අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන කොළඹ කොටුව මහේස්ත්රාත් අධිකරණයට ඉදිරිපත් කරනු ලැබූ හිටපු ජනාධිපති රනිල් වික්රමසිංහ රක්ෂිත බන්ධනාගාරගත කිරිමේ ඓතිහාසික තීන්දුව අද (22) කොටුව මහේස්ත්රාත් නිළුපුලී ලංකාපුර ලබා දුන්නාය.
අධිකරණය නියෝග කළේ හිටපු ජනාධිපති රනිල් වික්රමසිංහ අගෝස්තු මස 26 වැනි දා තෙක් රක්ෂිත බන්ධනාගාරගත කිරීමටය.
රටේ විධායක ජනාධිපතිවරයෙක් මොනම සිදුවීමකට හෝ බන්ධනාගාරගත වූ මුල්ම අවස්ථාව අදය. අද උදේ ඉතිහාසයේ මුල්ම වතාවට විධායක ජනාධිපතිවරයෙක් අත් අඩංගුවට පත් වුනේය.
මේ තින්දුව ගනු ලබන්නේ ලංකාවේ ඉහළම තළයේ ප්රභූ නීතිවේදීන් ගණනාවක් පසුබිමේ ගොඩනැගෙන දීර්ඝ නෛතික සංවාදයකින් අනතුරුවය. කොළඹ කොටුව මහේස්ත්රාත් නිලුපුලි ලංකාපුරටත් මෙය සිය අධිකරණ ජීවිතයේ සන්ධිස්ථානයක් වූයේය. ඉතිහාසයේ පළමු වරට ජනාධිපතිවරයෙක් රක්ෂිත බන්ධනාගාරගත කරනවාද නැතිනම් ඔහුට සාමාන්ය පරිදි ඇප ලබා දෙනවා ද යන්න ජ්යෙෂ්ඨ නීතිවේදීන්ගේ තර්කණයන් විශ්ලේෂණය කරමින් තීරණය කරන්නී කොටුව මහේස්ත්රාත් නිලුපුලී ලංකාපුරය.
අපරාධ පරීක්ෂණ දෙපාර්තමේන්තුව (CID) විසින් හිටපු ජනාධිපති රනිල් වික්රමසිංහ රඳවා තබා ගැනීමෙන් පසු නිකුත් කරන ලද අත්අඩංගුවට ගැනීමේ රිසිට්පතේ දැක්වුනේ, පොදු දේපළ පනතේ 5(1) වගන්තිය සහ දණ්ඩ නීති සංග්රහයේ 386 සහ 388 වගන්ති යටතේ වැරදි සිදු කිරීම සම්බන්ධයෙන් ඔහුට චෝදනා එල්ල වී ඇති බවය. රටේ නීතිය ප්රකාරව පොදු දේපල පනත යටතේ අධිකරණයට ඉදිරිපත්වන සැකකරුවෙකුට ඇප ලබා දිය නොහැකිය. අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජෙනරාල් දිලීප පීරිස් අධිකරණය හමුවේ කරුණු දක්වමින් ප්රකාශ කළේ මෙම සැකකරුට එරෙහිව පොදු දේපොළ පනත යටතේ කරුණු ඉදිරිපත් කරන බවය.
දිලීප පීරිස් කරුණු දක්වමින් පැවසුවේ මේ සම්බන්ධව එස්. කරුණාරත්න නම් සිවිල් පුද්ගලයෙක් කළ පැමිණිල්ලක් මත විමර්ශනයක් සිදුකර 33 දෙනෙකුගෙන් සාක්ෂි සටහන් කරගෙන ඇති බවත් කරුණු සොයාගෙන යෑමේ දී මෙම සංචාරය සඳහා රජයේ මුදලින් රුපියල් ලක්ෂ 166ක් වියදම් කර ඇති බවත්, එම සංචාරයට අදාලව පැවති මුල් ලේඛණ මේ වනවිට වෙනස් වී ඇති බවත්ය.
විමර්ශන කටයුතු අවසන් නොමැති නිසා සැකකරු රක්ෂිත බන්ධනාගාර ගත කරන ලෙසත් ඔහු ඉල්ලා සිටියේය.
සැකකරු වෙනුවෙන් පෙනී සිටි ජනාධිපති නීතීඥ අනූජ ප්රේමරත්න අධිකරණයේ කරුණු දක්වමින් සැකකරු ඇප මත මුදාහරින ලෙස ඉල්ලා සිටියේය. ඔහු පෙන්වා දුන්නේ මෙම මුදල් අවභාවිතාව සම්බන්ධව විගණකාධිපතිගේ වාර්තාවේ සදහන්ව නැති බවය.
අධිකරණයට රැගෙන පැමිණි අවස්ථාව
අපරාධ පරික්ෂණ දෙපාරත්මේන්තුව විසින් අත් අඩංගුවට ගත් රනිල් වික්රමසිංහ අධිකරණය රැගෙන එනු ලැබුවේ දැඩි ආරක්ෂාවක් යටතේය. ඔහු අධිකරණයට ඉදිරිපත් කළ අවස්ථාවේ දී ඔහුට ශක්තියක් වීමට නාමල් රාජපක්ෂ සහ හිටපු ජනාධිපති මෛත්රීපාල සිරිසේන ද පැමිණ සිටියේය. අධිකරණ භූමියේ ප්රසන්න රණතුංග, මනුෂ නානායක්කාර, ටිරාන් අලස්, අලි සබ්රි, නිමල් සිරිපාද සිල්වා ඇතුළු දේශපාලකයින් පිරිසක් වූහ.
