කැලණි ගඟේ ජල මට්ටම මේ වන විට පහළ යමින් පවතින බවත්, ඒ අනුව කැලණි ගං ද්රෝණියේ පහත්බිම් ප්රදේශවලට බලපා තිබු ගංවතුර තත්ත්වයන් ද පහව යමින් පවතින බවත් වාරිමාර්ග දෙපාර්තමේන්තුව පවසයි.
එම දෙපාර්තමේන්තුව පවසන්නේ ඊට අමතරව කළුගඟ, මල්වතු ඔය ඇතුළු ජලාශවල ද ජලමට්ටම් පහළ යමින් පවතින බවය.
කෙසේ වෙතත් කැලණි ගඟේ නාගලගම්වීදිය ජලමාපකයේ ජල මට්ටම අද අලුයම 02.00ක වනවිට අඩි 08ක් තිබු අතර අලුයම 03.00 වන විට අඩි 7.90 ක් දක්වා අඩු වී තවදුරටත් මහ ගංවතුර මට්ටමක් වාර්තා කරමින් තිබිණි.
එමෙන්ම හංවැල්ල ජලමාපකයේ ජල මට්ටම අද අලුයම 02.00ක වනවිට අඩි 08ක් තිබු අතර අලුයම 03.00 වන විට අඩි 7.93 ක් දක්වා අඩු වී තිබුණ ද තවදුරටත් ඇත්තේ අවදානමයේය.
කළුගඟේ ඇල්ගම ජලමාපකයේ ජල මට්ටම අද අලුයම 02.00ක වනවිට අඩි 10.40 ක් තිබු අතර අලුයම 03.00 වන විට අඩි 10.30 ක් දක්වා අඩු වී ඇත. නමුත් අවදානම පහව නැත.
එමෙන්ම මල්වතු ඔයේ තන්තිරිමලේ ජලමාපකයේ ජල මට්ටම අද අලුයම 02.00ක වනවිට අඩි 8.98ක් තිබු අතර අලුයම 03.00 වන විට අඩි 8.95 ක් දක්වා අඩු වී තිබෙන අතර තවදුරටත් මහ ගංවතුර තත්ත්වයක් පවතින බව දැනුම්දී ඇත.
