සංගමන්කන්ද මුහුදු තීරයට නාවික සැතපුම් 38 දුරින් යාත්රා කරමින් සිටියදී ගින්නට හසුවූ නෞකාව මේ වනවිටත් ගිනි ගනිමින් පැවතුණද මේ වන තෙක් එහි සැලකිය යුතු තරමේ තෙල් කාන්දුවක් සිදුව නොමැති අතර යම් හෙයකින් තෙල් කාන්දුවුවහොත් එය වසර සියයකින්වත් යළි සැකසිය නොහැකි තරමේ බරපතල හානියක් සමුද්ර පරිසරයට සිදුවිය හැකි බවට සමුද්ර පරිසර විශේෂඥයෝ අනතුරු අඟවති.
ඔවුන් පවසන්නේ මෑතකදී තෙල් නැව් අනතුරක් නිසා සිදුවූ ලොකුම හානිය සිදුවූයේ මීට මාසයකට පමණ පෙර මුරුසි දිවයින ආසන්නයේ බවත් මෙම නෞකාව ඊට වඩා විශාල වන බැවින් මෙයින් සිදුවිය හැකි හානිය ඊට වඩා බොහා් සෙයින් විශාල විය හැකි බවත්ඔවුහු පෙන්වා දෙති.
මෙම තත්ත්වය සැලකිල්ලට ගෙන මේ වනවිට ගින්න නිවීම සඳහා නෞකා 09ක් ඉතා වෙහෙසර උත්සාහයක නියැළෙන අතර අද රාත්රිෙය්දී මෙම මෙහෙයුමට තවත් නෞකාවක් එක්වනු ඇති බවත් නැවේ තෙල් කාන්දුවක් යම් හෙයකනින් ඇතිවුවහොත්එයින් අපේ සමුද්ර පරිසරයට සිදුවිය හැකි හානිය අවම කිරීම සඳහා එය හැකිතාක් දුරට ශ්රි ලංකා වෙරළින් ඈතට රැගෙන යාමට සියලු උත්සාහයන් දරන බව ත්රිකුණාමල වරායේ නියෝජ්ය නාවික නෞකාධිපති කපිතාන් ශ්රියන්ත අරම්පත් මහතා අප කළ විමසීමකදී සඳහන් කළේය.
ක්වේට් රාජ්යයේ සිට ඉන්දියාවේ පරදීප් වරායට යාත්රා කරමින් තිබිය දී බොයිලේරුවක් පිපිරීම නිසා ගිනිගත් ඩයමන්ඩ් බොරතෙල් ප්රවාහන නෞකාව මේ වනවිටත් ගින්න පාලනය කිරීම සඳහා ශ්රී ලංකා ගුවන් හමුදාවේ එම්.අයි 17 සහ බෙල් 217 හෙලිකොප්ටර් යානා දෙකක් උපයෝගී කර ගනිමින් ගුවනින් ජලය දමා මෙම නැවේ ගින්න පැතිරීම වළක්වන්නට කටයූතු යොදා ඇත.
අද උදෑසන වනවිට ත්රිකුණාමල නාවික හමුදා කඳවුරේ සයුර සහ රණවිසි නෞකා දෙකද හම්බන්තොට නාවික හමුදා කඳවුරෙන් පිටත් වූ ඩොරා යාත්රාවක් සහ කල්මුණේ සහ පානම නාවික හමුදා කඳවුරින් පිටත්වූ යාත්රා යොදාගනිමින් නාවික හමුදාව ගින්න නිවීමේ මෙහෙයුමේ නිරතව සිටී.
මීට අමතරව නාවික හමුදාවට සහාය ලබා දීම සඳහා ඉන්දියාවේ වෙරළාරක්ෂක නැව් දෙකක් සහ නිරික්ෂණ නෞකාවක් මෙම ස්ථානයට පැමිණ ගින්න නිවීමට සහය වෙමින් සිටිති.
මේ වන විට නැවේ බොරතෙල් ගබඩා තිබෙන කොටසට ගින්න පැතිරී නොමැත. ජලය ඉසිම නිසා ගිනි පැතිරීමේ වේගය තරමක් දුරට අඩාලව ඇතැයි වාර්තා වේ.
මෙම ගිනි ගත් නැවේ තිබෙන බොර තෙල් පටවා ගැනීම සඳහා පිලිපීනයේ සිට නෞකාවක් පිටත් ව තිබේ.
මෙම නැව ගිනිගන්නා අවස්ථාවේ දී එහි සිටි විසි තුන් දෙනෙකුගෙන් සමන්විත
කාර්යමණ්ඩලයෙන් විසි දෙදෙනෙකු බේරා ගන්නට නාවික හමුදාවට හැකි විය. තුවාල ලැබූ එක් පිලිපීන ජාතික නාවිකයෙක් ඊයේ (03) කල්මුනේ රෝහලට ඇතුළත් කිරීමට නාවික හමුදාව කටයුතු කළේය.
