අමායා උඩුවැරැල්ල –
උතුරු කොරියාව විසින් දේශසීමාව හරහා දකුණු කොරියාවට බැලූන් යොදාගනිමින් අපද්රව්ය එවන බව විදෙස් මාධ්ය වාර්තා කර තිබෙනවා.
අද (29) එනම් බදාදා පස්වරුව වන විට බැලූන් 260 කට අධික ප්රමාණයක් දකුණු කොරියානු හමුදාව විසින් හඳුනාගෙන ඇති අතර ඒවායින් බොහොමයක් බිම පතිත වී ඇති බව සෝල් නගරයේ ඒකාබද්ධ මාණ්ඩලික ප්රධානියා පවසා තිබෙනවා.
දකුණු කොරියානු හමුදාව විසින් නිකුත් කර ඇති ඡායාරූපවල ප්ලාස්ටික් බෑග් සවි කර ඇති වායු බැලූන පෙන්නුම් කර තිබෙන අතර කඩා වැටුණු බැලූන් වටා කුණු කසළ වැටී ඇති ආකාරය ද දක්නට ලැබෙනවා. දකුණු කොරියානු මාධ්ය සඳහන් කරන්නේ ඇතැම් බැලූනවල සත්ව මළ මූත්රා ද තිබූ බවයි.
සෝල් නගරයෙහි පිහිටි ජනාධිපති කාර්යාලයේ නිලධාරියෙකු ප්රකාශ කර ඇත්තේ දකුණු කොරියානු ජනතාව සහ රජය මෙමගින් කලබල වන්නේද, මෙවැනි තර්ජනවලට ප්රතිචාර දක්වන්නේ කෙසේද යන්න පිළිබඳව පරීක්ෂා කිරීමට උතුරු කොරියාවට අවශ්යව ඇති බවයි.
දකුණු කොරියානු හමුදාව මෙම ක්රියාව හෙළා දුටු අතර අද නිවේදනයක් නිකුත් කරමින් කියා සිටියේ මෙය පැහැදිලිවම ජාත්යන්තර නීතිය උල්ලංඝනය කිරීමක් වන අතර ජනතාවගේ ආරක්ෂාවට බරපතල තර්ජනයක් බවයි. එමෙන්ම දකුණු කොරියානු දේශසීමාව අසල ප්රදේශ වල ජීවත් වන ජනතාවට වඩාත් සැලකිලිමත් වන ලෙසට අනතුරු ඇඟවීම් ද සිදුකර තිබෙනවා.
කෙසේ වෙතත් මෙම මස මුලදී උතුරු කොරියාවෙන් දකුණු කොරියාවට පලා ආ පිරිසක් උතුරු කොරියානු නායක කිම් ජොන්ග් උන් විවේචනය කරමින් පත්රිකා 300,000ක් පමණ රැගත් විශාල බැලූන් 20 ක් පමණ උතුරු කොරියාවට යවා ඇති බව වාර්තා වනවා. එමෙන්ම ප්රකට දකුණු කොරියානු සංගීත කණ්ඩායමක් BTS හි සාමාජිකයින්ගේ ගීත ඇතුළු ගීත සහිත USB 2,000 ක් පමණ එම බැලූනවල රඳවා යවා ඇති බව වාර්තා වනවා. උතුරු කොරියානු නායකයා දකුණු කොරියානු K-pop ගීත හඳුන්වන්නේ පිළිකාවක් ලෙසයි.
කෙසේ නමුත් උතුරු සහ දකුණු කොරියාව අතර මෙවැනි තත්වයන් උත්සන්න වන විට, විශේෂඥයින් අවධාරණය කරන්නේ මේ ආකාරයේ බැලූන් හුවමාරුව මිසයිලවලට වඩා බෙහෙවින් සුදුසු බවයි.
