමු. ඔබට මතක ඇතැයි සිතමි. උසස් පෙළ ප්‍රතිඵල අපේක්ෂාවෙන් සිට මීට සත් මසකට පෙර ජිවිතයෙන් සමුගෙන තවත් ජීවිත ගණනාවකට ජීවිතය දුන් අඹන්පොල පදිංචි ව සිටි විහඟනා ආරියසිංහ දියණිය ඔබට අමතක වන්නට විදිහක් නැතැයි උදක්ම විශ්වාස කරමි.
විරල පිළිකා රෝගයට ගොදුරු වී මොළය මියගිය ඇයගේ වකුගඩු යුගලය, අක්මාව, අක්ෂි කුනීත, හදවත සහ දන්දීමෙන් තවත් ජීවිත හතක හුස්ම අදටත් වැටෙන්නේය.
ඇය තම මරණයට පෙර මුහුණ දුන් අපොස උසස් පෙළ විභාගය ප්‍රතිඵල මීට පැය කිහිපයකට පෙර නිකුත් විය.
වාණිජ විෂය ධාරාව ඉංග්‍රීසි මාධ්‍යයෙන් හැදෑරූ විහඟනා දුව සියලුම විෂයයන් සඳහා A සාමාර්ථ සහිතව සමත්ය.
දෛවය මෙතරම් අකාරුණික ඇයි දැයි කෑගසා අසන්නට සිතෙන්නේ මෙවැනි පුවත් කන වැකෙන විටය.
ගජනැග්ගම මහා විද්‍යාලයෙන් ඉතා විශිෂ්ට ලෙස සාමාන්‍ය පෙළ විභාගය සමත් වූ ඇය වානිජ විෂය ඉංග්‍රීසි මාධ්‍යයෙන් හැදෑරීම සඳහා කුරුණෑගල මලියදේව බාලිකා විද්‍යාලය ට ඇතුළත් වූවාය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
ජීවිතය කුමක්දැයි ඇය වටහා දි ඇතිවා සේය. ඒ ජයග්‍රහණයේ ශ්‍රැති මාත්‍රය ඇසූවන් දෙනෙත් තෙමනු දකිමි. දුවේ… උඹට අමා මහ නිර්වාණයේ දොරටු විවර වනු ඇති බව පමණක් ලියා තබමි.
