ඉඳුනිල් කහටපිටිය –
පලස්තීනුවන් වෙනත් තැනක පදිංචි කිරීමෙන් පසු ගාසා තීරයේ අයිතිය එක්සත් ජනපදයට පවරාගෙන එය නැවත සංවර්ධනය කිරීමට අවශ්ය බව ඇමරිකානු ජනාධිපති ඩොනල්ඩ් ට්රම්ප් පවසයි.
මාස 15 කට වැඩි කාලයක් තිස්සේ පැවති විනාශකාරී ගැටුමකින් පසු ගාසා තීරයේ ජනතාවට යළි ජීවිතය ගොඩනගා ගැනීම සඳහා මානුෂීය ආධාර සහ ප්රතිසංස්කරණ සැපයුම් ඉහළ නැංවීම පිළිබඳ සපථ කළ පොරොන්දුව සමඟ මෙම සතියේ සාකච්ඡා වේගවත් වෙමින් පවතිද්දී ට්රම්ප්ගේ මෙම ප්රකෝපකාරී අදහස් පළ වී ඇත.
දැන් ට්රම්ප්ට අවශ්ය වන්නේ දළ වශයෙන් මිලියන 1.8 ක ජනතාවක් ඔවුන් නිජබිම ලෙස හැඳින්වූ භූමියෙන් ඉවත් කර ඇමරිකානු හමුදා සහිතව ගාසා තීරය එක්සත් ජනපද හිමිකමට පත් කර ගැනීමය.
ට්රම්ප් මෙම අදහස ඉදිරිපත් කරන්නේ ඊශ්රායල අගමැති බෙන්ජමින් නෙතන්යාහු සමඟ ධවල මන්දිරයේදී සාකච්ඡා පැවැත්වූ අවස්ථාවේදී ය. එහිදී නායකයින් දෙදෙනා ඊශ්රායල-හමාස් ගැටුමේ බිඳෙනසුලු සටන් විරාමය සහ ප්රාණ ඇපකරු ගිවිසුම පිළිබඳව ද සාකච්ඡා කළ අතර ඉරානය පිළිබඳ කනස්සල්ල බෙදාගත් බව විදෙස් මාධ්ය වාර්තා කළේය.
“මිනිස්සු ආපසු යා යුතු යැයි මම නොසිතමි” යනුවෙන් ට්රම්ප් පැවසීය. “ නමුත් ඔවුන්ට දැන් ගාසා තීරයේ ජීවත් විය නොහැකියි. මම හිතන්නේ අපට ඔවුන් සඳහා වෙනත් ස්ථානයක් අවශ්යයි. මම හිතන්නේ එය මිනිසුන් සතුටු කරන ස්ථානයක් විය යුතුයි.” ට්රම්ප් පවසා තිබිණි.
ඇමරිකා එක්සත් ජනපදය ගාසා තීරයේ හිමිකම ලබාගෙන පලස්තීනුවන් වෙනත් තැනක නැවත පදිංචි කිරීමෙන් පසු එය නැවත සංවර්ධනය කරන බවත්, එම භූමිය “මැද පෙරදිග නිවාඩුවක් ගත කළ හැකි සොඳරු වෙරළ තීරයක් සහිත භූමියක්” බවට පත් කරන බවත්, එහි “ පලස්තීනුවන් ඇතුළුව ලෝකයේ ජනතාව” ජීවත් වන බවත් ට්රම්ප් පැවසීය.
කෙසේ වෙතත් මේ අදහස සමග ඇමරිකා එක්සත් ජනපදය භූමිය අත්පත් කර ගැනීමට සහ එය සංවර්ධනය කිරීමට භාවිතා කරන අධිකාරිය පිළිබඳව කිසිදු විස්තරයක් ඉදිරිපත් නොකිරීමට ට්රම්ප් ප්රවේසම් වී තිබිණි. කෙසේ වෙතත් ගාසා තීරය ප්රතිසංස්කරණයට සහාය වීම සඳහා එක්සත් ජනපද හමුදා යෙදවීම ප්රතික්ෂේප නොකරන බව ද ට්රම්ප් පවසා තිබිණි. ඔහු අපේක්ෂා කරන්නේ ගාසා තීරයේ භූමිය නැවත සංවර්ධනය කිරීම සඳහා එහි “දිගුකාලීන” එක්සත් ජනපද හිමිකාරිත්වය ය.
