දිනසේන රතුගමගේ –
ස්වාධීනව තරග කොට යාපනය දිස්ත්රික්කයෙන් පාර්ලිමේන්තුවට තේරී පත් වූ රාමනාදන් අර්ජුනා මන්ත්රීවරයා මන්ත්රී බලතල භාවිතා කරමින් යාපනය ශික්ෂණ රෝහලට කඩා වැදී රෝහලේ වෛද්යවරුන්ට කාර්ය මණ්ඩලයට බැණ වදිමින් පහර දීමට උත්සාහ කළ බවට ඊයේ (09) යාපනය පොලීසියට පැමිණිල්ලක් ඉදිරිපත් වී තිබේ.
එම පැමිණිල්ල යොමු කොට ඇත්තේ යාපනය ශික්ෂණ රෝහලේ අධ්යක්ෂ පී.සත්යමූර්ති විසිනි. යාපනය පොලීසිය ප්රකාශ කළේ එම පැමිණිල්ලට අනුව පරීක්ෂණ ආරම්භ කොට ඇති බවය.
මේ මන්ත්රීවරයා වෛද්යවරයෙකු වන අතර ඔහු චාවකච්චේරිය රෝහලේ වැඩ බලන අධ්යක්ෂවරයා ලෙස කටයුතු කළ කාලයේදී රෝහල තුළ දැඩි නොසන්සුන් තත්වයක් ඇති කිරීමේ චෝදනාව මත ඔහුට එරෙහිව පැමිණිලි කීපයක්ම දමා තිබුණි.
අනතුරුව අධිකරණය හමුව පෙනී සිටින ලෙසටද ඔහුට නියෝග ලැබුණි. එම සිද්ධියෙන් පසුව මන්නාරම රෝහලටද රාත්රී කාලයේ බලහත්කාරයෙන් කඩා වැදී රෝහලේ වෛද්යවරුන්ට හා කාර්ය මණ්ඩලයට පහර දීමට උත්සාහ කළේය. ඊට එරෙහිවද පැමිණිලි කීපයක් යොමු වීම මත ඔහුට මන්නාරම අධිකරණයේද නඩු පැවරුණි.
පාර්ලිමේන්තුවට තේරී පත් වී එහි ගිය මුල්ම දිනයේ විපක්ෂනායකවරයාට වෙන් වූ ආසනයේ බලහත්කාරයෙන් වාඩි වී එහිදීද මේ මන්ත්රීවරයා විශාල කලබැගෑනියක් ඇති කළේය. ඉන් පසුව එල්.ටී..ටී.ඊ සංවිධානයට පක්ෂපාතීව ප්රකාශයක් කිරීම නිසා පොලිස් අපරාධ පරීක්ෂණ දෙපාර්තමේන්තුව ඔහුගෙන් ප්රකාශයක් ලබා ගැනීමටද පියවර ගෙන තිබේ.
මෙවර යාපනය ශීක්ෂණ රෝහලට ඔහු කඩා පැන ඇත්තේ මන්ත්රී බලතල පෙන්වා රෝහලේ ආරක්ෂක නිලධාරීන්ටද තර්ජනය කරමිනි. බලහත්කාරයෙන් රෝහල තුළට කඩා වැදුණු ඔහු හමු වූ සියලුම වෛද්යවරුන්ට හා රෝහල් කාර්ය මණ්ඩලයට බැනවදිමින් පහර දීමට තැත් කොට ඇති අතර රෝහල් පාලනය නිර්දය ලෙස විවේචනය කරමින් කෑ කෝ ගසා ඇත.
