රටේ, ජනතාවගේ යහපත වෙනුවෙන් කටයුතු කරන ලෙස දේශපාලඥයන් හට විවිධ අවස්ථාවල කොතෙක් අවවාද අනුශාසනා සිදුකළද ඔවුන් එය කිසිදු විටක මායිම් නොකිරීම කනගාටුවට කරුණක් බව මල්වතු මහා විහාර පාර්ශ්වයේ මහා නායක අතිපූජ්ය තිබ්බටුවාවේ ශ්රී සුමංගල නාහිමිපාණන් වහන්සේ පවසති.
ඒකාබද්ධ තැපැල් වෘත්තිය සමිති පෙරමුණේ නියෝජිත පිරිසක් අද ( 08 ) නාහිමියන් බැහැදැක සංදේශයක් භාර දුන් අවස්ථාවේ උන්වහන්සේ ඉහත අදහස් පළ කළහ.
සංදේශයක් බාර දෙමින් තැපැල් වෘත්තිය සමිති නියෝජිතයන් නාහිමි හමුවේ පවසා සිටියේ ජනාධිපතිතුමන් ඉතාමත් අත්තනෝමතිකව නුවරඑළිය හා මහනුවර ඉපැරණි තැපැල් සංකීර්ණ ඉන්දියානු හොටල් සමාගමකට විකිණීමට උත්සාහ කරන බැවින් එම උත්සාහය වැළැක්වීම සඳහා නාහිමියන්හට මැදිහත් වීමක් සිදු කරන ලෙසය.
දැඩි පුරාවිද්යාත්මක වටිනාකමින් යුත් වසර 200කට වඩා පැරණි මෙම ගොඩනැගිලි මේ වන විටද සංචාරකයන්ගේ දැඩි ආකර්ෂණයට ලක්ව පවතින බැවින් එම ගොඩනැගිලි තැපල් දෙපාර්තමේන්තුව සන්තකයේ තබා ගනිමින්ම සංවර්ධනය කිරීම සම්බන්ධයෙන් යෝජනා මාලාවක් තම වෘත්තීය සමිති විසින් රජයට ලබාදී තිබුණද ඒ පිළිබඳව කිසිදු අවධානයක් යොමු නොකරන ජනපතිවරයා රටේ සම්පත් මේ ආකාරයෙන් විකිණීම කිසිසේත්ම අනුමත කළ නොහැකි බවද වෘත්තීය සංගම් නියෝජිතයෝ නාහිමි හමුවේ පැවසූහ.
මෙහිදී තවදුරටත් අදහස් පළ කළ මල්වතු මහ නාහිමියෝ මෙසේද පැවසූහ.
වත්මන් ජනාධිපතිතුමා අග්රාමාත්යවරයා වශයෙන් කටයුතු කළ 2018 වසරේදීත් නුවරඑළිය තැපැල් කාර්යාල ගොඩනැගිල්ල විකිණීම සම්බන්ධයෙන් අවධානය යොමුවුණා අපට මතකයි. අපි දැක්කා විදේශිකයෝ පවා මේ පෞරාණික ගොඩනැගිල්ල විකුනනවාට එරෙහිව අදහස් පළ කරනවා. විරෝධතා පවත්වනවා.
විවිධ ගැටලුවලදී රටේ, විශේෂයෙන් ජනතාවගේ යහපත උදෙසා කටයුතු කරන්නැයි මහා සංඝරත්නය වශයෙන් අප කොතෙක් අනුශාසනා කළද බොහෝ දේශපාලනඥයන් ඒ පිළිබඳව අවධානය යොමු නොකිරීම කණගාටුවට කරුණක්.
අප කොතෙක් අනුශාසනා කළ ඒ අය ඒ අයට අවශ්ය ගමන යන්න තමයි උත්සාහ කරන්නේ.
මහා සංඝ රත්නය වශයෙන් අප මේ පිළිබඳව ඔවුන් දැනුවත් කළත් පලක් වේවිද කියලා කියන්න බෑ. වරායට, “ත්රී කුණාමලයේ තෙල් ටැංකිවලට උනෙත් ඔය දේම තමයි. නුවරඑළියෙ තවත් ඉඩ තියෙන තැනක තැපැල් කන්තෝරුව වගේ ආකෘතියට හෝටලයක් හදලා සංචාරකයෝ ගෙන්නන්න පුළුවන්නේ” යනුවෙන් සඳහන් කළ නා හිමියෝ ලංකාව පුරා පිහිටි පෞරාණික තැපැල් ගොඩනැගිලි සියල්ලම විකිණීම සඳහා රජය කටයුතු කරන්නේ දැයි වෘත්තීය සමිති නියෝජිතයන්ගෙන් විමසා සිටියහ.
වෘත්තීය සමිති නියෝජිතයෝ මෙහිදී සඳහන් කළේ එම සියලු පෞරාණික ගොඩනැගිලි මෙන්ම රටේ සම්පත් රැසක් අලෙවි කිරීම සඳහා මේ වන විට රජය පිඹුරුපත් සකසමින් සිටින බවය.
නාහිමි බැහැදැකීමෙන් අනතුරුව මාධ්ය හමුවේ අදහස් පළ කළ ඒකාබද්ධ තැපල් වෘත්තීය සමිති පෙරමුණේ සම කැඳවුම්කරු සම්පත් ශ්රී ලියනගේ කියා සිටියේ ජනාධිපතිතුමාගේ මෙම අත්තනෝමතික කටයුතුවලට එරෙහිව තැපල් දෙපාර්තමේන්තුව ඉදිරියේදී අඛණ්ඩ වෘත්තීය ක්රියාමාර්ගයකට පිවිසීමට බලාපොරොත්තු වන බවය.
ඒ සඳහාද ජනපතිතුමන් නම්යශීලීභාවයක් නොදක්වන්නේ නම් සමස්ත රාජ්ය යාන්ත්රණය ඒකාබද්ධ කොට දැවැන්ත වෘත්තීය ක්රියා මාර්ගයකට එළඹීමට හෝ පසුබට නොවන බවද හෙතෙම වැඩිදුරටත් පැවසුවේය.
