ඉඳුනිල් කහටපිටිය –
ලෝකයේ බිහිසුණු මානුෂික ව්යසනය නිමා වී නැති බව වේදනාවෙන් සටහන් කරමු. ඊයේ (10) ගාසා නගරයේ පාසල් පරිශ්රයකට එල්ල වූ ඊශ්රායල ගුවන් ප්රහාරයකින් අවතැන් වූ පලස්තීන පවුල්වල සාමාජිකයින් 100ක් පමණ මිය ගිය බව ගාසාහි සිවිල් හදිසි සේවය නිවේදනය කළේය.
ඊශ්රායලය ප්රකාශ කළේ මිය ගිය පිරිස අතර සන්ද්ධ සටන්කාමීන් 19 දෙනෙකු සිටින බවය. හමාස් සංවිධානය එම ප්රකාශය නින්දා සහගත බොරුවක් බවත් ප්රහාරයෙන් මරා දැමූ පිරිස අතර එක් හමාස් සටන්කාමියෙක්වත් නොමැති බවත් තහවුරු කර ප්රකාශ කළේය.
මේ වනවිට වෙබ් අඩවිවල සංචරණය වන වීඩියෝ පෙන්වා දෙන්නේ මිනිස් සිරුරු කොටස් තැන් තැන්වල විසිරී ඇති ආකාරය දක්වන අමානුෂික යථාර්කයකි. තවත් සිරුරු රැගෙන ගොස් බිම ඇතිරිලි වලින් ආවරණය කරන ආකාරය එම වීඩියෝවල දැක්වේ.
එම වීඩියෝ දසුන් හිත් බිඳ දමන සුළුය. හිස් ආහාර ටින් ලේ විලක පාවෙමින් තිබේ. පිළිස්සුණු මෙට්ට සහිත සුන්බුනු ස්ථානයක දරුවෙකුගේ බෝනික්කෙක් වැටී ඇති අයුරු පෙනේ. .
තවත් වීඩියෝවක, පාසල් සංකීර්ණයේ බිම තබා ඇති මෘත ශරීර ආවරණය කළ බෑග් දුසිම් ගණනක් අතර යාඥා කරන පිරිමින්ගේ රූප රාමු දැකිය හැකිය.
ප්රදේශයේ සිවිල් හදිසි සේවාව සහ හමාස් පාලනය කරන රජයේ මාධ්ය කාර්යාලය වෙන වෙනම සිදුකරන ප්රකාශය කියා සිටියේ මෙම පාසල් භූමියේ පදිංචිකරුවන්ව සිටින අවතැන් වූ අසරණයින් උදෑසන යාඥා කරමින් සිටියදී මෙම ඊශ්රයාල ප්රහාරය එල්ල වූ බවය. සිද්ධිය පිළිබඳ විශ්වාසනීය වාර්තා ඉදිරිපත් කරන්නේ ඔවුන්ය.
පලස්තීන සිවිල් ආරක්ෂක ප්රකාශක මහමුද් බාසාල් රූපවාහිනී මාධ්ය හමුවකදී පැවසුවේ මේ වන විට ළමුන් 11 දෙනෙකු සහ කාන්තාවන් 6 දෙනෙකු ඇතුළුව 93ක ගේ සිරුරු හඳුනාගෙන අති බවය. ඔවුන්ට . හඳුනා නොගත් දේහයන් ප්රමාණයක් ද ඇත.
මේ මොහොත වනවිට ගාසාවේ සියලුම වැසියන් පාහේ අවතැන්ය. ඒ අවතැන් පිරිස් අතරින් පලස්තීනුවන් දස දහස් ගණනක් ගාසා තීරයේ පාසල්වල නවාතැන් පතා සිටිති. මෙම පාසල් බොහෝමයක් යුද්දය පටන් ගත් දා සිට වසා දමා තිබේ. ඊශ්රයාල ප්රහාරය එල්ල වූ මෙම පාසල් අවතැන් කඳවුරේ පවුල් 350ක් පමණ රැඳී සිට තිබේ.
ඊශ්රයාලය කියන්නේ කුමක් ද?
ඊශ්රයාලය පවසන්නේ මුස්ලිම් පල්ලියක් ලෙසත් ක්රියාත්මකවන මෙම පාසල් ගොඩනැගිලි සංකීර්ණය සක්රීය හමාස් සහ ඉස්ලාමීය ජිහාඩ් හමුදා මධ්යස්ථානයක් ලෙස කටයුතු කර ඇති බවය. ලුතිනන් කර්නල් නදව් ෂෝෂානි ඒ සම්බන්ධව X හි සටහනක් තබා ඇත.
ඊශ්රායල හමුදාව පැවසුවේ ප්රහාරයෙන් බරපතල හානියක් සිදු නොවූ බවය. එය සනාථ කරන ගුවන් ඡායාරූප සහ වීඩියෝ ලබා දී ඇති බවත් වැඩිදුරටත් ඊශ්රයාලය කීවේය. ඊශ්රායලය පවසන්නේ පලස්තීන සටන්කාමීන් ගාසා තීරයේ සිවිල් වැසියන් අතරට වැදී පාසල්, රෝහල් සහ නම් කරන ලද මානුෂීය කලාප තුළ සිට ක්රියාත්මක වන බවත්ය
එම චෝදනාව හමාස් සහ එහි සහචරයින් තරයේ ප්රතික්ෂේප කර ඇත. මෙම ප්රහාරය බිහිසුණු අපරාධයක් බවත් එය තත්ත්වය බරපතළ ලෙස උත්සන්න කිරීමක් බවත් හමාස් සංවිධානය පවසයි. හමාස් දේශපාලන කාර්යාලයේ ඉසාට් අල් රෙෂික් පැවසුවේ මියගිය අය අතර එක සටන්කරුවෙකුවත් ඇතුළත් නොවූ බවය.
