කඩුගන්නාව පොලිසියේ නිලධාරීන් පිරිසක් හා තවත් පිරිසක් අතර ඊයේ (11) අලුයම 1.30 ට පමණ පිළිමතලාව නගරයේ දී ඇති වූ බහින්බස් වීමක් ගුටි බැට හුවමාරුවක් දක්වා දික් වී තිබේ.
පහර දීම හේතුවෙන් තුවාල ලද උප පොලිස් පරීක්ෂකවරයෙකු ඇතුළු නිලධාරීන් පස් දෙනෙකු ප්රතිකාර සඳහා මහනුවර ජාතික රෝහලට සහ කඩුගන්නාව හේනාවල රෝහලට ඇතුළත් කර තිබේ.
සිද්ධිය සම්බන්ධයෙන් සැකපිට පුද්ගලයන් දෙදෙනෙකු අත්අඩංගුවට ගෙන ඇත.
ස්ථාන මරුවක් ලද කඩුගන්නාව පොලිසියේ පොලිස් කොස්තාපල්වරයකු සඳහා පිළිමතලාව නගරයේ හෝටලයක දී පෙරේදා (10) රාත්රියේ මත්පැන් සාදයක් පවත්වා ඇති අතර ඒ සඳහා පොලිස් කොස්තාපල්වරු පස් දෙනෙකු සහභාගි වී ඇත. එම අවස්ථාවේ හෝටලය තුළ මත්පැන් පානය කරමින් සිටි තවත් පිරිසක් සමඟ ඇති වූ බහින්බස් වීමක් මත පොලිස් නිලධාරින් ඔවුන් සමඟ ගැටුමකට මුලපුරා තිබේ.
හෝටලයෙන් පිටතට පැමිණි දෙපිරිස ඊයේ (11) අලුයම 1.30 ට පමණ පිළිමතලාව නගරයේ පාලම අසලදී යළිත් බහින්බස් වී ඇත.පසුව දෙපිරිස අතර ගුටිබැට හුවමාරුවක් සිදුව ඇති අතර කඩුගන්නාව පොලිසියේ ජංගම මුර සේවයේ නියුතුව සිටි උප පොලිස් පරීක්ෂක කරුණාරත්නඇතුළු කණ්ඩායමක් එහි පැමිණ ගැටුම පාලනය කිරීමට උත්සහ කර තිබේ.
එම අවස්ථාවේ උප පොලිස් පරීක්ෂකවරයාට ද පහරක් එල්ල වී තිබෙන අතර ඔහු ප්රතිකාර සඳහා කඩුගන්නාව හේනාවල රෝහලට ඇතුළත් කර ඇත.
තුවාල ලද සෙසු පොලිස් නිලධාරීන් සාදයට සහභාගි වූවන් වන අතර ඔවුන් ප්රතිකාර සඳහා ඇතුළත් කර ඇත්තේ මහනුවර ජාතික රෝහලට ය.
පොලිස් නිලධාරීන්ට පහරදීම සම්බන්ධයෙන් අත්අඩංගුවට ගත් පුද්ගලයන් දෙදෙනා පිළිමතලාව පදිංචිකරුවෝ වෙති.
