කපිල කේ. හීනටියන –
වෙනිසියුලානු ජනාධිපති නිකොලස් මදුරෝ සහ ඔහුගේ බිරිය සිලියා ඇඩෙලා ෆ්ලෝරස් මේ වනවිට ඉනනේ එක්සත් ජනපදයේ බෘක්ලින්හි මෙට්රොපොලිටන් රැඳවුම් මධ්යස්ථානයේ ය. රජයේ ගුවන් යානයක් මදුරෝ සහ ඔහුගේ බිරිඳ සිලියා ෆ්ලෝරස් රැගෙන නිව්යෝර්ක් නගරයට උතුරින් පිහිටි ස්ටුවර්ට් ජාත්යන්තර ගුවන්තොටුපළට රැගෙන විත් එතැනින් රැඳවුම් කඳවුර වෙත රැගෙන ගොස් තිබේ.
ශිෂ්ඨ ලෝකය පිළිකුල් කරන මෙහෙයුමකින් අනතුරුව ඊයේ (03) ඇමරිකා එක්සත් ජනපදයේ ජනාධිපතිවරයාගේ නියෝග මත නිකොලොස් මධුරෝ අත් අඩංගුවට ගෙන ඇමරිකා එක්සත් ජනපදය වෙත රැගෙන එන්නේය. එම මෙහෙයුමෙන් මධුරෝ අත් අඩංගුවට ගන්නා ආකාරය ට්රම්ප් සජීවීව නරඹන්නේය.
ලෝකය මහා විශාල බලයක් හමුවේ සිටින්නේ නපුංසක වෘතයෙන්දැයි සිතේ. මේ වනවිට ට්රම්ප් තම Mar-a-Lago සමාජ ශාලාවේ පැවති ප්රවෘත්ති සාකච්ඡාවකදී පැවසුවේ මධුරෝ අත් අඩංගුවට ගත් මෙහෙයුමෙන් පසු නිශ්චිත කාලයක් සඳහා එක්සත් ජනපදය වෙනිසියුලාව පාලනය කරන බවය. මේ වනවිට තම තෙල් සමාගම් හරහා ඩොලර් බිලියන ගණනක් වැනිසියුලාවේ ආයෝජනය කරන සැලසුම ද ට්රම්ප් විසින් ප්රකාශ කර තිබේ.
අප ජීවත් වෙන්නේ එවැනි ලෝකයකය. මේ වනවිට ට්රම්ප්ගේ අධිකරණය මධුරෝට සහ සිලියාට නව චෝදනා පත්රයක් ඉදිරිපත් කර තිබේ. ඔවුන් මෑන්හැටන් ෆෙඩරල් අධිකරණයක මූලික පෙනී සිටීමට නියමිතය. එතෙක් ඔවුන් දෙදෙනා මෙට්රොපොලිටන් රැඳවුම් මධ්යස්ථානයේ රඳවාගෙන ඇත.
“ඔපරේෂන් ඇබ්සොලූට් රිසෝල්ව්” ලෙස හඳුන්වමින් ඇමරිකානු ඩෙල්ටා බලකා විසින් අල්ලාගත් මධරෝ සහ සිලියා මුලින්ම රැගෙන එන්නේ එක්සත් ජනපදයේ ස්ටුවර්ට් එයාර් ජාතික ආරක්ෂක කඳවුරට පැමිණියේය. පසුව සන්නද්ධ ආරක්ෂාව යටතේ ඔවුන් දෙපළ බෘක්ලීන් වෙත රැගෙන ආවේය. එක්සත් ජනපද බලධාරීන් සහ මාධ්ය ආයතන විසින් නිකුත් කරන ලද පින්තූරවල මදුරෝ ෆෙඩරල් නියෝජිතයන් විසින් රැගෙන යන ආකාරය පෙන්නුම් කර තිබේ.
