2019 සිට 2023 දක්වා කාලය තුළ දකුණු ඉන්දියාවේ සිට මෙරටට මත්ද්රව්ය ජාවාරම් කළ සිය බෑනා විසින් උපයාගත් වත්කමක් වූ රන් පවුම් 360ක් බැංකුවලට උකස් කිරීම සහ විකිණීමේ චෝදනාව මත මන්නාරමේ පදිංචි 66 හැවිරිදි වියපත් කාන්තාවක් පොලිස් නීති විරෝධී වත්කම් විමර්ශන කොට්ඨාසය මගින් අත් අඩංගුවට ගෙන තිබේ.
පොලිසිය පවසන පරිදි, අදාළ ජාවාරම්කරු මත්ද්රව්ය මුදල්වලින් දෙමහල් නිවසක්, වෙළඳසැල් පහක් සහිත නිවසක්, මෝටර් රථයක් සහ රන් පවුම් 360කට ආසන්න රන් ආභරණ තොගයක් උපයාගෙන ඇත.
මෙම දේපළවලින් නිවාස දෙක සහ මෝටර් රථය සම්බන්ධයෙන් මන්නාරම මහාධිකරණයේ නඩු පවරා ඒවා තහනම් කිරීමට (Inactive) අවශ්ය නියෝග ලබාගෙන තිබුණි.
රන් ආභරණ සම්බන්ධයෙන් සිදුකළ දීර්ඝ විමර්ශනයේදී හෙළි වී ඇත්තේ, අදාළ සැකකරුගේ බිරිඳගේ මව විසින් එම රන් ආභරණ මන්නාරම ප්රදේශයේ මූල්ය ආයතන කිහිපයකට උකස් කර පසුව ස්වර්ණාභරණ අලෙවිසැල් වෙත විකුණා ඇති බවය.
නීති විරෝධී කටයුතුවලින් උපයාගත් බව දැන දැනම මෙම දේපළ පරිහරණය කිරීම මුදල් විශුද්ධිකරණය වැළැක්වීමේ පනත යටතේ වරදක් බැවින් ඊයේ (15) සවස ඇයව අත්අඩංගුවට ගෙන ඇත.
සිද්ධිය සම්බන්ධයෙන් පොලිස් නීති විරෝධී වත්කම් විමර්ශන කොට්ඨාසය වැඩිදුර පරීක්ෂණ පවත්වයි.
