ඉඳුනිල් කහටපිටිය –
ශ්රී ලංකා කණ්ඩායම සහ බටහිර ඉන්දීය කොදෙව් කණ්ඩායම අතර පැවැත්වෙන ටෙස්ට් ක්රිකට් තරඟයේ තෙවන දිනය නිමාවට පත්වන විට තරඟය ජයග්රහණය කිරීම සඳහා ශ්රී ලංකාව සතු වූ බලාපොරොත්තු අවම කරමින් ප්රබල සටනක් දියත් කිරීමට බටහිර ඉන්දීය කොදෙව් කණ්ඩායම සමත් විය.
දිනයේ ආරම්භය දෙපාර්ශවය අතර තියුණු සටනක් ලෙස සනිටුහන් වුවද, ඉන් අනතුරුව බටහිර ඉන්දීය කොදෙව් පිල බලාපොරොත්තු සහගත තත්ත්වයකට පැමිණියේය. කෙසේ වෙතත් දිනය අවසාන වන විට ශ්රී ලංකාවට ඉතිරි වූයේ දැඩි වෙහෙසකර සහ තරඟය ජයග්රහණය කිරීම සඳහා වූ අවස්ථා ගිලිහී යාමේ පසුතැවීමකි.
මීට ප්රධානතම හේතුව වූයේ බටහිර ඉන්දීය කොදෙව් කණ්ඩායමේ පස්වන කඩුල්ල වෙනුවෙන් ෂේ හෝප් සහ ජස්ටින් ග්රීව්ස් එක්ව ගොඩනැගූ නොබිඳුණු ලකුණු 174 ක දැවැන්ත සබඳතාවයයි. මෙම සබඳතාවය හේතුවෙන් බටහිර ඉන්දීය කොදෙව් කණ්ඩායමට එල්ල වී තිබූ පරාජයේ අවදානම සම්පූර්ණයෙන්ම පාහේ මඟහැරී ගියේය.
ෆලෝ-ඔන් (Follow-on) අවදානමෙන් මිදීමට ආසන්නයි
තෙවන දිනය සඳහා තරඟය නතර කරන විට සත්කාරක බටහිර ඉන්දීය කොදෙව් කණ්ඩායම, ශ්රී ලංකාව පළමු ඉනිම වෙනුවෙන් ලබාගත් ලකුණු සංඛ්යාවට වඩා තවමත් ලකුණු 231 ක් පිටුපසින් පසුවෙයි. එහෙත් ඔවුන් ශ්රී ලංකාව විසින් නැවත පන්දුවට පහරදීම සඳහා බලකරනු ලබන ‘ෆලෝ-ඔන්’ සීමාවෙන් මිදීමට අවශ්ය වන්නේ තවත් ලකුණු 31 ක් පමණි. තරඟයේ එක් අවස්ථාවක ශ්රී ලංකාවට කොදෙව් පිල ෆලෝ-ඔන් කිරීමට අවස්ථාවක් ලැබෙනු ඇතැයි සුළු බලාපොරොත්තුවක් මතු වුවද, ෂේ හෝප් සහ ජස්ටින් ග්රීව්ස් එක්ව එම අවස්ථාව සහමුලින්ම වදන් කර දැමීමට සමත් වූහ.
ප්රභාත් ජයසූරිය මතුකළ තර්ජනය
බටහිර ඉන්දීය කොදෙව් කණ්ඩායමේ මුල් කඩුලු 4 ක් ලකුණු 141 කට බිඳ වැටී ඔවුන් යම් අසීරුතාවයකට පත්ව සිටි අවස්ථාවකදී හෝප් සහ ග්රීව්ස් පිටියේ එක් වූහ. දිවා ආහාරයෙන් පසු ක්රියාත්මක වූ ප්රභාත් ජයසූරියගේ දක්ෂ පන්දු යැවීම හමුවේ අමීර් ජංගු සහ කවෙම් හෝජ් යන පිතිකරුවන් දෙදෙනාම දැවී යාම නිසා ශ්රී ලංකාවට තරඟයේ පාලනය නතු කර ගැනීමට අවස්ථාව උදා වී තිබුණි.
