දූෂණ චෝදනා මත අල්ලස් කොමිසම විසින් අත්අඩංගුවට ගෙන අධිකරණයට ඉදිරිපත් කරනු ලැබූ තලවකැලේ ලිඳුල නගර සභාවේ හිටපු සභාපති අශෝක සේපාල ලබන 11 වනදා දක්වා රක්ෂිත බන්ධනාගාර ගත කරන ලෙස කොළඹ ප්රධාන මහෙස්ත්රාත් තනූජා ලක්මාලි අද (02) නියම කළාය.
තලවකැලේ ලිඳුල නගර සභාවේ සභාපතිවරයා වශයෙන් සැකකරු කටයුතු කරමින් සිටියදී එම නගර සභාවට අයත් අංක 12 දරණ මස්කඩ කාමරය බදු දීමේදී වැඩිම ලංසුව ඉදිරිපත් කළ තැනැත්තාට එය ලබා නොදී අඩුම ලංසුව ඉදිරිපත් කළ අයට එය ලබාදීමෙන් රජයට රුපියල් 2380000/- ක් පාඩු සිදු කළ බවට ඔහුට චෝදනා මත ඔහු අල්ලස් කොමිසමේ අත් අඩංගුවට පත් විය.
අධිකරණයට ඉදිරිපත් කළ ඇවස්ථාවේ දී හිටපු සභාපතිවරයාගේ නීතිඥ සැකකරු වෙනුවෙන් පෙනී සිටි නීතිඥ චමින්ද අතුකෝරාළ තම සේවාදායකයා ඇප මත මුදාහරින ලෙස ඉල්ලා සිටියත් සිද්ධියට අදාළ විමර්ශන තවදුරටත් සිදුවන බැවින් සැකකරු රක්ෂිත බන්ධනාගාර ගත කරන ලෙස අල්ලස් කොමිසමේ නිලධාරීහු ඉල්ලා සිටියහ.
ඉදිරිපත් වූ කරුණු සලකා බැලූ මහෙස්ත්රාත්වරිය සැකකරු ලබන 11 වනදා දක්වා රක්ෂිත බන්ධනාගාර ගත කරන ලෙස නියම කළාය.
