අසේල කුරුළුවංශ –
-
පසුගිය ජූනි මාසයේ පදික වෙළෙඳාම තහනම් කිරීමේ තීන්දුව ගත්තේ… වෙළඳාමෙන් ඉවත් වෙන්න මාස 06ක් කල් දුන්නා… ඒ කාලය දෙසැම්බර් 31න් ඉවරයි… නගරාධිපති කියයි!
මහනුවර නගරයේ පදික වෙළෙඳාම ජනවාරි 01 සිට තහනම් කිරීමට නගර සභාව තීරණය කර තිබේ.
මෙය මහනුවර නගරයට පැමිණෙන ලක්ෂ සංඛ්යාත ජනතාවගේ පහසුව සහ නගරයේ සුන්දරත්වය ආරක්ෂා කිරීම වෙනුවෙන් සභාව ගනු ලැබූ තීරණයක් බව නගරාධිපති චන්ද්රසිරි විජේනායක පැවසුවේය.
මහනුවර පදික වෙළෙඳාම ඉවත් කිරීමට නගර සභාව ගෙන තිබෙන තීරණය සම්බන්ධයෙන් මාධ්ය හමුවේ අදහස් දක්වමින් චන්ද්රසිරි විජේනායක මෙසේද පැවසුවේය.
“මෙයට මාස හයකට පමණ පෙර මහ සභාව රැස්ව අදාළ තීරණය ගනු ලැබුවත් ක්ෂණිකව එය ක්රියාත්මක කිරීමෙන් පදික වෙළෙඳුන් පත්වන අසීරුතාව සැලකිල්ලට ගෙන ඔවුන්ට ඉවත්වීම සඳහා මෙම දෙසැම්බර් 31 දින දක්වා මාස පහකට වඩා වැඩි කාලයක් ලබාදුන්නා. වෙළෙඳාම් සඳහා තමන් ගෙනවිත් තිබෙන භාණ්ඩ අවසන් වන තෙක් අවස්ථාව දෙන ලෙස ඔවුන් ඉල්ලා සිටියා. ඒ අනුව ලබාදුන් මාස 06 කට ආසන්න කාලය මෙම 31 වැනිදායින් නිමා වෙනවා.”
“කිසිදු හේතුවක් නිසා මෙම තීරණය වෙනස් කරන්නේ නැහැ. පදික වෙළෙඳුන්ට නගර සභාව මගින් මෙයට වසර ගණනාවකට පෙර වෙනත් ස්ථාන ලබා දුන්නා. නමුත් ඔවුන් එම ස්ථාන අත්හැර යළිත් පදික වේදිකාවට පැමිණීම නිසා තමයි මේ ගැටලුව ඇති වුණේ. නගර සභාව අපේ නම් ආණ්ඩුකාරවරයා අපේ නම් ජනාධිපතිවරයා අපේ නම් අපි මොකටද මේ තීරණය ආපස්සට ගන්නේ. “
මහනුවර මධ්යම වෙළෙඳ සැල ඉදිරිපිට පදික වෙළෙඳාම හේතුවෙන් නගර සභාවට වරිපනම් ගෙවා මධ්යම වෙළෙඳ පොළ තුළ ව්යාපාර පවත්වාගෙන යන තමන් දැඩි අපහසුතාවට පත්ව සිටින බවත් ඒ පිළිබඳව අවස්ථා කිහිපයකදී නගර සභාව දැනුවත් කළත් සහනයක් නොලැබුණු බවත් මධ්යම වෙළෙඳපොලේ ව්යාපාරිකයෝ පැවසූහ.
මේ වනවිට මහනුවර නගරයේ පදික වෙළෙඳුන් 60-80 අතර ප්රමාණයක් සිටින බවට නගර සභාව හඳුනාගෙන ඇත.
