ලලිත් චාමින්ද
විපක්ෂය විසින් බහුතර මන්ත්රිධුර සංඛ්යාවක් හිමිකරගෙන සිටින කොළඹ මහනගර සභාව සදහා නගරාධිපතිවරයකු හා නියෝජ්ය නගරාධිපතිවරයකු තෝරාපත් කරගැනිමේ කාර්යය සදහාවන පළමු රැස්විම මෙම මස 16 වැනි සදුදා දින පෙරවරු 9.30ට කොළඹ මහනගර සභාවේ සභා රැස්විම් ශාලාවේ දි පැවැත්වේ.
බස්නාහිර පළාත් පාලන කොමසාරිස් සාරංගිකා කල්හාරි ජයසුන්දර විසින් අතිවිශේෂ ගැසට් පත්රයක් මගින් මේ බව ප්රකාශයට පත්කොට ඇත.2012 අංක 22 දරණ පළාත් පාලන ආයතන ඡන්දවිමසිම ( සංශෝධන) පනතින් සංශෝධිත පළාත් පාලන ආයතන ඡන්දවිමසිම් ආඥාපනතේ 66 ඇ වගන්තිය යටතේ ඇති බලතල ප්රකාරව නගරාධිපතිවරයකු හා නියෝජ්ය නගරාධිපතිවරයකු පත්කරගැනිම සදහා මෙම රැස්වීම කැදවා ඇත.
මේ වනවිටත් කොළඹ මහනගර සභාවේ නගරාධිපතිවරයා තෝරාගැනිම සම්බන්දයෙන් ජාතික ජනබලවේගය සහ සමගිජනබලවේගය ඇතුළු විපක්ෂයේ පක්ෂ අතර උණුසුම් තත්ත්වයක් නිර්මාණය වී ඇත. ජාතික ජනබලවේගය විසින් කොළඹ මහනගර සභාවේ පාලන බලය ලබා ගන්නා බවට ප්රකාශකොට ඇත. ස්වකීය නගරාධිපති අපේක්ෂිකාව ව්රායි කැලී බල්තසාර් බව ඔවුන් නිවේදනය කර තිබේ.
සමගිජන බලවේගය ද සඳහන් කොට ඇත්තේ කොළඹ මහනගර සභාවේ බලය තමන් හිමිකරගන්නා බවත් විපක්ෂයේ සියලු පක්ෂවල සහයෝගයෙන් සමගිජන බලවේගයේ නගරාධිපතිවරයකු තෝරාපත්කරගන්නා බවත්ය. එහෙත් සමගි ජන බලවේගය මේ ලියන මොහොතවනතුරුත් සිය නගරාධිපති අපේක්ෂකයා ප්රකාශ කර නැත. සජබ විධායක සභික මුජිබර් රහුමාන් ඊයේ ප්රකාශ කළේ අද දිනයේ දී සිය අපේක්ෂකයා ප්රකාශයට පත් කරන බවය.
එක්සත් ජාතික පක්ෂය දැනටමත් සමගි ජන බලවේගය හා එක්ව කොළඹ නගරසභාවේ බලය පිහිටුවීමේ එකඟතාවයකට පැමිණ ඇත. ප්රතිපත්තිමය වශයෙන් එක්සත් ජාතික පක්ෂයට හෝ සමගි ජන බලවේගයට සහාය ලබා දීම කළ නොහැකි බව මුලින් ප්රකාශ කළ පොදුජන එක්සත් පෙරමුණ සිය ස්ථාවරය වෙනස් කරමින් දූෂිත මාලිමා රජයට එරෙහිව විපක්ෂ බලය පිහිටුවීමට විපක්ෂ අපේක්ෂයාට ඡන්දය දෙන බව කීවේය. පොහොට්ටුවේ මහ ලේකම් නීතිඥ සාගර කාරියවසම් කීවේ තම අපේක්ෂකයින් ඡන්දය දෙන්නේ එක්සත් ජාතික පක්ෂයට හෝ සමගි ජන බලවේගයට ලෙස හඳුනාගත් දේශපාලන පක්ෂයකට නොව විපක්ෂ අභිලාෂය වෙනුවෙන් බවය.