මෙහෙයුම අතර මධුරෝගේ ආරක්ෂක කණ්ඩායමේ විශාල කොටසක් මිය ගිය බව වෙනිසියුලානු ආරක්ෂක අමාත්ය ජෙනරාල් ව්ලැඩිමීර් පැඩ්රිනෝ ඉරිදා උදෑසන රූපවාහිනී ප්රකාශයකින් පැවසීය. නිව්යෝක් ටයිම්ස් වාර්තාවකට අනුව මිය ගිය ගණන 40කි. ඒ අතර සිවිල් වැසියෝ ද වෙති. එනම් මේ සමග සිදුවූ මිනී මැරුම් ගණන 40කි.
බෲක්ලින් අධි ආරක්ෂිත රැඳවුම් මධ්යස්ථානය
නිව්යෝර්ක් හි මෙට්රොපොලිටන් රැඳවුම් මධ්යස්ථානය (MDC) යනු එක්සත් ජනපද බන්ධනාගාර කාර්යාංශය විසින් ක්රියාත්මක කරනු ලබන ෆෙඩරල් පරිපාලන රැඳවුම් ස්ථානයකි. එය බෘක්ලින්හි සන්සෙට් පාර්ක් හි පිහිටා තිබේ. ප්රධාන වශයෙන් නඩු විභාගයට පෙර රැඳවියන්, දඬුවම් නියම කිරීමට බලා සිටින විත්තිකරුවන් සහ ෆෙඩරල් අධිකරණවල, විශේෂයෙන් නිව්යෝර්ක්හි දකුණු සහ නැගෙනහිර දිස්ත්රික්කවල අධිකරණ කටයුතු සඳහා තාවකාලිකව රඳවා සිටින රැඳවියන් මෙහි වෙති. මධුරෝ සහ සිලියා මේ වනවිට 1600 ක් වූ එම රැඳවියන් අතර සිටිනා පුද්ගලයින් දෙදෙනෙකි.
මෙම රැඳවුම් මධ්යස්ථානය විවෘත වන්නේ 1994 දී ය. මෑන්හැටන්හි ෆෙඩරල් අධිකරණවලට ආසන්නව පිහිටා ඇති නිසා මෙය එක්සත් ජනපදයේ වඩාත්ම වැදගත් ෆෙඩරල් බන්ධනාගාරවලින් එකකි.
බෘක්ලින් හි මෙට්රොපොලිටන් රැදවුම් මධ්යස්ථානය යනු ත්රස්තවාදී සැකකරුවන්, සංවිධානාත්මක අපරාධ පුද්ගලයින් සහ දේශපාලනික වශයෙන් සංවේදී විත්තිකරුවන් ඇතුළු ඉහළ පෙළේ සහ ජාත්යන්තර රැඳවියන් නිතර නවාතැන් ගන්නා අධි ආරක්ෂිත රැඳවුම් මධ්යස්ථානකි.
මේ නිසා, මධ්යස්ථානයට විශේෂිත ආරක්ෂක ඒකක සහ සීමා සහිත නිවාස විකල්ප ඇත. ආරක්ෂක අවදානම, නීතිමය තත්ත්වය හෝ ආරක්ෂක අවශ්යතා මත පදනම්ව රැඳවියන් බොහෝ විට වෙනම ඒකකවල තැබීම මෙහි සම්ප්රදාය ය. රඳවා තැබීමේ නිශ්චිත විධිවිධාන ප්රසිද්ධියේ හෙළි කරනු ලබන්නේ කලාතුරකිනි.
රැඳවුම් මධ්යස්ථානය වසර ගණනාවක් පුරා පහසුකම තුළ ඇති තත්වයන් සඳහා සැලකිය යුතු විවේචනයට ලක්ව ඇත. අධික තදබදය, කාර්ය මණ්ඩල හිඟය, දිගුකාලීන රඳවා ගැනීම් සහ යටිතල පහසුකම් ප්රමාණවත් නොවීම වැනි ගැටලු රැසක් පිළිබඳ මෙම රැඳවුම් මධ්යස්ථානය කුප්රකටය.
