ශ්රියානි විජේසිංහ –
පිළිකා රෝගීන්ගේ පිළිකා සෛල විනාශ කිරිමට ලබාදෙන කීමෝතෙරපි නික්ෂේපනය සමඟම ලබා දිය යුතු Filgrastim ඖෂධය නොමැති වීමෙන් පිළිකා රෝගීන්ට කීමෝතෙරපි ප්රතිකාර කිරීමට නොහැකි වී ඇතැයි රජයේ වෛද්ය නිලධාරින්ගේ සංගමයේ මාධ්ය ප්රකාශක වෛද්ය චමිල් විජේසිංහ හෙළිකරයි.
මේ වන විට ඇතැම් රෝගීන්ට කීමෝතෙරපි ප්රතිකාරය ලබා දිය යුතු දිනයන්ට එය ලබා දීමට නොහැකි වීම හේතුවෙන් ඔවුන් දැඩි ලෙස අසරණවී ඇති බවද හෙතෙම පැවසුවේය.
පිළිකා රෝගීන්ට කීමෝ තෙරපි නික්ෂේපනය ලබා දීමෙන් පසුව සිරුරේ සුදු රුධිරානු විනාශවන බැවින් එය ඉක්මනින් යථා තත්තවයට පත්කර ප්රතිශක්තිකරණය යථාවත් කිරීමට මෙම Filgrastim ඖෂධය අනිවාර්යයෙන්ම ලබා දිය යුතුවේ.
එසේ නොවුණහොත් කීමෝතෙරපි ලබා දුන් රෝගියාට විවිධ සංකූලතාවන් මතුවී මරණය පවා සිදුවිය හැකි බව හෙතෙම පෙන්වාදේ.
මෙම ඖෂධය මිල අධිකවන බැවින් රෝගීන්ට පිටතින් වුවද මිලදී ගැනීමට නොහැකි වී ඇතැයි වෛද්ය චමිල් පවසා සිටියි.
කෙසේ නමුත් මේ වන විට රෝහල්වල ඇතැම් ඖෂධයන්ගේ දැඩි හිඟයක් පවතින බැවින් එය ඖෂධ කඩිනමින් ලබා ගැනීමට කටයුතු නොකළහොත් රෝගීන්ගේ ජීවිත දැඩි අනතුරකට පත්වීම වැලැක්විය නොහැකි වනු ඇතැයිද හෙතෙම පෙන්වාදේ.
