ජනාධිපතිවරයා සමග පැවති සාකච්ඡාවේ දී සිය ගැටලු සම්බන්ධයෙන් ස්ථීර විසඳුමක් නොලැබුණු බැවින් ආරම්භ කර ඇති වෘත්තීය සමිති ක්රියාමාර්ගය අඛණ්ඩව ක්රියාත්මක කරන බව රජයේ වෛද්ය නිලධාරීන්ගේ සංගමය පවසයි.
අයවැයෙන් වෛද්යවරුන්ගේ ගැටලු විසඳීමට පියවර නොගැනීමට විරෝධය පළකරමින් රජයේ වෛද්ය නිලධාරීන්ගේ සංගමය ඊයේ (17) දිනයේ සිට වෘත්තීය සමිති ක්රියාමාර්ගයක් ආරම්භ කලේ රෝහල්වල නොමැති ඖෂධ පිටතින් මිලදී ගැනීමට ලබා දෙන නිර්දේශවලින් සහ රෝහල්වල නොමැති රසායනාගාර පරීක්ෂණ පිටතින් සිදුකරගැනීමට නිර්දේශ නොකිරීම හේතුවෙනි.
අදාළ ගැටලු සම්බන්ධයෙන් සාකච්ඡා කිරීම සඳහා ඊයේ පෙරවරුවේ ජනාධිපති අනුර කුමාර දිසානායක සහ රජයේ වෛද්ය නිලධාරීන්ගේ සංගමය අතර විශේෂ සාකච්ඡාවක් පැවතුන අතර එහිදී ජනාධිපතිවරයා වෛද්යවරුන්ගෙන් ඉල්ලා සිටියේ කඩා වැටී තිබූ ආර්ථිකය මේ වන විට ස්ථාවරත්වයට පත්කොට ඇති බවත් එම ස්ථාවරත්වය පවත්වාගෙන යාමට රජයට සහාය ලබාදෙන ලෙසත් ය.
කෙසේවෙතත් අදාළ සාකච්ඡාවෙන් අනතුරුව රජයේ වෛද්ය නිලධාරීන්ගේ සංගමයේ හදිසි විධායක කමිටු රැස්වීමක් පවත්වා සිය වෘත්තීය සමිති ක්රියාමාර්ගය අඛණ්ඩව ක්රියාත්මක කිරීමට තීරණය කළ බව එම සංගමයේ ලේකම් වෛද්ය ප්රභාත් සුගතදාස මහතා සඳහන් කළේය.
මේ අතර විශේෂඥ වෛද්යවරුන්ගේ සංගමය සහ ජනාධිපති අනුර කුමාර දිසානායක අතර විශේෂ සාකච්ඡාවක් අද පස්වරුවේ පැවැත්වීමට නියමිතව තිබේ.
විශේෂඥ වෛද්යවරුන්ගේ සංගමයේ ලේකම් විශේෂඥ වෛද්ය ආර්. ඥානසේකරම් සඳහන් කළේ, පාර්ලිමේන්තු සංකිර්ණයේ දී එම සාකච්ඡාව පැවැත්වෙන බවය.
