-
මැදිහත් වූයේ වසර ගණනාවක් පුරා නිලධාරීන්ගෙන් සාධාරණයක් ඉටු නොවූ අසරණ ජනතාවගේ ගැටලු සඳහා පමණයි… නියෝජ්ය ඇමති නාමල් කරුණාරත්න පැහැදිලි කරයි…
ඉඩම් රාජකාරී ඉටු කිරීමේදී සිදුවන අනිසි දේශපාලන මැදිහත්වීම් සම්බන්ධයෙන් ශ්රී ලංකා ප්රාදේශීය ලේකම්වරුන්ගේ සහ සහකාර ප්රාදේශීය ලේකම්වරුන්ගේ සංගමය රජයට සිය දැඩි විරෝධය පළ කර සිටියි.
කෘෂිකර්ම, පශු සම්පත්, ඉඩම් හා වාරිමාර්ග අමාත්යාංශයේ ලේකම්වරයා වෙත ලිපියක් යොමු කරමින් එම සංගමය අවධාරණය කර ඇත්තේ, මෙම තත්ත්වය හමුවේ රාජ්ය නිලධාරීන්ට ස්වාධීනව රාජකාරි කිරීමට ඇති පරිසරය දැඩි ලෙස අභියෝගයට ලක්ව ඇති බවයි.
එම ලිපිය මගින් පෙන්වා දී ඇති පරිදි, කෘෂිකර්ම නියෝජ්ය අමාත්ය නාමල් කරුණාරත්නගේ පෞද්ගලික ලේකම්වරයා විසින් ඇතැම් ප්රාදේශීය ලේකම්වරුන් වෙත සෘජුවම බලපෑම් සහගත ලිපි ඉදිරිපත් කිරීම සහ විවිධ නියෝග නිකුත් කිරීම මෙම ගැටලුවට මූලික හේතුව බව එම සංගමය පවසයි. රාජ්ය පරිපාලන ව්යුහය තුළ ස්ථාපිත නිල පටිපාටියෙන් බැහැරව, දේශපාලන පත්වීම්ලාභීන් හරහා මෙලෙස බලපෑම් එල්ල කිරීම මගින් ප්රාදේශීය ලේකම්වරුන් දැඩි අපහසුතාවයට පත්වන බව එම සංගමය මේ ලිපිය මගින් පෙන්වා දී ඇත.
විශේෂයෙන්ම ඉඩම් ආරවුල් නිරාකරණය කිරීමේදී සහ ඉඩම් බෙදාදීමේදී දේශපාලන අධිකාරියෙන් ලැබෙන ලිපි හෝ වාචික නියෝග මත පදනම්ව තීරණ ගැනීමට සිදුවීමෙන් එම ක්රියාවලියේ විනිවිද භාවය සම්පූර්ණයෙන්ම ගිලිහී යන බව සංගමය ප්රකාශ කර තිබේ.
මේ හරහා සාමාන්ය ජනතාව රාජ්ය යාන්ත්රණය කෙරෙහි තබා ඇති විශ්වාසය පළුදු වනවා පමණක් නොව, අවසානයේදී සිදුවන නීතිමය ගැටලුවලට වගකීමට රාජ්ය නිලධාරීන්ට සිදුවන බවද ඔවුහු අවධාරණය කරති.
මෙම අර්බුදකාරී තත්ත්වය වළක්වා ගැනීම සඳහා විධිමත් යාන්ත්රණයක් සකස් කරන ලෙස ඉල්ලා සිටින ප්රාදේශීය ලේකම්වරුන්ගේ සංගමය යෝජනා කරන්නේ, දේශපාලන අධිකාරිය වෙත ඉදිරිපත් වන ඉඩම් ගැටලු අමාත්යාංශයේ අතිරේක ලේකම්වරයෙකු හෝ ජ්යෙෂ්ඨ සහකාර ලේකම්වරයෙකු වැනි වගකිවයුතු නිලධාරියෙකු හරහා පමණක් සම්බන්ධීකරණය කළ යුතු බවයි.
එසේ නොවන තාක් කල්, දේශපාලන මැදිහත්වීම් මත ගන්නා තීරණ සම්බන්ධයෙන් වගකීම භාර ගැනීමට තමන්ට නොහැකි බවත් ඔවුන් දන්වා සිටියි.
කෙසේ වෙතත්, මෙම චෝදනා සම්බන්ධයෙන් අදහස් දක්වා ඇති කෘෂිකර්ම, පශු සම්පත්, ඉඩම් හා වාරිමාර්ග නියෝජ්ය අමාත්ය නාමල් කරුණාරත්න මහතා පවසා ඇත්තේ, තමා මැදිහත් වූයේ වසර ගණනාවක් පුරා නිලධාරීන්ගෙන් සාධාරණයක් ඉටු නොවූ අසරණ ජනතාවගේ ගැටලු සඳහා පමණක් බවයි.
ඇතැම් ප්රාදේශීය ලේකම්වරුන් ඉඩම් සම්බන්ධයෙන් ගෙන ඇති පක්ෂග්රාහී තීරණ ප්රශ්න කිරීම නිසා මෙවැනි විරෝධයක් මතු වී ඇති බවද හෙතෙම සඳහන් කළේය.
