ජයකාන්ත ලියනගේ – බළපිටිය
අහුන්ගල්ල, බෝගහපිටිය ප්රදේශයේදී පුද්ගලයින් දෙදෙනෙකු ඉලක්ක කර ගනිමින් ඊයේ (23) රාත්රී සිදුකරන ලද වෙඩි තැබීමකදී එක් පුද්ගලයෙක් මියගොස් අනෙක් පුද්ගලයා බරපතල තුවාල ලබා බළපිටිය මූලික රෝහලට ඇතුලත් කර තිබේ.
සිද්ධිය සම්බන්ධයෙන් වූ මහේස්ත්රාත් පරීක්ෂණයේ මූලික කටයුතු අද (24) පෙරවරුවේ බළපිටිය මහේස්ත්රාත් හංසදේව සමරදිවාකර විසින් පවත්වන ලදී.
මියගිය අයගේ පශ්චාත් මරණ පරීක්ෂණය බළපිටිය මූලික රෝහලේ අධිකරණ වෛද්ය නිලධාරණී ජී ඩබ්ලිව් එන් අයි එස් ප්රනාන්දු විසින් අද (24) බළපිටිය මූලික රෝහලේදී පැවැත්වීමට නියමිතය.
වෙඩි තැබීමෙන් මියගොස් ඇත්තේ අමරමෝලී මාවත, මාකුඹුර, අහුන්ගල්ල ලිපිනයේ පදිංචි කෝම්ඹු චතුරංග ජයලත් ද සිල්වා (29) නැමැති අයයි.
බළපිටිය මූලික රෝහලේ ප්රතිකාර ලබන්නේ එගොඩමුල්ල, අහුන්ගල්ල ලිපිනයේ පදිංචි ගුණරත්න දිල්ක ධනංජය ද සිල්වා (24) නැමැති අයයි. මොහු දැනට වතුරේගම, අහුන්ගල්ල ලිපිනයේ පදිංචි අයෙකු බවට පොලිස් පරීක්ෂණ වලදී තහවුරු වී තිබේ.
ඊයේ (23) රාත්රී 9.30 ට පමණ අහුන්ගල්ල, බෝගහපිටිය ප්රදේශයේ කරිජ්ජපිටිය වෙල්යාය මැදින් ගලා බසින කිරිල්ලඇල හරහා යොදා ඇති කුඩා පාලම අසලදී මෙම වෙඩි තැබීම සිදුව තිබෙන බව අහුන්ගල්ල පොලීසිය කියයි.
මියගොස් ඇති අය තමන්ට වෙඩි වැදීමෙන් පසු සිද්ධිය වූ ස්ථානයට මීටර් 400 ක් පමණ දුරින් ඇති බෝගහපිටිය විහාරස්ථානයට පැමිණ විහාරාධිපති හිමියන්ට තමන් අනතුරකට ලක්වූ බව පැවසීමෙන් පසු එම ස්ථානයේම ඇද වැටී තිබෙන බවද පොලිස් පරීක්ෂණ වලදි තහවුරු වී තිබේ.
දැනට බළපිටිය මූලික රෝහලේ ප්රතිකාර ලබන අය, වෙඩි වැදීමෙන් පසු මියගොස් ඇති ආකාරයෙන් වෙඩි තැබීම සිදුකරන ලද ස්ථානයේම වැටී සිට ඇති බවත් ඒ නිසාම ඝාතකයින් ඔහු මිය යන්නට ඇතැයි සිතා පලාගොස් තිබෙන බවත් අහුන්ගල්ල පොලීසිය කියයි.
පසුව තුවාල කරුවන් දෙදෙනාම බළපිටිය මූලික රෝහලට ඇතුළත් කර තිබෙන අතර ඒ වන විටත් විහාරස්ථානයේ ඇද වැටුණ අය මියගොස් සිට ඇති බව බළපිටිය මූලික රෝහලට සම්බන්ධ ආරංචි මාර්ග සදහන් කරයි.
