ජනාධිපති අනුර කුමාර දිසානායකගේ ආරාධනය අනුව පාසල් සංවර්ධන නිලධාරීන්ගේ සංගමයේ නියෝජිතයන් සහ ජනාධිපතිවරයා අතර හමුවක් අද (03) පෙරවරුවේ ජනාධිපති කාර්යාලයේදී පැවැත්විණි.
පවතින ගැටලුවලට වගකිව යුත්තේ වත්මන් ආණ්ඩුව හෝ තමන් නොවුවද වෘත්තිකයන් ලෙස වර්තමානය වන විට තමන් වෘත්තීමය සහ සමාජයීය ගැටලු රැසකට මුහුණදී සිටින බව මෙහිදී එම නියෝජිතයෝ සඳහන් කළහ.
පාසල් සංවර්ධන නිලධාරීන්ගේ ගැටලුව සම්බන්ධව මෙහිදී දීර්ඝ සාකච්ඡාවකට එක් වූ ජනාධිපතිවරයා එම සියලු දෙනාගේ වෘත්තිය අභිමානය සහ ගරුත්වය ආරක්ෂා කිරීම රජයේ අරමුණ බව සඳහන් කළේය.
පාසල් තුළ සේවය කර අත්දැකීම් ඇති උපාධිධාරීන් ගුරු සේවයට ඇතුළත් කර ගැනීම රජයේ අපේක්ෂාව බවත්, එබැවින් ගුරු ව්යවස්ථාවට අනුව විභාගයට පෙනී සිටින ලෙස තමා ඔවුන්ට ආරාධනා කරන බවත් ජනාධිපතිවරයා මෙහිදී වැඩිදුරටත් සඳහන් කළේය.
මේ සංවාදය ගොඩනැගුනේ අතිශයින්ම මානුෂික මුහුණුවරකිනි. විසි තුන් දහසකට වැඩි ගුරුවරු ප්රමාණයක් බඳවා ගැනීම, ඉන් වැඩි ප්රතිශතයක් අභ්යන්තර අපේක්ෂකයන්ගෙන් බඳවා ගැනීම, පාසල් සංවර්ධන නිලධාරීන් පාසල්වලින් බැහැර නොකර පාසල් තුළම රඳවා ගැනීම, විභාගය අසමත් වුවත් පශ්චාත් උපාධි අධ්යාපන ඩිප්ලෝම සමත් වී ගුරු සේවයට බැඳීමට අවස්ථාව සලසාදීම, ගුරු සංවර්ධන නිලධාරීන්ගෙන් ග්රාමීය පාසල් පවත්වා ගැනීමට සිදුවූ සේවය පිළිගෙන එය අගයමින් සාකච්ඡාව පරිණත ආකාරයෙන් පවත්වාගෙන යෑම මේ අවස්ථාවේ දී කැපී පෙනුණි.
ජනාධිපතිවරයා පැහැදිලිව කීවේ හෙට කැබිනට් තීන්දුවක් රැගෙන ගුරු සංවර්ධන නිලධාරීන් ගුරු වෘත්තියට ඇතුළත් කරගත හැකි නමුත් ඉන් අනතුරුව එන ප්රායෝගික තත්ත්වය සංකීර්ණ නඩු කටයුත්තක් බවය. ඉන් ගුරු සංවර්ධන නිලධාරීන්ගේ ප්රශ්නය විසඳෙන්නේ නැති බවත් එහි අවසානය තවත් ව්යාකූල තත්ත්වයක් බවත් ජනාධිපතිවරයා නිරවුල්ව පැහැදිලි කර දුන්නේය.
“ඒක කරන්න බෑනේ මල්ලි… අනවශ්ය නඩු ගොඩක පැටලෙනවා අපි එතකොට…” ගුරු සංවර්ධන නිලධාරීන්ගේ සංගමයේ ලේකම්
අවසානයේ දී විපක්ෂ නායකවරයාගෙන් ඔහුගේ රජයක් යටතේ ගුරු සංවර්ධන නිලධාරීන්ගේ ප්රශ්නයට විසඳුමක් ලබා දෙනවාදැයි අසා විපක්ෂ නායකවරයාගෙන් ලෙයින් සහතික ගත් එම සමස්ථ ලංකා පාසල් සංවර්ධන නිලධාරීන්ගේ සංගමයේ ලේකම් විරාජ් මනරංග ජනාධිපතිවරයාට මෙසේ පැවසුවේය.
අනික සර් දේශපාලන වාසි ගන්න මේ ප්රශ්නය පාවිච්චි කරන අය ඉන්නවනේ සර්. මේ ප්රශ්නය එහෙම කරන්න හදනවා. අපිට එහෙම කිසිම අවශ්යතාවයක් නෑ සර්… විරාජ් මනුරංග ජනාධිපතිවරයාට කීවේ.
ජනාධිපතිවරයා සිනාසුනේය. ” ඒක අපි කිසිසේත් සැලකිල්ලට ගන්නේ නෑ. එහෙම තමයි දේශපාලනය. එනවා යනවා. ඒවා එහෙම තමයි…”
ජනාධිපති ලේකම් ආචාර්ය නන්දික සනත් කුමානායක, ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, ජනාධිපති මහජන සම්බන්ධතා අධ්යක්ෂ ජනරාල් ධර්මසිරි ගමගේ සහ අධ්යාපන, උසස් අධ්යාපන සහ වෘත්තීය අධ්යාපන අමාත්යාංශයේ ලේකම් නාලක කළුවැව ඇතුළු එහි ජ්යෙෂ්ඨ නිලධාරීහු පිරිසක්ද මෙම සාකච්ඡාවට එක්ව සිටියහ.
