ගලගොඩඅත්තේ ඤාණසාර හිමියන් සතුව පාස්කු ප්රහාරය සම්බන්ධව විමර්ශනයට ඔබ්බෙන් ඇති විශේෂ රහසිගත තොරතුරක් ඇත්නම් පුරවැසියෙක් හා බුද්ධ පුත්රයෙක් ලෙස උන්වහන්සේ ගේ වගකීම මාධ්ය සාකච්ඡා පවත්වමින් යෑම නොව එම තොරතුර විමර්ශන අංශ වෙත විධිමත්ව ලබා දීම කැබිනට් මාධ්ය ප්රකාශක වෛද්ය නලින්ද ජයතිස්ස අද ( 26) පැවසුවේය.
ඔහු මේ බව ප්රකාශ කළේ පාස්කු ප්රහාරය සම්බන්ධව උන්වහන්සේ සතුව ඇති බව කියන විශේෂ තොරතුරක් ජනාධිපතිවරයාට ලබා දීමට කැමැත්තෙන් පසුවන බැවින් එම තොරතුර ලබා ගැනීමට රජය යුහුසුළු නොවන්නේ දැයි මාධ්යවේදියෙක් ඇසූ පැනයට පිළිතුර දෙමිනි.
කැබිනට් මාධ්ය ප්රකාශකවරයා පැවසුවේ මේ සිද්ධිය ගැන විමර්ශන කරන්නේ ජනාධිපතිවරයා නොව අදාල විමර්ශන අංශ බවය. අවශ්යතාවය මත ඤාණසාර හිමියන් අපරාධ පරීක්ෂණ දෙපාර්තමේන්තුව වෙත කැඳවනු ඇති බව ද කැබිනට් මාධ්ය ප්රකාශකවයා කීවේය.
ඔහු කීවේ මෙවැන්නකි.
“ගරුතර ඤාණසාර හිමි කියන ප්රකාශය විශේෂයෙන්ම ජාතික ආරක්ෂාව සම්බන්ධ ප්රශ්නයක දී පුරවැසියන් සියලු දෙනාටම වගකීමක් තියනවා තමන් යම් තොරතුරක් දන්නවා නම් ඒ තොරතුර අදාල තැන්වලට ඉදිරිපත් කරන්න.”
“ජනාධිපතිවරයා නෙමෙයි පරීක්ෂණ කරන්නේ. අපරාධ පරීක්ෂණ දෙපාර්තමේන්තුවෙන්. උන්වහන්සේ දන්නවා බුද්ධි අංශවල ඉන්නෙ කවුද කියලා. උන් වහන්සේට බොහොම පැහැදිලිව කියන්න පුලුවන් ගිහින් මෙන්න මගේ ලඟ තොරතුරක් තියනවා. දැනට අපරාධ පරීක්ෂණ දෙපාරේතමේන්තුවෙ කරන විමර්ශනවලට වඩා එහා ගිය තොරතුරක් මා සතුව තිබෙනවා කියලා දෙන්න පුලුවන්කමක් තියනවා.”
“අපරාධ පරීක්ෂණ දෙපාර්තමේන්තුව බොහොම මහන්සිවෙලා මේ සම්බන්ධයෙන් මේ නෙට්වර්ක් එක නිරාවරණය කරගෙන යනවා. මේ අවස්ථාවේ දී උන්වහන්සේ ගේ යුතුකම සහ වගකීම තමයි තමන් ලඟ එහෙම වෙන කවුරුත් නොදන්නා, අපරාධ පරීක්ෂණ දෙපාර්තමේන්තු විමර්ශකයින්ගෙන් ඔබ්බට ගිය ඉතාම වැදගත් සහ රහසිගත තොරතුරක් තියනවා නම් ඒ තොරතුර දැනුම් දෙන එක. එහෙම නැතිව මාධ්ය සාකච්ඡා තියමින් යන එක නෙමෙයි මම හිතන්නේ වගකීම පුරවැසියෙක් හා බුද්ධ පුත්රයෙක් හැටියට.”
මාධ්ය – “තොරතුරු දැනගෙන තොරතුරු වසන් කිරීම වරදක් නේද?”
නලින්ද – “ඔව්… ඒක නීතියෙන් වරදක්. මට ඒ ගැන දැන් කියන්න බෑ. ඒක අපරාධ පරීක්ෂණ දෙපාර්තමේන්තුව කරන පරීක්ෂණයට කොයිතරම් අදාලයි ද නැද්ද කියන එක මත ඒ කැඳවීම සිදුකරාවි.”
