එල්පීඑල් තරගාවලියේ ක්රීඩකයන් වෙන්දේසිගත වූ ආකාරය සහ කණ්ඩායම් හිමිකරුවන් එක් එක් මිල ගණන් යටතේ අත්කර ගනු ලැබූ ක්රීඩකයන් පිළිබඳ ක්රීඩාවේ වැරැදි වැළැක්වීමේ විශේෂ විමර්ශන ඒකකයේ දැඩි අවධානය යොමු වී ඇතැයි වාර්තා වේ.
පසුගියදා පැවති එල්පීඑල් ක්රීඩක වෙන්දේසියේදී කණ්ඩායම් හිමිකරුවන් ඇතැම් ක්රීඩකයන් ඉහළ මිලකට මිල දී ගැනීම යම්කිසි කුමන්ත්රණකාරි වැඩපිළිවෙළක කොටසක්දැයි විශේෂ විමර්ශන ඒකකයට සැක පහළ වී ඇතැයි ද එම ආරංචිමාර්ග වැඩිදුරටත් සඳහන් කළේය.
ප්රේම් ටකර් විසින් හිමිකාරිත්වය දරනු ලබන Galle Marvels විසින් මෙරට විශ්රාම ගිය ක්රීඩකයකුවන ඉසුරු උදාන අමෙරිකානු ඩොලර් ලක්ෂයක මුදලකට මිල දී ගැනීම හේතුවෙන් එම මූලික සැකය මතු වී ඇත.
මෙවැනි ජාත්යන්තර තරගාවලියක් ශ්රී ලංකාවේ පැවැත්වීමේදී මෙරටට ගලා එන විදේශ විනිමය නැවත වංචා මාර්ගික ක්රමවේදයක් යටතේ විදෙස් රටවල ගිණුම්වලට බැර වන්නේදැයි ක්රීඩාවේ වැරැදි වැළැක්වීමේ විශේෂ විමර්ශන ඒකකය දැඩි සෝදිසියෙන් පසුවන බව ද ආරංචිමාර්ග පැවැසීය.
එමෙන්ම ඇතැම් ක්රීඩකයන් වෙන්දේසියේදී මිල දී ගැනීම පසුපස කොමිස් මුදල් අත්කර ගැනීමේ ජාවාරමක් ක්රියාත්මක වන්නේදැයි විශේෂ විමර්ශන ඒකකය නිරීක්ෂණය කරමින් සිටින බව ද වාර්තා වේ.
අවශ්යතාව මත ඉදිරියේදී තවත් පුද්ගලයන් රැසකගෙන් ප්රශ්න කිරීමට ද විශේෂ විමර්ශන ඒකකය තීරණය කර ඇතැයි ආරංචි මාර්ග සඳහන් කළේය.
එල්පීඑල් තරගාවලියේ දඹුල්ල තන්ඩර්ස් කණ්ඩායමේ හිමිකරු වූ බ්රිතාන්ය පුරවැසිභාවය සහිත බංග්ලාදේශ ජාතික ටමීම් රහ්මාන් පෙරේදා අත්අඩංගුවට ගත් විශේෂ විමර්ශන ඒකකය ඉදිරියේදී පැවැත්වීමට නියමිත එල්පීඑල් තරගාවලියට අදාළව සිය බුද්ධි ජාලයට ලැබෙන තොරතුරු මත පුළුල් විමර්ශනයක් සිදු කිරීමට නියමිත බවද එම ආරංචි මාර්ග වැඩිදුරටත් සඳහන් කළේය.
අත්අඩංගුවට ගැනීමෙන් පසු අධිකරණය මඟින් රක්ෂිත බන්ධනාගාරගත කිරීමට නියම වූ පුද්ගලයා දඹුල්ල තන්ඩර්ස් කණ්ඩායමේ හිමිකරු ලෙස ක්රීඩක වෙන්දේසියට එක්වී අමෙරිකානු ඩොලර් ලක්ෂ හතරහමාරකට දෙස් විදෙස් ක්රීඩකයන් 24 දෙනකු මිල දී ගනු ලැබුවද, එල්පීඑල් හිමිකරුවන්ගේ නම් ලැයිස්තුව යටතේ දඹුල්ල කණ්ඩායමේ හිමිකරු ලෙස ඉම්පීරියල් ස්පෝර්ට්ස් ගෘප් නමැති බ්රිතාන්ය සමාගමක නම සඳහන් වීම ද ක්රීඩාවේ වැරැදි වැළැක්වීමේ විශේෂ විමර්ශන ඒකකයේ දැඩි නිරීක්ෂණයට ලක්වී ඇතැයි වාර්තා වේ.
බ්රිතාන්යයේ සමාගම් පිළිබඳ තොරතුරු ඇතුළත් endole වෙබ් අඩවියට අනුව ඉම්පීරියල් ස්පෝර්ට්ස් ගෲප් නමැති සමාගම ලියාපදිංචි කර ඇත්තේ පසුගිය පෙබරවාරි මාසයේදි ය. එහි හිමිකරුවන් ලෙස නම් කර ඇති පුද්ගලයන් දෙදෙනා අතර ටමීම් රහ්මාන්ගේ නම සඳහන් නොවන බවද වාර්තා වේ. එම සමාගමේ ලියාපදිංචියට අනුව එම සමාගමේ සිටින්නේ ක්රියාකාරි අධ්යක්ෂවරුන් දෙදෙනකු පමණක් බවද වාර්තා වේ. ඩැනියෙල් ජෝසෙෆ් විලියම්ස් (අධ්යක්ෂ සහ පරිපාලක) සහ ඩ්රිව් කැමරොන් ෂර්මන් (අධ්යක්ෂ ක්රීඩා පුහුණුකරු) යන බ්රිතාන්ය ජාතිකයන් දෙදෙනා පමණක් සමාගමේ හිමිකරුවන් ලෙස එහි සඳහන් කර ඇතැයි වාර්තා වේ.
එම ලියාපදිංචියට අනුව අත්අඩංගුවට පත්වූ පුද්ගලයා ඉම්පීරියල් ස්පෝර්ට්ස් සමාගමේ හිමිකරු ලෙස පෙනී සිටීම ද විශේෂ විමර්ශන ඒකකයේ දැඩි සැකයට ලක්වී ඇතැයි වාර්තා වේ.
අදාළ පුද්ගලයා අත්අඩංගුවට ගැනීමට අවශ්ය අතිශය වැදගත් තොරතුරු රැසක් හෙළිකර ගැනීමට සුගතදාස ගෘහස්ථ ක්රීඩා සංකීර්ණයේ පිහිටි ක්රීඩාවේ වැරැදි වැළැක්වීමේ විශේෂ විමර්ශන ඒකකය මඟින් පමණක් සිදුවී ඇති අතර, ඒ සඳහා කිසිදු පාර්ශ්වයක සහයෝගය ලැබී නැතැයි ද වාර්තා වේ. – (ෆව්ස් මෙහොමඩ් දිනමිණ පුවත් පතට සැපයූ කථාවක් ඇසුරිනි)
