-
අමූලික බොරු කියන අශිෂ්ඨ සමාජ මාධ්යය පුද්ගලයින්ට කරන්නේ හරවා ගත නොහැකි අපරාධයක්… ඇමති අපරාධකරුවන්ට නියත දඬුවම් ඉල්ලයි!
තමන්ගේ නම සම්බන්ධ කරගෙන සිය ගජ මිතුරෙක් තම දේශපාලන රැකවරණය සහිත නීති විරෝධීව සිංහරාජ පිවිසුමේ හොර මැණික් පතල් කැනීමක් සිදුකරන බවට සමාජ මාධ්ය ඔස්සේ දැන් පලවෙමින් ඇති පුවත සපුරා අසත්යයක් බවත් මේ අමූලික බොරුව සමාජගත කළ අපරාධකාරී සමාජ මාධ්යවලට එරෙහිව දැඩි නීතිම ක්රියා මාර්ග ගන්නා ලෙසත් දන්වා බුද්ධ ශාසන සහ සංස්කෘතික කටයුතු ඇමති හිනිදුම සුනිල් සෙනවි විසින් අපරාධ පරීක්ෂණ දෙපාර්තමේන්තුවට පැමිණිල්ලක් ගොනු කර තිබේ.
මේ සම්බන්ධව වැඩිදුරතට අදහස් දැක්වූ අමාත්යවරයා දිනමිණ පුවත්පතට පවසා තිබුණේ තමන්ට මෙවැනි ව්යාපාරික මිතුරෙක් නොමැති බවය.
‘මේ කියන විදිහේ ව්යාපාරික මිතුරෙක් මට නැහැ. සුනන්ද දීපාල් කියලා හඳුන්වාදී ඇති පුද්ගලයා මා දුරට දැකලා තියෙන්නේ එකම එක දවසක් පමණයි. ඔහු සමඟ වචනයක් හෝ කතා කර තිබේ නම් මේ ප්රවෘත්තියෙන් පස්සේ මම ඔහුගේ දුරකථන අංකය සොයාගෙන කරපු කරුණු පැහැදිලි කිරීමක් සම්බන්ධයෙන් විතරයි.”
“ඔහු මගේ ව්යාපාරික මිතුරෙක් හෝ වෙනත් මිතුරෙක් නොවන බව කිව යුතුයි. මේ අසත්ය චෝදනාව පදනම් කරගෙන සමාජ මාධ්යවල ඉතා දරුණු විදිහට තීව්ර විදියට පෝස්ටු හැදෙනවා. මම මේ ගැන අනාවරණය කළ යුතුයි. පෞද්ගලිකව මටත් අපේ රජයේ ක්රියාත්මක කරන ප්රතිපත්තිවලටත් බරපතළ හානියක් අපකීර්තියක් සිදුවෙලා තිබෙනවා. ඒ නිසා මා විසින් පොලිස් පරිගණක විමර්ශන අංශය සමාජ මාධ්ය ඒකකයේ පැමිණිල්ලක් ගොනු කරනු ලැබුවා.”
“නිශ්චිත විදියට මේ තොරතුරු පළ කරපු, මේ අපකීර්තිය වගා කරලා පහත් භාෂාවෙන් සිරස්තල හදලා වර්ධනය කරපු සියලු දෙනාට එරෙහිව නීතිය ක්රියාත්මක කරන්න කියලා මම ඉල්ලා හිටියා. ඉතා පැහැදිලිව මේ පිළිබඳ සාධාරණ සොයා බැලීමක් කරලා, නීතිය උපරිමයෙන් ක්රියාත්මක කරලා මේ අසත්යය අභූත චෝදනාව නැගූ සියලු දෙනාට නීතියෙන් පිළිතුරු ලබාදෙනු ඇතැයි කියලා මම විශ්වාස කරනවා. අපේ රටේ සමාජ මාධ්ය ක්ෂේත්රය අධිකරණයක් බවට පත්වෙලා.”
“සමාජ මාධ්යයේ නිරත වෙලා ඉන්න ආදරණීය සියලු මිතුරු මිතුරියන් මාධ්යවේදීන්ගෙන් මම ඉල්ලීම කරනවා. ඔබ යම් පුද්ගලයෙක් පිළිබඳ ආයතනයක් පිළිබඳ යම් තොරතුරක් හෙළි කරනවා නම් ඒ තොරතුරේ සත්යය සොයා ගත යුතුයි.”
“ඔබ පළ කරන ප්රවෘත්තිය මතුපිටින් බැලුවත් විමර්ශනය කරලා බැලුවත් දුෂ්ට චේතනාවක් අශිෂ්ට බලාපොරොත්තුවක් තිබේ නම් එය බරපතළ වරදක් හැටියට ඔබ තේරුම් ගත යුතුයි. ”
“සමාජ මාධ්යයෙන් තොරතුරු දැන ගැනීමේ නිදහස අගය කරනවා. ඒ වුණාට වටහාගන්නට ඕනේ මොහොතින් මොහොත එය වර්ධනය කරලා යන පිළිවෙළ අනුව පුද්ගලයන්ට සහ ආයතනවලට නැවත පෙරලා සකස් කරගත නොහැකි මට්ටමේ අපරාධයක් සිද්ධ වෙන බව. මේ රටේ අමාත්යවරයෙක් හැටියටත් පුරවැසියෙක් හැටියටත් එබඳු අශිෂ්ට මාධ්යකරණයක නිරත වෙන්න එපා කියලා කරුණාකරලා ඉල්ලා සිටිනවා.”
