තොණ්ඩමන් මිය ගියේය. මිය ගිය තොණ්ඩමන් ජීවත් වී සිටි දිරාපත් තොණ්ඩමන්ට වඩා හොඳින් මාර්කට් කළ හැකිය. රටේ වලංගු නීතිය තුට්ටුවට දමමින් මේ මෙහොත වනවිට තොණ්ඩමන්ගේ මිනිය මාර්කට් වෙමින් තිබේ.
වෙනස් වුණු සංස්කෘතිය
මේ වසංගත සමය අපට අපේ සියලුම සංස්කෘතික සම්බන්ධතාවල ස්වරූපය වෙනස් කරන්නට නියම කළේය. ඒ නියමන් පෙළ ගැසුනේ සෞඛ්‍යය පිළිවෙතක අනිවාර්ය අංග ලෙසිනි. ජීවිතය සඳහා වූ මේ සෞඛ්‍යයය පිළිවෙත රටම එක් දිශානතියකට යොමු කළේය. මිනිස්සු ඒ අවස්ථා ගෞරවයෙන් පිළිගත්හ.
මිනිස්සු ස්වකීය සංස්කෘතික සම්ප්‍රදාය වෙනස් කළහ. එක බත්පත බෙදාගෙන කෑ උන් සමාජ දුරස්ථ භාවය ආරක්ෂා කළහ. ගෙදරට හාල් තුන පහ ගෙනෙන්නට ඇති මුදලින් මුඛ ආවරණ ගෙන පැළඳුහ. දෑත් පිරිසිදු කිරීම සඳහා විෂබීජ හරණ දියර අධික මිල ගණන්වලට මිල දී ගත්හ. කඩයක්ට ගොඩවන විටත් දෑත් සෝදා පිරිසිදු කළහ. මේ නියමන් පුරුදු වූයේ තමන් වෙනුවෙන් නොව, අනිකා ගේත් සමාජයේත් සෞඛ්‍ය වෙනුවෙන් ය.
කුඩුපට්ටම් විය හැකි ආර්ථිකයට වඩා මිනිස්සුන්ගේ ජීවිත වටිනාකමට බරක් තැබූ ආණ්ඩුවේ මානුෂවාදී ඉලක්කය සාධනය කර ගත්තේ ආරක්ෂක හා සෞඛ්‍ය අංශ කළ අප්‍රමාණ කැපවීම මතු නොව, මිනිසුන් අතිමහත් බහුතරය ප්‍රකට කළ ශික්ෂණය නිසාය. පෙට්ටිකඩ කාරයාගේ සිට එදා වේල සොයාගත් අහිසංක කුලී කරුවන්ගේ සිට මහා පරිමාණ ව්‍යාපාරිකයා දක්වා ආර්ථිකව නොසිතූ ලෙස බිඳ වැටුණි. රටේ අසරණ මිනිසුන්ගෙන් අඩක් කුසගින්නේ පීඩිතව මුවින් නොබැන ඉවසූහ. තවමත් ඉවසති. ඒ උවදුරු සමයක මිනිසුන් ලෙස ප්‍රගුණ කළ ශික්ෂණයේ ස්වරූපය ය. එමෙන්ම මහජන සෞඛ්‍ය ආරක්ෂාව වෙනුවෙන් රටේ නීති සම්පාදනය විය. නෛතික ගැටලු තිබුණත් මේ නීතිමය ප්‍රවේශ පිළිබඳ කිසිවෙක් ප්‍රශ්න කළේ නැත. පොලිසිය ඇඳිරි නීති බලපත් නිකුත් කළේය. ඇඳිරි නීතිය සමයේ එම බලපත්‍රයක් නැතිව මහ මගට බට විට එක්කෝ හිරේ විලංගුවේ වැටුනහ. ඇතැමෙක් නිරෝධායන මධ්‍යස්ථානවලට යොමු කළහ. වාහන ලක්ෂයකට ආසන්න ප්‍රමාණයක් පොලිස් අත්අඩංගුවට ගැනුණි. නිරෝධායන ඇඳිරි නීතිය කඩකළාහු දණ්ඩනයට යටත් වූහ. රන්ජන් රාමනායකලා හිරේ විලංගුවේ වැටුනේ නිරෝධායන ඇඳිරි නීතිය කඩ කරන්නට ගොසිනි.
මුස්ලිම් මිනිස්සු ස්වර්ගයට යෑම පසෙක තබා ස්වකීය ඥාතීන්ගේ මල සිරිරු පිලිස්සූහ. සමීප ඥාති මිත්‍රාදීන්ගේ සහභාගීත්වයෙන්වත් තොරව මහජන සෞඛ්‍යය නිලධාරීන්ගේ හා පොලිසියේ විධි නියමන්ටය අනුව මේ කාලයේ මැරුණු මිනිස්සු අවසන් ගමන් ගියහ. මිනිය වළලන දිනය තීරණය කළේ පොලිසිය ය. මලගෙදර දොරටුව ලඟ හිඳිමින් එකා දෙන්නා මිනිය දකින්නට යවා ජනතාව පාලනය කළේ පොලිසිය ය. පොලිස් නියමයට අනුව එක් දිනක් තුළ අවසන් කටයුතු කිරිමට නියම කළ සිය පියාගේ මලගෙදරට දිස්ත්‍රික්ක දෙකක් පසුකර යෑමට නොහැකි වූ මිනිසුන් ගැන අසන්නට ලැබිණි. නිරෝධායන නීති කඩ කරමින් සිය දියණියගේ මිනිය දකින්නට නොපැමිණි පියෙකුගේ සමාජ ශික්ෂණය ගැන වාර්තා විය.
