වෙන්නප්පුව පොලිසිය ආසන්නයේ පිහිටි වැව පාරේදී අද (31) උදේ වෙඩි තබා තියුණු ආයුධයකින් පුද්ගලයින් දෙදෙනෙකු කපා කොටා එක් පුද්ගලයෙක් ඝාතනය කළ බවට සැක කරන අපරාධකරුවෙක් ගිනි අවියත් සමඟ අත්අඩංගුවට ගැනීමට වෙන්නප්පුව පොලිසිය සමත් වී තිබේ.
සැකකරු භාවිතා කළ මෝටර් රථය ද පොලිස් භාරයට ගෙන තිබේ.
මොටර් රථයකින් පැමිණි පිරිසක් විසින් යතුරුපැදියක ගමන් ගත් පුද්ගලයන් දෙදෙනෙක් අනතුරකට ලක් කර පසුව යතුරුපැදියේ පැමිණි දෙදෙනාට තියුණු ආයුධයකින් පහරදී වෙඩි තබා ඇත.
සිද්ධියෙන් යතුරුපැදියේ පැමිණි එක් අයෙකු තුවාල ලබා පළා ගොස් ඇති අතර අනෙක් පුද්ගලයා වෙඩි වැදීමෙන් මිය ගියේය.
යතුරුපදියෙන් පැමිණි දෙදෙනාගෙන් මිය ගිය තැනැත්තා මහාධිකරණයේ පවතින නඩුවකට අදාළව වෙන්නප්පුව පොලීසියේ අත්සන් කිරීමට පැමිණ ආපසු යමින් සිටි අවස්ථාවේදී මෙම වෙඩි තැබීම සිදුව ඇත.
2025 සැප්තැම්බර් මස 09 වැනි දින මිය ගිය පුද්ගලයාගේ නඩුව සම්බන්ධව අධිකරණ තීන්දුව ලැබීමට නියමිතව තිබූ බවද පොලීසිය වැඩිදුරටත් පැවසීය.
