සදෙව් රත්නායක
විස්සයි20 ලෝක කුසලාන ක්රිකට් තරගමාලාව ගැන අවසන් තීරණය ගැනීමට ජාත්යන්තර ක්රිකට් කවුන්සිලය මේ මස 28 වැනිදා රැස්වීමක් කැඳවා ඇතැයි වාර්තා වේ. කොවිඩ් 19 ගෝලීය වසංගතය නිසා ලෝක ක්රීඩා ක්ෂේත්රය තුළ සියළුම තරගාවලි අවලංගු කිරීම හෝ කල් දැමීම සිදුවූවත් විස්සයි20 ලෝක කුසලානය ගැන එවැනි තීරණයක් ගෙන තිබුණේ නැත.
වීඩියෝ රැස්විමක් ලෙස අන්තර්ජාලය හරහා සිදුකෙරෙන ජාත්යන්තර ක්රිකට් කවුන්සිල රැස්වීමේදී විස්සයි20 ලෝක කුසලාන තරග මාලාව 2022 වසර දක්වා කල් දැමීමට බොහෝ දුරට ඉඩ ඇතැයි වාර්තාවේ.
විකල්ප යෝජනා කිහිපයක් ගැන සාකච්ඡා කිරීමට නියමිත මේ රැස්වීමේදී 2022 දක්වා ලෝක කුසලාන තරගමාලාව කල් දැමීම ගැන දීර්ඝ වශයෙන් කතාබහට ලක් වීමිට නියමිතය.
විස්සයි20 ලෝක කුසලාන තරගමාලාව වසර දෙකකට කල් දැමීම ගැන එම තරගමාලාවට සත්කාරකත්වය ලබා දෙන ඔස්ට්රේලියාව වැඩි අකමැත්තක් පළ නොකරනු ඇතැයි අයි.සී.සී. නිලධාරීහු විශ්වාස කරති. ඔවුන් එවැනි නිගමනයකට පැමිණ ඇත්තේ නරඹන්නන් හසුරුවීම මෙම තරගමාලා පැවැත්වීමේදී ඔස්ට්රේලියාවට මුහුණ දීමට සිදුවන විශාලතම අර්බුදය වේවි යැයි ඔස්ට්රේලියාවේ ක්රීඩා ඇමැති රිචඩ් කෝල්බෙක් පසුගියදා ප්රකාශ කිරීම නිසාය.
තරගමාලාව ආරම්භවීමට පෙර ඒ සඳහා සහභාගි වන සියළුම කණ්ඩායම්වල ක්රීඩකයන් දින 14ක කාලයකට නිරෝධායනය කිරීමේ යෝජනාවකුත් ඉදිරිපත් වී තිබේ. රටවල් 16ක ක්රීඩකයන් වගේම පුහුණු කාර්ය මණ්ඩලයේ සාමාජිකයන්, වාර්තාකරුවන්, කැමරාකරුවන්, රූපවාහිනි විචාරකයන් ඇතුළු විශාල පිරිසක් එසේ සති දෙකකට නිරෝධානයට ලක් කිරීම වියදම් අධික ක්රියාවලියක් නිසා එම යෝජනාව කෙතරම් දුරට සාර්ථක වේවිදැයි සැකයක් මතු වී ඇත.