මෙම වෙඩි තැබීම බෝර – 12 තුවක්කුවකින් සිදුකර තිබෙන බවද පොලිස් පරීක්ෂණ වලදී තහවුරු වී තිබේ. වෙඩි තැබීම සිදුකරන ලද ස්ථානයේ තිබී බෝර – 12 තුවක්කු වලට යොදන හිස් පතුරම් කොපු 05 ක් ද අහුන්ගල්ල පොලීසිය විසින් සොයාගෙන ඇත.
මියගිය අයගේ අත් දෙකට හා බඩට වෙඩි වැදී තිබෙන බවත් තුවාල ලැබූ අයගේ බඩට හා කකුල් දෙකට වෙඩි වැදී තිබෙන බවත් පොලිස් පරීක්ෂණ වලදී තහවුරු වී තිබේ.
හෙරොයින් ජවාරමට සම්බන්ධ දෙපිරිසක් අතර පවතින කොන්තරයක ප්රතිඵලයක් ලෙස මෙම ඝාතනය සිදුකර තිබෙන බවද අහුන්ගල්ල පොලීසිය කියයි.
ඝාතනයට ලක් වූ අය සහ තුවාල ලැබූ අය, හෙරොයින් පානයට ඇබ්බැහි වූවන් බවද පොලිස් පරීක්ෂණ වලදී තහවුරු වී තිබේ.
ඊයේ (23) රාත්රියේද මෙම දෙදෙනා තමන්ට ලැබුණ දුරකතන ඇමතුමකට අනුව හෙරොයින් ජාවාරමට අදාල ගණුදෙනුවක් සදහා ත්රීරෝද රථයකින් අදාල ස්ථානයට ගොස් තිබෙන බවද මෙතෙක් කරන ලද පොලිස් පරීක්ෂණ වලදි තහවුරු වූයේ යැයි අහුන්ගල්ල පොලීසියේ ප්රකාශකයෙක් සදහන් කළේය. මොවුන් පැමිණි ත්රීරෝද රථය අහුන්ගල්ල පොලීසියේ භාරයට ගෙන තිබේ.
සිද්ධිය සම්බන්ධයෙන් මෙතෙක් කිසිවෙක් අත් අඩංගුවට ගෙන නොමැති බවද අහුන්ගල්ල පොලීසිය කියයි. සිද්ධියේ සැකකරුවන් අත් අඩංගුවට ගැනීම සදහා අහුන්ගල්ල පොලීසිය, අම්බලන්ගොඩ සහකාර පොලිස් අධිකාරි කාර්යාලය සහ ඇල්පිටිය විශේෂ අපරාධ ස්ථාන විමර්ශන ඒකකය වෙන් වෙන් වශයෙන් පොලිස් විමර්ශන කණ්ඩායම් 03 ක් යොදවා තිබෙන බවද අම්බලන්ගොඩ සහකාර පොලිස් අධිකාරි කාර්යාලයේ ප්රකාශකයෙක් සඳහන් කළේය.
වෙඩි තැබීමට අදාල වැදගත් තොරතුරු රැසක් මේ වන විටත් අනාවරණය කරගෙන තිබෙන බවද අහුන්ගල්ල පොලීසියට සම්බන්ධ ආරංචි මාර්ග සදහන් කරයි.
අහුන්ගල්ල වැඩ බලන පොලිස් ස්ථානාධිපති ප්රධාන පොලිස් පරීක්ෂක කේ එම් බී නිශාන්ත, අපරාධ අංශයේ ස්ථානාධිපති උප පොලිස් පරීක්ෂක පෙරේරා, පොලිස් කොස්තාපල් සදමාල් (86537) යන නිලධාරීන් ඇතුළු පිරිසක් විසින් වැඩිදුර පරික්ෂණ පවත්වයි.