අතිශය ඉහළ බැඳීම් සහිත ලාංකික සමාජයේ මිනිසුන් මරණය ඉදිරියේ පවා පැනවෙන දැඩි නෛතික බලකිරීම මුවින් නොබැන ඉවසූහ. කොවිඩ් වසංගතය මේ රටින් මෙපමණ දුරු කිරීමට රජය, සෞඛ්‍ය අංශ මතු නොව, මෙවැනි මිනිසුන්ගේ අප්‍රමාණ කැප කිරීම්ය.
මාරක කෙළිය
එහෙත් ඒ විශිෂ්ට කැප කිරීම්හි ස්වරූපය, රටක් ලෙස අප්‍රමාණ ආර්ථික බිඳ වැටීම් හමුවේ ලබා ගත් ජයග්‍රහණය නොපැසුණු ළදරු වෙකුගේ අශිෂ්ට, අශික්ෂිත දේශපාලනය වෙනුවෙන් කුඩු පට්ට්ම් කිරීමට දී බලාගෙන සිටින ආණ්ඩුව අප තුළ උපදවන්නේ මවිතයකි.
මේ රටේ නීතිය අපට මෙන්ම තොණ්ඩමන්ටත් වලංගුය. තොණ්ඩමන්ගේ පුතාටත් වලංගුය. තොණ්ඩමන්ගේ පුතා සිය පියාගේ අවසන් කටයුතු කරන්නේ තමිල්නාඩුවේ නොව තලවාකැලේය. මේ වනවිට නුවරඑළිය දිස්ත්‍රික්කයට ඇඳිරි නීතියය. එහෙත් ඒ විධි නියමන් තලවකැලේ දී තුට්ටුවකට මායිම් වන්නේ නැත.
නුවරඑළියට ඇඳිරි නීතිය දාන්නේ තොණ්ඩමන්ගේ දේහය තලවාකැලේට ගේන්නටත් පෙරය. එය ගෙනා මොහොතේ මේ දක්වා සිට සියලුම නිරෝධායන නීති උල්ලංඝණය කෙරෙන බව නුවර එළිය දිස්ත්‍රික්කයේ සෞඛ්‍ය වෛද්‍ය අංශ අපට කියන්නේය. ඔවුන් මේ සම්බන්ධව සෞඛ්‍ය අමාත්‍යංශටය කළ පැමිණිල්ලි පිළිබඳව සොයා බලා අවශ්‍ය පියවර ගැනීමට ඊයේ පෙරවරුවේ රැස් වූ සෞඛ්‍ය ඇමතිනිය ප්‍රමුඛ සෞඛ්‍ය අංශයේ ඉහළම නිලධාරීන් මේ අවස්ථාවේ නිරෝධායන නීති හැකි උපරිමයෙන් ක්‍රියාත්මක කිරීමට තීන්දු කර ඇත්තේය.
එහෙත් මේ කිසිම නීතියක් නොසලකන ජිවන් තොණ්ඩමන් විසින් පන්දහසකට අධික පිරිසක් රැස් කර හෙට (31) අවමංගල්‍ය උත්සවය පැවැත්වීමට කටයුතු සංවිධානය කරමින් හිඳීන්නේය. ඒ සම්බන්ධව ඔහුව දැනුවත් කරන රටේ සෞඛ්‍ය සේවා අධ්‍යක්ෂ ජනරාල්ට ඔහු කියන්නේ මේසේය.
“ ඔබගේ සමාජ දුරස්ථ භාවය ඔබ තියාගන්න… මට මිනිසුන් අවශ්‍යයි. පියා සිටියේ මිනිසුන් සමගයි. මිනිසුන් නොගෙන්වා අවමංගල්‍ය උත්සලවය පැවැත්වීමට මා සූදානම් නෑ…“
ජීවන් තොණ්ඩමන්ගේ මේ ප්‍රකාශය ගැන එක් අතකින් කලබල විය යුතු නැත. රටේ නිතී සම්පාදනයකරන පාර්ලිමේන්තුවේ දී රටේ ජනාධිපති, අගමැති, විපක්ෂ නායක, හිටපු කතා නායක, ඇතුළු දේශපාලකයන් රටට වලංගු කර තිබූ නිරෝධායන නීතිය කඩා දැමූහ. එතැන් සිට මේ මෘත දේහය රට වටේ ගෙන ගොස් නුවරඑළියට ගෙනැවිත් ඇත්තේය. අනිල් ජාසිංහ නිරෝධායන නීති කියා දෙන්නට යන්නේ එවැනි මලමගුලකටය.
ඒ කෙසේ වෙතත් මේ මිය ගිය මිනිසා ගෞරවණීය ලෙස අවසන් ගමන් යා යුතුය. ඒ ගෞරවය නිර්මාණය වන්නේ මිනියක් වෙන්දේසි කරමින් දේශපාලනය කර නොවේ. රටේ වලංගු නීතියට ගෞරව කරමින් ආදර්ශයක් ලබා දීමෙනි.
ජීවන් තොණ්ඩමන් දේශපාලනයට එන්නට තෝරාගත් ප්‍රවේශයම අශිෂ්ටය. අනීතිකය. කොටින්ම කුජීතය. මරණයකදීවත් ගෞරවනීය අවසානයක් ලබා ගැනීමට මිනිසෙක් පින් කළ යුතුය. ඒ අතින් බලනවිට ආරුමුගම් තොණ්ඩමන් පවුය. බූරු පුතුන් ජාතක කළ පියවරුන්ට අත්විය හැකි සෝචනීය අත්දැකීම ලබමින් මේ කම්කරු නායකයා අවසන් ගමන් යන්නේය
Discussion about this post