හිටපු නාවික හමුදාපති අද්මිරාල් ඔෆ් ද ෆ්ලීට් වසන්ත කරන්නාගොඩ අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගෙන තිබේ.
ඒ, යෝෂිත රාජපක්ෂ නියමිත සුදුසුකම් වෙනස් කරමින් නාවික හමුදාවේ විධායක නිලධාරියෙකු ලෙස බැඳී, රජයේ මුදල් අවභාවිතා කරමින් බ්රිතාන්ය රාජකීය නාවික හමුදාවේ පුහුණුව ලැබීමට අදාළව කෙරෙන විමර්ශනයකට ප්රකාශයක් ලබා දීමට පැමිණි අවස්ථාවේදීය.
මෙම විමර්ශනයට අදාළව ප්රකාශයක් සටහන් කර ගැනීම සඳහා වසන්ත කරන්නාගොඩට මීට පෙර ද අවස්ථා දෙකකදී අල්ලස් කොමිසම හමුවේ පෙනී සිටින ලෙස දන්වා කැඳවීම් කර තිබුණි.
පළමුවරට පසුගිය ජූනි මස 16 වැනිදා ඔහු කැඳවා තිබූ අතර, අදාළ කැඳවීමේ ලිපිය තමන්ට නොලැබුණු බව පවසමින් ඔහු එදින කොමිසම හමුවට පැමිණීම ප්රතික්ෂේප කර තිබුණි. අනතුරුව ජූනි 22 වැනිදා දෙවැනි වරටත් ඔහුව කැඳවීමට පියවර ගත් නමුත්, තමන්ට පවතින රෝගී තත්ත්වයක් හේතුවෙන් එදින ද පැමිණිය නොහැකි බව ඔහු කොමිසමට දැනුම් දී තිබුණි.
ඒ අනුව තෙවැනි වරට අද (03) දින ඔහු අල්ලස් කොමිසම හමුවට කැඳවා තිබූ අතර, එහිදී දීර්ඝ ලෙස ප්රකාශයක් සටහන් කරගැනීමෙන් අනතුරුව අල්ලස් හෝ දූෂණ විමර්ශන කොමිෂන් සභාව විසින් ඔහුව මෙලෙස අත්අඩංගුවට ගෙන ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
