“අපි දෙන්න තමයි ලෝකෙ හිටිය ආදරනීයම යුවල…විවාහ වෙලා අවුරුදු නවයක් ගෙවුනත් අපි ජීවත් වුනේ පුදුම ආදරේකින්……මං ජොබ් එක කරන්නෙ මුලතිව් වල…විජය පාබල රෙජිමේන්තුවේ… මං හැමදාම කෑම කන්න කලින්..සුදු මැණිකේ යි දරුවො දෙන්නයි.. කෑවද අහනවා…ඊයේ ත් මං එයාට කෝල් කරල කෑම කන්න හදන්නෙ කීවා … මගෙ දෙය්යෝ පරිස්සමින් ඉන්න කියල ත් එයා මට කීවා …. එහෙම කතා කරපු මගෙ රත්තරං පැය භාගයක් යන්න කලින් පොඩි පුතත් එක්ක නොයෙන්නම ගියා කියල මට ආරංචි වුනාම මං දරාගන්නෙ කොහොමද දෙයියනේ ……” යනුවෙන් විලාප තබමින් වේදනාවෙන් කෑ ගැසුවේ පහළ බළල්ල පදිංචි ආරිය සිරි ප්රියදර්ශන කුරුවිටය..
ඔහු, ඊයේ දින පහළ බළල්ලේ දී කැබ් රථයකට යට වී මිය ගිය ඊ.එම්.අයිරාංගනී ඒකනායක ගේ ස්වාමිපුරුෂයා ය…දනුෂ්ක යොහාන් ගේ පියාය.
“අනේ මගෙ රත්තරං පුතා මට කතා කරල කීවා ෆෝන් එක ට ඩේටා කාර්ඩ් එකක් දාන්න කියල… මං ඒක කරල ඉවරවෙද්දි එයා මේ ලෝකෙ නෑ … මට කීවා නිවාඩු එද්දි සෙල්ලම් ටිපර් එකක් ගේන්න කියල …. ඒත් මගෙ රත්තරං පුතා … නොඑන්නම ගියා…. මගෙ සුදු මැණිකේ ඊයේ දවල් ගමේ යාලුවො හැමෝම බලන්න ගියා කියල මට කීවා …. අනේ දෙයියනේ … මට මේක දරාගන්න බෑ “යැයි කියමින්..ඔහු තව දුරටත් හඬා වැලපුනේය.
මියගිය අයිරාංගනී ගේ මාමන්ඩිය (ස්වාමිපුරුෂයා ගේ පියා) වන සුනිල් කුරුවිට හඬා වැලපෙමින් මෙසේ කීවේ ය…..
“කෙල්ල දරුවො එක්ක ඉන්නේ අපේ ගේ ළඟම හදාගත්ත ගෙදරක… බිත්තර ගේන්න යනවා කියල ගෙවල් ඉස්සරහ ම තියෙන කඩේට ගියේ… කෙල්ල දරු පැටියත් වඩාගෙන ආපහු එනවා මං බලාගෙන හිටියේ… ගෙදර ට අඩි දෙක තුනක් තියෙද්දි ඇහි පිල්ලම් ගහන වේගෙට වුන දේ මට හිතාගන්න බැරි වුනා… “.දඩාස් ” සද්දෙට මට තරු පෙනුනා… වේගෙන් ආව කැබ් එකක් පාර අයිනෙන් ආව කෙල්ල යි දරු පැටියයි යට කරගෙන ගියා…. මීටර පනහක් ඈතට දෙන්නව ඇදිල ගියා… මං කෑගහගෙන ගිහින් … කෙල්ල දෝතට ගත්ත .. එතකොට ත් ඒකිගෙ පණ ගිහින් …
අනතුර සිදුකළ කැබ් රථය දුම්රිය දෙපාර්තමේන්තුව ට අයිති එකක් වන අතර අනතුර සිදුවන මොහොතේ කැබ් රථයේ දොලොස්දෙනෙක් සිට ඇත. සිදුවීමෙන් කෝපයට පත් ප්රදේශයේ තරුණ කැළ කලහකාරී ලෙස හැසිරීම නිසා කැබ් රථයේ රියදුරු හා තවත් තුන් දෙනෙක් පලා ගොස් ඇත. එසේ පලා ගොස් අනුරාධපුර ශික්ෂණ රෝහලේ ප්රතිකාර ගනිමින් සිටියදී ඔවුන් අත් අඩංගුවට ගත් බව මහව පොලිසියේ රථ වාහන් අංශයේ ස්ථානාධිපති රත්නායක ලංකාසර ට පැවසුවේ ය .රියදුරු බීමත්ව සිටි බවටද තොරතුරු ඇති බව ඔහු තව දුරටත් පැවසුවේ ය…
ඒ බීමත් අවිනීත නොමිනිසා අසරණ කැදැල්ලක් සුණු විසුණු කර තිබිණි. මනුෂ්ය ජීවිතයට ගරු නොකරන අනීතික ලෝකයක ජීවිතය යනු මරණය හා සමානය. මේ අම්මාත් කිරිකැටියාත් ජීවිතවලින් වන්දි ගෙවා අපට කියා තිබුණේ ඒ කතාවය.