එමෙන්ම රනිල් වික්රමසිංහට හිතවත් විශාල පිරිසක් ද මහේස්ත්රාත් අධිකරණය වෙත රැස්වී සිටියහ.
විමර්ශනය කුමක් ද?
මුලින් කී පරිදි ලංකා ඉතිහාසයේ පළමු වරට හිටපු ජනාධිපතිවරයෙක් අත් අඩංගුවට පත්වූයේ අද දිනයේදීය. සිදුවෙමින් ඇති විමර්ශනයක් සම්බන්ධයෙන් ප්රකාශයක් ලබා ගැනීම සඳහා අපරාධ පරීක්ෂණ දෙපාර්තමේන්තුවට කැඳවූ හිටපු ජනාධිපති වික්රමසිංහ පසුව අත් අඩංගුවට ගන්නා ලදී.
මෙම විමර්ශනය රනිල් වික්රමසිංහ ජනාධිපති ධුරය දැරූ කාලය තුළ ඔහුගේ බිරිඳ වන මහාචාර්ය මෛත්රී වික්රමසිංහගේ උපාධි ප්රදානෝත්සවයකට සහභාගී වීම සඳහා රාජ්ය මුදල් වැය කරමින් ලන්ඩනයේ සිදුකළ පුද්ගලික සංචාරයක් පිළිබඳ එල්ල වූ චෝදනා සම්බන්ධවය.
2023 දී G77 සමුළුවකට සහභාගී වූ හිටපු ජනාධිපතිවරයා හවානා සිට ආපසු එන අතරතුර ලන්ඩනයේ නතර විය. ඔහු සහ ඔහුගේ බිරිඳ මෛත්රී වුල්වර්හැම්ප්ටන් විශ්ව විද්යාලයේ උපාධි ප්රධානෝත්සවයකට සහභාගී වූහ.
තම බිරිඳ තමන්ගේ ගමන් වියදම් තමන් විසින්ම ගෙවූ බවත්, කිසිදු රාජ්ය අරමුදල් භාවිතාවක් නොකළ බවත් වික්රමසිංහ කියා සිටියේය.
කෙසේ වෙතත්, පොලිසියේ අපරාධ විමර්ශන දෙපාර්තමේන්තුව චෝදනා කළේ රනිල් වික්රමසිංහ පෞද්ගලික සංචාරයක් සඳහා රජයේ මුදල් භාවිතා කළ බවත්, එම පුද්ගලික සංචාරයට එක් වූ ඔහුගේ ආරක්ෂකයින්ට ද රජය මුදල් ගෙවූ බවත්ය. ඒ බව විමර්ශනවලදී තහවුරු වී ඇති බවත් විමර්ශන අංශ පැවසුවේය.
සීඅයිඩීය මීට පෙර ජුනි 24 වන දින කොටුව මහේස්ත්රාත් අධිකරණය හමුවේ නඩුවට අදාළ සාක්ෂි ඉදිරිපත් කර තිබුණි. පසුව හිටපු ජනාධිපතිවරයාගේ පෞද්ගලික ලේකම්වරිය ලෙස සේවය කළ සැන්ඩ්රා පෙරේරා සහ හිටපු ජනාධිපති ලේකම් සමන් ඒකනායකගෙන් ද ප්රකාශ සටහන් කර ගන්නා ලදී.
එජාප කියන්නේ කුමක් ද?
හිටපු ජනාධිපති රනිල් වික්රමසිංහ සහ ඔහුගේ බිරිඳ වන මහාචාර්ය මෛත්රී වික්රමසිංහ වෙත වුල්වර්හැම්ප්ටන් විශ්ව විද්යාලය විසින් කරන ලද ආරාධනා පත්රයේ පිටපතක් නිකුත් කරමින් එක්සත් ජාතික පක්ෂයේ මාධ්ය ඒකකය ප්රකාශ කරන්නේ හිටපු ජනාධිපතිවරයා රාජ්ය මුදල් අනිසි ලෙස භාවිතා නොකළ බවය.
2022 වසරේ ජූලි 20 සිට 2024 සැප්තැම්බර් 23 දක්වා වසර දෙකකට ආසන්න කාලය තුළ බලයේ සිටි ජනාධිපතිවරයා වූ රනිල් වික්රමසිංහ විදෙස් සංචාර 23කට සහභාගී වී ඇති අතර, එක් එක් විදේශ සංචාර පිළිබඳව තොරතුරු පරීක්ෂා කිරීම මෙතෙක් අවසන් වී නොමැති බවට මීට පෙර තොරතුරු දැනගැනීමේ පනත යටතේ බීබීසී සිංහල කළ තොරතුරු විමසීමකදී ජනාධිපති ලේකම් කාර්යාලය ප්රකාශ කළේ ය.
