ආණ්ඩුව ඇනගෙන ඇති බවට රටේ ජනතාව තේරුම් ගන්නා කාරණා දෙක්ක ඇති බවත් , අනුර කුමාර දිසානායක ජනාධිපතිවරයා පාර්ලිමේන්තුවට පැමිණ පැයක් දෙකක් කතා කරන්නේ නම් හෝ නාමල් රාජපක්ෂට මඩ ගසන්නේ නම් ඉන් තේරෙන්නේ ආණ්ඩුව ඇනගෙන ඇති බව යැයි ජනතාව දන්නා බවත් පොදු ජන පෙරමුණේ පාර්ලිමේන්තු මන්ත්රී ඩී.වී. චානක අද ( 19) පාර්ලිමේන්තුවේ දී කීවේය.
ඔහු මේ බව කීවේ අද තමන්ගේ නීති උපාධිය හොර උපාධියක් යැයි මේ වනවිට සමාජගත වී ඇති කතාවට පිළිතුරු දෙන ලෙස ඇමති නලින්ද ජයතිස්ස නාමල් රාජපක්ෂ වෙත කළ අභියෝගයට පොදු ජන පෙරමුණ පාර්ශවයෙන් පිළිතුරු දෙමිනි.
මේ රජය තුනෙන් දෙකක බලය ගත් මුල්ම අවස්ථාවේ මෙම නීති උපාධිය සම්බන්ධව කොටුව අංක 01 මහේස්ත්රාත් අධිකරණයේ නඩුවක් ගොනු කර ඇති බව කී මන්ත්රීවරයා එය සම්බන්ධව කිසිම ඉදිරි පියවරක් සිදු නොවෙද්දී වෙබ් අඩවියක පළ කළ පුවත් මුල් කරගෙන ඇමතිවරයා මඩ ගහන බව ඩී.වී.චානක පැවසුවේය.
ඔහු කීවේ මෙම උපාධිය සම්බන්ධව සැකයක් ඇති නම් මේ වනවිට ලන්ඩන් නුවර ඉන්නා අපරාධ පරීක්ෂණ දෙපාර්තමේන්තුවේ නිලධාරීන් උසාවි නියෝගයක් සමග සිටි විශ්වවිද්යාලයට යවා තොරතුරු තහවුරු කර ගත හැකි බවය.
මන්ත්රීවරයා ඒ සම්බන්ධව මෙසේ පැවසුවේය.
“යම් කිසි මඩක් නාමල් රාජපක්ෂ මැතිතුමාට එල්ල කළා. මඩට කලින් නලින්ද ජයතිස්ස මැති තුමා කිව්වා කෑමෙන් පස්සේ හරි ඇවිත් උත්තර දෙන්න කියලා මං දැක්කා කියනවා. අපි කැමති වුනත් නැති වුනත් වෙලාව බෙදිලා යනකොට පොහොට්ටුවට කතා කරන්න වෙන්නෙ කෑමෙන් පසු තමයි. ඒ නිසා ආණ්ඩු පක්ෂයේ සංවිධායකවරයා ලෙස ඔබතුමා ඒක දැනගන්න ඕන.”
“දෙවැනි කාරණාව තමයි නලින්ද ජයතිස්ස මැතිතුමා… හැමදාම ආණ්ඩුව ඇනගන්නවා කියන ප්රධාන කාරණා දෙකක් තියනවා. ඒ දෙකනේ රටේ ජනතාව දන්නවා හොඳටම ආණ්ඩුව ඇනගන්නවා කියන එක.”
“පළවෙනි එක තමයි අනුර කුමාර දිසානායක මහත්තයා පාර්ලිමේන්තුවට දුවන් ඇවිත් පැයක් දෙකක් කතා කරනවා කියන්නේ අනිවාර්යයෙන් ආණ්ඩුව ඇනගෙන. එහෙම නැතිනම් අලුත් මඩක් හදලා නාමල් රාජපක්ෂ මැතිතුමාට ගහනවා කියන්නේ ආයි ආණ්ඩුව හොඳටම ඇණගෙන.”
“දැන් 21 රැස්වීම දැකලා ගැරඬින්ට බූමිතෙල් ගැහුවා වගේ තමයි ඉන්නේ. දැන් ඔබතුමන්ලා ඔය කතාව කියනවා. මේ ආණ්ඩුව ඇවිල්ලා තුනෙන් දෙක ආපු ගමන්ම ඔබතුමන්ලා ඔය කතාව කිව්වා. ඔය ලෝ ඩිග්රි එක ගැන කතා කළානේ… ඒ වෙලාවේ ඔබතුමන්ලා නිකම් හිටියෙ නෑනේ. උසාවියට ගිහින් මැජෙස්ට්රේට් කෝට් නම්බර් 01 එකේ දාලා තියනවා P42852/01/25 යටතේ නඩුවක් දාලා තියනවා නාමල් රාජපක්ෂ මැතිතුමාගේ ඒ උපාධිය පිළිබඳව. ඒ වගේම නීති උපාධිය පිළිබඳව.”
“අනේ හරි සරල කාරණාවක් නලින්ද ජයතිස්ස මැති තුමා කියන්නේ. අර හොර වෙබ් සයිට් හදාගෙන ඒවට නඩු දාන්න පුලුවන් විදිහට ඒවයින් මඩ ගහනවා වෙනුවට නලින්ද ජයතිස්ස මැති තුමා හෙට යන්න සීඅයිඩී එකට… දෙන්න මේ කරුණු ටික. එතකොට උසාවියට වාර්තා කරන්න පුලුවන්.”
“ආපු ගමන් මාධ්ය සංදර්ශන දාලා මැජෙස්ට්රේට් 01 එකට ගියා විතරයි. අද වෙනකම් නාමල් රාජපක්ෂ මැති තුමාගේ කට උත්තර ගත්තා විතරයි… අද වෙනකම් අධිකරණයට කරුණු වාර්තා කරලා නෑ. හැබැයි වැටෙන වැටෙන සැරේට පාර්ලිමේන්තුවට ඇවිත් මඩ ගහනවා.”
“දැන් අර ලන්ඩන් ගියා නේද පස් දෙනෙක්. පස් දෙනෙක් ඉන්නවා ලන්ඩන්. යන්න සිටි යුනිවර්සිටි එකට. ගිහින් ගන්න තොරතුරු ගන්න… උසාවි නියෝගයක් යැව්වා නම් එහෙට ඔය සෙටිෆිකට් එකත් ගන්න පුලුවන්. ඒක සරලවම කරන්න පුලුවන් කාරණයක්. ෆේල් වෙනකොට මඩ ගහන එක නම් එච්චර හොඳ නෑ. ”
මන්ත්රීවරයා පැවසුවේය.