“එය ලෝකයේ සුපිරි මට්ටමේ ව්යාපෘතියක් ලෙස කරන බවට අප සහතික වෙනවා. එය ජනතාවට අපූරු වනු ඇති… පලස්තීනුවන්, බොහෝ දුරට පලස්තීනුවන් ගැන අපි කතා කරන්නේ.” ට්රම්ප් පැවසීය. එම ප්රකාශය තුළ ගාසා තීරය තුළ සුපිරි පරිසරයක නැවත පලස්තීනුවන් පදිංචි කරවීම පිළිබඳව අදහස තිබිණි. එමෙන්ම පලස්තීනය සහ ඊශ්රයාලය වෙනම රාජ්ය දෙකක් ලෙස පිළිගැනීම ද ට්රම්ප් ගේ මතය තුළ විය.
ඔහු ගේ අදහසේ මේ මොහොතේ ප්රකාශිත සංක්ෂිප්තය ගාසා තීරය දිගුකාලීන ඇමරිකානු හිමිකමට යටත් කරගෙන භූමිය සංවර්ධනය කිරීමෙන් අනතුරුව පලස්තීනුවන් නැවත පදිංචි කිරීමය.
මැද පෙරදිග ප්රතිචාර
ඊජිප්තුව, ජෝර්දානය සහ මැද පෙරදිග අනෙකුත් එක්සත් ජනපද සහචරයින් ට්රම්ප්ට අනතුරු අඟවා ඇත්තේ පලස්තීනුවන් ගාසා තීරයෙන් නැවත පදිංචි කිරීම මැද පෙරදිග ස්ථාවරත්වයට තර්ජනයක් වනු ඇති බවය. ඉන් ගැටුම පුළුල් කිරීමේ අවදානමක් ඇති කරන බවය. එක්සත් ජනපදය සමග මේ ගැටලුව විසඳා ගැනීම සඳහා දශක ගණනාවක් තිස්සේ කරන ලද ප්රයත්නයන්ට වල කපන බවත්ය.
සෞදි අරාබියේ විදේශ අමාත්යාංශය ට්රම්ප්ට තියුණු වාචික ප්රතිචාරයක් නිකුත් කර තිබිණි. සෞදි අරාබිය දක්වා තිබුණේ ස්වාධීන පලස්තීන රාජ්යයක් සඳහා ඔවුන්ගේ දිගුකාලීන ඉල්ලීම ” ස්ථිර සහ නොසැලෙන ස්ථාවරයක්” බවය.
“අද ජාත්යන්තර ප්රජාවේ යුතුකම වන්නේ පලස්තීන ජනතාව විඳ දරාගන්නා දරුණු මානුෂික දුක් වේදනා සමනය කිරීමට කටයුතු කිරීමයි, ඔවුන් තම භූමිය වෙනුවෙන් කැපවී සිටිති. ඔවුන් එම භූමිය තුළ නොසැලී සිටිනු ඇති…” සෞදි අරාබිය ප්රකාශයේ සඳහන් විය.
කෙසේ වෙතත් තවමත් ට්රම්ප් අවධාරනය කරන්නේ “විශාල සුන්බුන් ගොඩක්” බවට පත් වි ඇති ගාසා තීරය අත්හැරීම හැර පලස්තීනුවන්ට “වෙනත් විකල්පයක් නොමැති බවය.
ජනාධිපතිවරයාගේ යෝජනාව ඩිමොක්රටික් පක්ෂය විසින් අනතුරු ඇඟවීමකින් සහ ඔහුගේ රිපබ්ලිකන් සහචරයින් විසින් යම් තරමක සැකයකින් යුතුව ප්රතිචාර දක්වා ඇත. ඩී-කොන් හි සෙනෙට් සභික ක්රිස් මර්ෆි ට්රම්ප්ගේ ප්රයත්නය ගැන මෙසේ පවසා තිබිණි. “ඔහුට අවශ්ය වන්නේ ඇමරිකානු ජීවිත දහස් ගණනක් බිලිගෙන මැදපෙරදිග වසර 20ක් පුරා ගිනි තබන ගාසා තීරයට ඇමරිකානු ආක්රමණයක් කිරීමටද? එහෙම හිතනවා නම් ඒක ලෙඩක්.”
