අපොස සාමාන්ය පෙළ විභාගයේ ගණිතය ප්රශ්න පත්රයේ මුල් කොටසට පිළිතුරු ලියා දෙවැනි ප්රශ්න පත්රයට මුහුණ දීමට සූදානම් වෙමින් සිටි කටුගස්තොට ශාන්ත අන්තෝනි විද්යාලයේ සිසුවෙකුට විදුහලේ ආපන ශාලාව තුළ දී විකට් කූරු, උණ බට වලින් පහර දී බලපතල තුවාල කළ ළමා මැරයින් 06 දෙනා අද කටුගස්තොට පොලිසිය විසින් අත්අඩංගුවට ගත්තේය.
දැඩි කම්පනයකින් යුතුව තුවාල සහිතව මෙසේ රෝහල්ගත කළේ මහනුවර ශාන්ත අන්තෝනි විද්යාලයේ ඒ.ඩී.ඩබ්ලියු.ඩී. දුලාර විජේසුන්දර නැමැති 16 හැවිරිදි දරුවෙකි.
තුවාල ලත් සිසුවා සමඟ එකම පන්තියේ අධ්යාපනය ලැබූ මෙවර සාමාන්ය පෙළ විභාගය සඳහා එකට පෙනී සිටි සිසු පිරිසක් මෙම සිසුවාට උක්ත පහරදීම සිදු කර තිබිණි.
දරුවා මහනුවර ජාතික රෝහලට ඇතුළත් කරනු ලැබූ අතර ගණිතය 2වැනි ප්රශ්නපත්රයට පිළිතුරු ලිවීමේ අවස්ථාව ඔහුට අහිමි වූයේය. තවමත් සිසුවා ඉන්නේ ප්රතිකාර මට්ටමේය.
ප්රතිකාර මට්ටමේ සිටිමින් එම සිසුවා අද (08) මහනුවර ජාතික රෝහල ආසන්න පාසලක සාමාන්ය පෙළ විභාගයේ අවසන් ප්රශ්න පත්රයට පෙනී සිට තිබිණි.
සැකකාර සිසුන් අත්අඩංගුවට ගැනීමට විභාගය අවසන් වනතුරු ඉක්මන් නොවූ පොලිිසය අද විභාගය අවසන් වීමට පෙර ශාන්ත අන්තොනි විද්යාලය අසල අද උදේ සිට පොලිස් රැකවල් තර කර විභාගය අවසන් වූ පසු පාසල තුළට ගොස් සැකකාර සිසුන් 06 දෙනෙක් අත්අඩංගුවට ගෙන තිබිණි.
තවත් සිසුන් දෙදෙනෙක් අත්අඩංගුවට ගැනීමට අවශ්යව සිටින බව ද පොලිසිය පවසයි. අත්අඩංගුවට ගත් සිසුන් හෙට (09) මහනුවර මහේස්ත්රාත් අධිකරණයට ඉදිරිපත් කිරීමට නියමිතව ඇත.