වඩාත්ම කැපී පෙනෙන සිදුවීම 2019 දී සිදු වූයේය. දීර්ඝ කාලයක් විදුලිය ඇනහිටීමක් හේතුවෙන් ශීත ඍතුවේ දී සිරකරුවන්ට තාපය හෝ විදුලිය නොමැතිව මරණීය තත්ත්වයකට පත් වූයේය. මේ මතභේද තිබියදීත් මෙට්රොපොලිටන් රැඳවුම් මධ්යස්ථානය නිව් යෝර්ක් හි ෆෙඩරල් නඩු සඳහා, විශේෂයෙන් සංකීර්ණ, ඉහළ මට්ටමේ නඩු පැවරීම්වලට සම්බන්ධ විත්තිකරුවන් රඳවා තැබීම සඳහා මධ්යම රැඳවුම් කඳවුර යොදා ගන්නේය.
කඳවුරේ සම්මත පහසුකම් අතර මූලිකව ඇත්තේ නේවාසිකාගාර ආකෘතියේ සැකසුම්ය. විශාල ශාලාවක සැකසුන ඇඳන්වල ඇත්තේ තුනී මෙට්ට ය. පුද්ගලිකත්වය සීමිතය. කෙසේ වෙතත් මධුරෝ හා සිලියා මෙම රැඳවුම් කඳවුරේ අධි ආරක්ෂිත අංශයක රඳවා සිටිය හැකි බව විදෙස් මාධ්ය වාර්තා කරන්නේය.
ලෝකයේ ප්රතිචාරය
ගෝලීය දෘෂ්ටිකෝණයකින් විග්රහ කරගන්නේ නම් දැක ගත හැක්කේ රාජ්ය නායකයෙකු අල්ලා ගැනීම ජාත්යන්තර වාර්තාකරණයේ සහ රාජ්ය තාන්ත්රික ආතතියේ රැල්ලක් ඇති කර තිබෙන බවය. මේ වනවිට ඇමරිකාව කළ මෙම මැදිහත්වීමේ නීත්යානුකූලභාවය සාකච්ඡා කිරීම සඳහා එක්සත් ජාතීන්ගේ මහලේකම්වරයා සහ විවිධ සාමාජිකයින් හෙට ( 5 ) දින හදිසි ආරක්ෂක මණ්ඩල සැසියක් සඳහා රැස්වීමට නියමිතය.
ශුද්ධෝත්තම ලියෝ පාප් වහන්සේ මේ තත්ත්වය සම්බන්ධයෙන් “ගැඹුරු කනස්සල්ල” පළ කළ කර ඇත. ර වෙනිසියුලාවේ ස්වාධීනත්වයට ගරු කරන ලෙස එතුමෝ ඉල්ලා සිටිති.
ලතින් ඇමරිකාව ප්රතික්රියා ධ්රැවීකරණය වී ඇත. කොලොම්බියාව, චිලී සහ ආර්ජන්ටිනාව යන රටවල වෙනිසියුලානු ඩයස්පෝරාවේ සාමාජිකයින් වීදිවල සමරනු දක්නට ලැබුණි. අනෙක් අතට, කොලොම්බියානු ජනාධිපති ගුස්ටාවෝ පෙට්රෝ වැඩ වර්ජන අතරතුර පහර දුන් ස්ථාන පිළිබඳව කනස්සල්ල පළ කළේය. ලෝකය දෙකට බෙදී ඇත. ඇමරිකාවේ කුප්පකමට පක්ෂව සහ විපක්ෂවය.
ලෝකයේ ධර්මතා බරපතල ලෙස ප්රශ්න කරමින් ඇත්තේය. උම්මන්තක මහල්ලෙක් මානව ශිෂ්ඨාචාරය ආපස්සට ඇදගෙන යනු පෙනේ. ඒ අභියස මානව හිමිකම් ඇතුලු ශිෂ්ටත්වය ගැන කතා කරන බටහිර ලෝකය නිහඬය. අප දකින්නේ හැමෝම හෙළුවෙන් බව පමණි.
