මනම්පිටිය නිමල් ජයරත්න –
විදෙස්ගතව සිටින පාතාල අපරාධකරුවෙක් වූ කුඩු අංජුගේ ගෝලයන් බව පවසමින් පොළොන්නරුව නගරයේ ගොඩනැගිලි ද්රව්ය වෙළඳසැලක හිමිකරුවෙකුට මරණ තර්ජනය කර රුපියල් ලක්ෂ 30 ක කප්පමක් ඉල්ලූ දෙදෙනකු අද (01) අත්අඩංගුවට ගත් බව පොලොන්නරුව පොලිස් කොට්ඨාශ අපරාධ විමර්ශන අංශය සඳහන් කරයි.
සැකකරුවන් දෙදෙනා කලහගල සහ පොලොන්නරුව අලුත්වැව ප්රදේශයේ පදිංචි අවුරුදු 26 ත් 30 ත් අතර වයසේ පසුවන දෙදෙනෙකු බව ඒ පිළිබඳ පරීක්ෂණ සිදුකරන පොලිස් පරීක්ෂක ඒ. ටී. බණ්ඩාර අප කළ විමසීමකදී සඳහන් කළේය.
කුඩු අන්ජුගෙ ගෝලයයන් බව පවසමින් ඉකුත් 23 වෙනිදා අදාළ ව්යාපාරිකයාට මරණ තර්ජනය කර රුපියල් ලක්ෂ 30 ක කප්පම් ඉල්ලා ඇති මේ පුද්ගලයින් සම්බන්ධව උක්ත ව්යාපාරිකයා පොලොන්නරුව ජ්යෙෂ්ඨ පොලිස් අධිකාරි කාර්යාලයට පැමිණිලි කිරීමෙන් පසු ඒ පිළිබඳ විමර්ශනය සිදුකර ඔවුන් දෙදෙනා අත්අඩංගුවට ගත් බව පොලිස් පරීක්ෂකවරයා කීවේය.
මීට වසර දෙකකට ඉහතදී ජාතික හැඳුනුම්පතක් නැති වූ පුද්ගලයකුගේ නමට මෙම සැකකරුවන් දෙදෙනා සිම් කාඩ්පතක් ගෙන එමගින් අදාල ව්යාපාරිකයාට මරණ තර්ජනය කර රුපියල් ලක්ෂ 30 ක් ඉල්ලා ඇති බවට මූලික විමර්ශනවලින් තහවුරු වී ඇත.
පොලොන්නරුව කොට්ඨාසශ භාර ජ්යෙෂ්ඨ පොලිස් අධිකාරි එල්.එච් නිශාන් ද සිල්වාගේ උපදෙස් මත පොලොන්නරුව සහකාර පොලිස් අධිකාරි චානක සිල්වා ගේ මෙහෙයවීමෙන්, කොට්ඨාශ අපරාධ විමර්ශන අංශයේ ස්ථානාධිපති, ප්රධාන පොලිස් පරීක්ෂක ප්රසන්න ජාගොඩගේ, පොලිස් පරීක්ෂක ඒ. ටි බණ්ඩාර පො.සැ. 42229 රංග කුමාර පො.සැ. 71750 චින්තක පො.කො. 81886 චාමර පො.කො. 29739 බණ්ඩාර පො.කො.34968 නිශ්ශංක පො.සැ.රියදුරු 33869 ප්රසාද්, යන පොලිස් නිලධාරීහු මෙම වැටලීම සිදුකළහ.
අත්අඩංගුවට ගත් සැකකරුවන් දෙදෙනා පොලොන්නරුව මහේස්ත්රාත් අධිකරණයට අද ඉදිරිපත් කිරීමට නියමිත බව පොලොන්නරුව කොට්ඨාස විමර්ශන අංශය සඳහන් කරයි.