ධවල මන්දිරයටත් දුකයි ලු
ගාසා නගරයේ පාසල් පරිශ්රයට ඊශ්රායල ප්රහාරය එල්ල කිරීම සම්බන්ධයෙන් තමන් දැඩි කනස්සල්ලට පත්ව සිටින බවත්, වැඩිදුර තොරතුරු ඉල්ලා ඊශ්රායල නිලධාරීන් සමඟ සම්බන්ධ වී සිටින බවත් ධවල මන්දිරය ප්රකාශ කළේය.
යුරෝපා සංගමයේ විදේශ ප්රතිපත්ති ප්රධානී ජෝෂප් බොරෙල් X හි ප්රකාශ කළේ පාසලේ ඡායාරූප දැකීමෙන් තමා භීතියට පත් වූ බවය. ප්රංශය සහ බ්රිතාන්යය ගුවන් ප්රහාරය හෙළා දැක ඇත.
පලස්තීන ජනාධිපති මහමුද් අබ්බාස්ගේ ප්රකාශකයෙකු වන නබිල් අබු රුඩයිනේ ඊශ්රායලයේ මිත්ර වොෂින්ටනයෙන් ඉල්ලා සිටියේ “ළමයින්, කාන්තාවන් සහ වැඩිහිටියන් ඇතුළු අහිංසක සිවිල් වැසියන් දහස් ගණනක් ඝාතනය කිරීමට තුඩු දෙන අන්ධ සහයෝගය” අවසන් කරන ලෙසයි.
ඊජිප්තුව, කටාරය, එක්සත් අරාබි එමීර් රාජ්යය, සෞදි අරාබිය සහ තුර්කිය යන රටවල් සියල්ලම මෙම ප්රහාරය හෙළා දැක ඇත.
ජ්යෙෂ්ඨ හමාස් නිලධාරි සාමි අබු සුහ්රි පැවසුවේ සටන් විරාම සාකච්ඡා නැවත ආරම්භ කිරීමට මැදිහත්කරුවන් තල්ලු කරන බැවින් එය හැරවුම් ලක්ෂයක් විය යුතු බවයි.
හමාස් නිලධාරියෙක් රොයිටර් වෙත පැවසුවේ කණ්ඩායම සාකච්ඡාව සඳහා නව යෝජනාවක් අධ්යයනය කරමින් සිටින නමුත් එය විස්තර නොකළ බවයි.
ගාසා තීරයේ සිවිල් වැසියන් ඝාතනය කිරීමෙන් පෙන්නුම් කරන්නේ ඊශ්රායලයට යුද්ධය අවසන් කිරීමට අදහසක් නොමැති බව යැයි ඊජිප්තුව පැවසුවේය. කටාර් විදේශ අමාත්යාංශය මෙම ප්රහාරය විස්තර කළේ “බිහිසුණු සංහාරයක්” ලෙසය.
අල්-ජසීරා රූපවාහිනියට අදහස් දක්වමින්, ඊශ්රායලය සමඟ සටන් විරාම සාකච්ඡා සඳහා නම් කළ හමාස් කණ්ඩායමේ ප්රධානියා වන ඛලීල් අල්-හයියා, ප්රකාශ කළේ හෙලාදැකීමේ ප්රකාශ තවදුරටත් ප්රමාණවත් නොවන බවය.
“(ඊශ්රායල) තානාපතිවරුන් සේවයෙන් පහ කරන්න, තානාපති කාර්යාල වසා දමන්න, සබඳතා බිඳ දමන්න,” ඔහු පැවසීය.
සටන් විරාම සාකච්ඡාව
ඉරානය සහ එහි ලෙබනන් සගයා වන හිස්බුල්ලා අතර පුලුල් ගැටුමක් පිලිබඳ භීතිය වර්ධනය වීමත් සමග ඊජිප්තුව, එක්සත් ජනපදය සහ කටාරය බ්රහස්පතින්දා නව සටන් විරාම සාකච්ඡා වටයක් සැලසුම් කර ඇත.
හමාස් සංවිධානය තවදුරටත් ඊශ්රායල වැසියන්ට තර්ජනයක් නොවන තුරු යුද්ධය අවසන් නොකරන බව ප්රකාශ කළ ඊශ්රායල අගමැති බෙන්ජමින් නෙතන්යාහු, තමන් සාකච්ඡාව සඳහා නියෝජිත පිරිසක් යවන බව ප්රකාශ කළේය.
ගාසා තීරයේ ඊශ්රායල ප්රහාරයෙන් පලස්තීනුවන් 40,000 කට ආසන්න සංඛ්යාවක් මිය ගොස් ඇති බව ගාසා හි සෞඛ්ය අංශ පවසයි.