මේ අතර මන්ත්රී ආසන 2ක් සහිත සර්වජන බලය ස්වාධීනව සිටින බවත් ඡන්දයේ දී සුදුසු අපේක්ෂකයා තෝරාගෙන සිය ඡන්දය ප්රකාශ කරන බවත් කීවේය. එක්සත් ජනරජ පෙරමුණ ලෙස එක් මන්ත්රී ධූරයක් සහිත චම්පික රණවකගේ නායකත්වය දරණ දේශපාලන පක්ෂය කීවේ තමන්ද ස්වාධීන තීරණයක් ගන්නා බවය.
පළාත් පාලන ආයතන අතරින් වඩාත් වැදගත් සථානයක් හිමි කර ගන්නා කොළඹ මහ නගර සභාවේ මුළු මන්ත්රී ධූර සංඛ්යාව 117ක් වන අතර, ඉන් මන්ත්රී ධූර 48ක් ජාතික ජන බලවේගය විසින් දිනා ගෙන තිබේ. කෙසේ වෙතත්, මුළු මන්ත්රී ධූර සංඛ්යාවෙන් 50% කට වැඩි ප්රමාණයක් එක් පක්ෂයකට ලබා ගැනීමට නොහැකි වීම නිසා නගරාධිපති ධූරය සඳහා තරඟයක් ඇති වී තිබේ. ජාතික ජන බලවේගය පවසන්නේ ස්වාධීන කණ්ඩායම්ව මන්ත්රී ධූර 09 තමන් සතු බවය. මේ සභික ධූර අතර පොලිසිය විසින්ම කුඩු ලාල් ලෙස හඳුන්වන ලාල් පීරිස්ගේ නිවුන් දරුවන් නියෝජනය කරන අංක 03 ස්වාධීන කණ්ඩායමේ මන්ත්රී ධූර 03ක් ද වේ. මේ මන්ත්රී ධූර කොළඹ නගර සභාව පිහිටුවීමට ජාතික ජන බලවේගයට එක් වන්නේ නම් එය නගරාධිපති ධූරයට සමාන බරකින් ගෙන මැනිය යුතු කාරණයක් බවට අදහසක් තිබේ.
ආණ්ඩුව සහ ආණ්ඩුවේ ප්රතිපත්තිවලට හිතවත් බලවේග පෙන්වා දී ඇත්තේ කොළඹ නගරසභාවේ බලය පිහිටුවීමේ සදාචාරාත්මක අයිතිය ඇත්තේ කණ්ඩායමක් ලෙස බහුතර සභික ධූර ප්රමාණයක් දිනාගත් ජාතික ජන බලවේගයට බවය. මේ අවස්ථාවේ දී ස්ථාවර සභාවක් පිහිටුවාගැනීම සඳහා අවශ්ය සහය ලබා දීම දේශපාලන සදාචාරය බව ඔවුහු කියති. එමෙන්ම මේ එක්ව මතු වන්නේ අරගලයේ දී පලවා හරින ලද දුෂ්ඨ බලවේගවල එකතුවක් බවත් ජනතා ජයග්රහණය මැඩ පැවැත්වීමට මතුවන මේ දුර්දාන්තය එක විට යළි පරාජය කළ යුතු බවත් මේ කණ්ඩායමේ මතවාදය වී ඇත.
මන්ත්රී ධූර බෙදී ගොස් ඇති ආකාරයකොළඹ මහ නගර සභාවේ මන්ත්රී ධූර 117 පහත පරිදි බෙදී ගොස් ඇත:
- ජාතික ජන බලවේගය: මන්ත්රී ධූර 48
- සමගි ජන බලවේගය: මන්ත්රී ධූර 29
- එක්සත් ජාතික පක්ෂය: මන්ත්රී ධූර 13
- ශ්රී ලංකා පොදුජන පෙරමුණ: මන්ත්රී ධූර 5
- ශ්රී ලංකා මුස්ලිම් කොංග්රසය: මන්ත්රී ධූර 4
- ස්වාධීන කණ්ඩායම අංක 3: මන්ත්රී ධූර 3
- සර්ව ජන බලය පක්ෂය: මන්ත්රී ධූර 2
- ස්වාධීන කණ්ඩායම් අංක 4 සහ අංක 5: මන්ත්රී ධූර 2 බැගින්
- ජාතික නිදහස් පෙරමුණ, පොදුජන පෙරමුණ, ප්රජාතන්ත්රවාදී ජාතික සන්ධානය, ජාතික ජනතා පෙරමුණ, එක්සත් ජනරජ පෙරමුණ, ස්වාධීන කණ්ඩායම් 1 සහ 2: මන්ත්රී ධූර 1 බැගින්
