නව ප්රජාතන්ත්රවාදී පෙරමුණ මැතිවරණ කොමිසම වෙත සිය ජාතික ලැයිස්තුවේ මන්ත්රී ධුරය සඳහා ෆයිසර් මුස්තාපා නම් කර යවා තිබේ.
මෙම නම් කිරීම සිදුවන්නේ ජාතික ලයිස්තු මන්ත්රී ධූරය සඳහා පොහොට්ටුව නියෝජනය කළ හිටපු විදුලි බල ඇමති කාංචන විජේසේකර නම් කරන ලෙස පොහොට්ටු පාර්ශවයෙන් දැඩි ඉල්ලීමක් කර තිබුණ පසුබිමකය.
2024 මහමැතිවරණයේ ප්රතිඵල අනුව ගෑස් සිලින්ඩරය ලකුණින් තරග කළ නව ප්රජාතන්ත්රවාදී පෙරමුණ ජාතික ලැයිස්තු ආසන 2ක් හිමිකර ගත් අතර දැඩි විවේචනයට ලක් වෙමින් රවී කරුණානායක එම එක් මන්ත්රී ධූරයක් සඳහා නම් කර තිබිණි.
නව ප්රජාතන්ත්රවාදී පෙරමුණ යටතේ එක්සත් ජාතික පක්ෂය, ශ්රී ලංකා නිදහස් පක්ෂය සහ පොදුජන එක්සත් නිදහස් පෙරමුණ මහ මැතිවරණය සඳහා තරඟ කළ අතර ෆයිස්ර් මුස්තාපා ශ්රී ලංකා නිදහස් පක්ෂය නියෝජනය කර දේශපාලකයෙක් ලෙස මහින්ද අමරවීර, නිමල් සිරිපාල ද සිල්වා පාර්ශවය සමග එක්ව සිටියේය.
මේ අතර හිටපු විදුලිබල අමාත්ය කංචන විජේසේකර මහතාව පාර්ලිමේන්තුවට පත්කරන ලෙසද නව ප්රජාතන්ත්රවාදී පෙරමුණේ බලධාරීන්ගෙන් විවිධ පාර්ශ්ව ඉල්ලීම් කළහ. එහෙත් සන්ධානයේ අනෙක් පාර්ශව කියා තිබුණේ ගෑස් සිලින්ඩරයට ලැබුණු මන්ත්රී ධූර 03න් දෙකක් පොදු ජන එක්සත් පෙරමුණ විසින් දිනාගත් බවත් ශ්රී ලංකා නිදහස් පක්ෂය නියෝජනය කරමින් එක් වුන අපේක්ෂක චාමර සම්පත් එක් ආසනයක් දිනාගත් බවත්ය. ශ්රී ලංකා නිදහස් පක්ෂය, නව සන්ධානය සහ පොදු ජන පෙරමුණ විසින් ඇති කරගත් එකඟතාවයට අනුව ශ්රී ලංකා නිදහස් පක්ෂයට ජාතික ලයිස්තු මන්ත්රී ධූරය අවශ්ය බව ඔවුන් ලිඛිතව පක්ෂ නායකත්වයෙන් ඉල්ලා තිබිණි.
