ශ්රියානි විජේසිංහ –
අනවශ්ය ලෙස ලබා දෙන ප්රතිජීවක ඖෂධයන් නිසා එම ඖෂධවලට වෛරස ප්රතිචාර නොදක්වන විට රෝග සුවකර ගැනීමට නොහැකි තත්ත්වයක් උද්ගත වීමේ ප්රවණතාවක් ඇතිවීමෙන් ලෝකයම බලවත් සෞඛ්ය තර්ජනයකට මුහුණ දෙමින් පවතින බව සෞඛ්ය අමාත්යංශය සඳහන් කරයි.
මෙහි ප්රතිඵලයක් ලෙස මරණ අනුපාතයද ඉහළ යාමට හැකි බව ප්රතිජීවක ප්රතිරෝධය වැළැක්වීම පිළිබඳ ජාතික කේන්ද්රස්ථානයේ ප්රධානී නියෝජ්ය අධ්යක්ෂ ජනරාල් (රසායනාගාර සේවා) වෛද්ය ප්රියන්ත අතපත්තු සඳහන් කරයි.
ප්රතිජීවක ඖෂධ අනිසි භාවිතය හේතුවෙන් 2019 වසරේ සිදු වූ මරණ ගණන මිලියන 1.27 ක් ලෙස අනුමාන කර තිබුණ ද සත්ය වශයෙන්ම සිදු වූ මරණ ගණන මිලියන 4.95 ක් වන බව සංඛ්යාලේඛන වාර්තා කර තිබේ.
මෙම ප්රවණතාවය අවම කිරීම සඳහා කඩිනම් ක්රියාමාර්ග නොගතහොත් වසර 2050 වන විට ප්රතිජීවක ඖෂධ අනිසි භාවිතය හේතුවෙන් වාර්ෂිකව මිලියන 10 ක ජනතාවක් මිය යනු ඇතැයි අනුමාන කෙරේ.
ප්රතිජීවක ඖෂධ අනිසි භාවිතය හේතුවෙන් මරණයට හා ආබාධිත තත්වයට පත්වීම, රෝගී තත්වය සුව නොවී දිගටම පැවතීම හේතුවෙන් දිගුකාලීනව රෝහල් ගතවී වීමට සිදුවීම, මිල අධික ඖෂධවල අවශ්යතාවන් ඇතිවීම ආදී කරුණු නිසා දරුණු ආර්ථික අර්බුදයන්ට සමාජීය වශයෙන් ජාතීන්ට මුහුණ දීමට සිදුවනු ඇති බව ද පුරෝකථනය කර ඇත.
දැනට සිදුකරන අනුමාන කිරීම්වලට අනුව 2030 වන විට ප්රතිජීවක අනිසි භාවිතය හේතුවෙන් මිලියන 24 ක පමණ ජනතාව අන්ත දරිද්රතාවයට පත්විය හැකි බව පැවසේ. තවද, 2050 වන විට, ප්රති-ක්ෂුද්ර ජීවී ඖෂධ ප්රතිරෝධයේ බලපෑම හේතුවෙන් මිල අධික ඖෂධ හා දැඩි සත්කාර සේවා සම්බන්ධ වියදම් වැඩිවී වසරකට ඩොලර් ට්රිලියන 1.2 ක අතිරේක සෞඛ්ය වියදමක් දැරීමට ලෝකයට සිදුවිය හැකි බවට ද අනුමාන කෙරේ
ශ්රී ලංකාවේ ප්රති-ක්ෂුද්ර ජීවී ඖෂධ පරිභෝජනය දියුණු රටවලට වඩා බෙහෙවින් වැඩිය. එපමණක් නොව පෞද්ගලික අංශයේ ප්රති-ක්ෂුද්ර ජීවී ඖෂධ භාවිතය රාජ්ය අංශයේ මෙන් දෙගුණයකි.
ලෝක ප්රති-ක්ෂුද්ර ජීවී ඖෂධ ප්රතිරෝධය පිළිබඳව දැනුවත් කිරීමේ සතිය – 2025 වෙනුවෙන් පැවැත්වෙන ජාතික උත්සවය හෙට (14) සෞඛ්ය හා ජනමාධ්ය අමාත්යවරයාගේ ප්රධානත්වයෙන් කොළඹ කිංග්ස්බරි හෝටලයේ දී පැවැත්වීමට සෞඛ්ය හා ජනමාධ්ය අමාත්යාංශය කටයුතු යොදා ඇත.
ලෝක ප්රති-ක්ෂුද්ර ජීවී ඖෂධ ප්රතිරෝධය දැනුවත් කිරීමේ සතිය – 2025 (World Antimicrobial Resistance Awareness Week – WAAW- 2025) නොවැම්බර් 18 සිට 24 දින දක්වා යෙදී ඇත.