මුල් අවස්ථාවේදී මෙම පිතිකරුවන් දෙදෙනා ලකුණු ලබා ගැනීමේ වේගය පාලනය කරමින්, තනි ලකුණු ලබා ගනිමින් සබඳතාවය ගොඩනැගීමට මුල් තැන දුන්හ. ඔවුන් දෙදෙනාම තම පිටියේ දෙපසට පන්දුව යොමු කිරීමට සමත් වූහ. ඉන් අනතුරුව ක්රමයෙන් ඔවුන් ආක්රමණශීලී පහරවල් කරා අවතීර්ණ වූ අතර පොයින්ට් කලාපයෙන් එල්ල කළ දක්ෂ කට් පහරවල් සහ පා ඉන්න දෙසින් එල්ල කළ මනරම් පහරවල් ඊට ඇතුළත් විය.
අවදානමකින් තොර ඉනිමක්
මෙම සබඳතාවයේ කැපී පෙනෙනම ලක්ෂණය වූයේ ඔවුන් කිසිදු අනවශ්ය අවදානමක් නොගෙන පන්දුවට පහරදීමයි;. ඉනිමේ මුල් භාගයේදී මිඩ්-ඔන් කලාපයෙන් එල්ල වූ සෘජු පන්දු රැකගැනීමකදී ග්රීව්ස් දුවද්දී දැවී යාමකට හසු වීමට සුළු ඉඩක් තිබුණද, ඉන් පසුව මුළු ඉනිම පුරාම ශ්රී ලංකා පන්දු රකින්නන්ට කිසිදු උඩපන්දුවක් හෝ අවස්ථාවක් ලබා නොදීමට ඔවුන් වගබලා ගත්හ. ඔවුන් දෙදෙනාම එකම රිද්මයකින් යුතුව පන්දුවට පහරදීම විශේෂත්වයක් විය.
දිනය නිමාවන විට ෂේ හෝප් පන්දු 173 කදී ලකුණු 86 ක් ලබා සිටි අතර ජස්ටින් ග්රීව්ස් පන්දු 162 කදී ලකුණු 85 ක් ලබා සිටියේය. පන්දුවට පහරදීමේදී ඔවුන්ගේ පාලනය (Control Percentage) පිළිවෙලින් 89% ක් සහ 87% ක් ලෙස සටහන් විය.
ශ්රී ලංකා පන්දු යවන්නන්ගේ දැඩි වෙහෙස
ශ්රී ලංකා පන්දු යවන්නන් ඉතා දැඩි උත්සාහයක නිරත වූ අතර, පන්දුවෙන් විශාල සහයෝගයක් නොලැබුණු තණතීරුවක් මත වුවද ඉතා විනයගරුකව පන්දු යැවීමට ඔවුහු කටයුතු කළහ. කෙසේ වෙතත් බටහිර ඉන්දීය කොදෙව් කණ්ඩායම තරඟාවලියේ 1-0 ක් ලෙස පෙරමුණේ පසුවන බැවින්, ඔවුන්ට අවදානමක් නොගෙන ඉතා ආරක්ෂිතව ක්රීඩා කිරීමට අවකාශය ලැබුණි. එම නිසා තරඟයේ ඉදිරි පියවර තැබීමේ සම්පූර්ණ බර ශ්රී ලංකා කණ්ඩායම වෙත පැවතුණි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
ශ්රී ලංකා වේගපන්දු යවන්නන් වන අසිත ප්රනාන්දු, ඉසිත විජේසුන්දර සහ මිලාන් රත්නායක යන තිදෙනා බටහිර ඉන්දීය කොදෙව් පිතිකරුවන්ට එරෙහිව පා ඉන්නෙන් පිටතට ඉතා නිවැරදි එල්ලයක පන්දු යැවීම සිදුකළ බව කිව යුතුව ඇත. කෙසේ වෙතත් මේ වනවිට තත්ත්වය පෙරළී ඇත. බලාපොරොත්තු අපෙන් දුරස් වෙමින් යනු පෙනේ.
