මනම්පිටිය නිමල් ජයරත්න –
පොළොන්නරුවේ ඇතැම් මහා පරිමාණ සහල් ව්යාපාරිකයන්ගෙන් තමන්ට තොග සහ සිල්ලර මිලට සහල් ලබා ගැනීමේදී කොන්දේසි ගණනාවකට යටත්ව සහල් ලබාගැනීමට සිදුවී ඇති බව පොළොන්නරුව, දිඹුලාගල වැලිකන්ද ඇතුළු අවට ප්රදේශවල සහල් වෙළෙඳුන් සඳහන් කරති.
රජය මගින් රුපියල් 230 ට නාඩු සහල් කිලෝවක් ලබාදෙන ලෙසට පාලන මිලක් නියම කරද, ඇතැම් මහා පරිමාණ සහල් ව්යාපාරිකයන් තමන්ට නාඩු කිලෝ එකක් රුපියල් 227 ක මිලකට ලබාදෙන බවත්, ඉන් වැඩි ලාභයක් නොමැති වුවද එම නාඩු සහල් ලබා ගැනීමේදී තමන්ට කීරි සම්බා, සහ සම්බා ලබා ගැනීමට අනිවාර්ය කර ඇති බවත්, නාඩු සහල් ලබාගැනීමේ සීයට හතළිහක් කීරි සම්බා, සහ සම්බා සහල් ලබාගැනීම අනිවාර්ය කර ඇති බවද දිඹුලාගල, සෙවණපිටිය, වැලිකන්ද, අරලගංවිල යන ප්රදේශවල සහල් වෙළඳුන් ප්රකාශ කරති.
සියයට හතළිහක ප්රමාණයක් කිරි සම්බා, සහ සම්බා සහල් ලබා නොගන්නේ නම්, නාඩු සහල් ලබාදීම මහා පරිමාණ ව්යාපාරිකයින් ප්රතික්ෂේප කරන බවද වෙළෙදෝ පවසති.
තවමත් මහා පාරිමාණ සහල් ව්යාපාරිකයන් තමන්ට සහල් තොග ලබා දෙන්නේ බරපතල කොන්දේසි පනවමින් බව පොළොන්නරුව සිල්ලර කඩ හිමියෝ රජයට දන්වා සිටිති.
පොළොන්නරුව සහල් පාරිභෝගිකයින් විශාල ප්රමාණයක් පාරිභෝජනයට ලබාගන්නේ නාඩු සහල් බවත්, මහා පරිමාණ සහල් ව්යාපාරිකයන් නාඩු සහල් ලබා දෙන්නේ සම්බා සහ කිරි සම්බා නිශ්චිත ප්රමාණයක් ලබා ගතහොත් පමණක් නමුත් ඒ කොන්දේසිය තමන්ට පාරිභෝගිකයන් වෙත පැනවිය නොහැකි බවත් සිල්ලර වෙළෙන්දෝ කියති.
මෙම තත්ත්වයට සාපේක්ෂව පොළොන්නරුවේ ඇතැම් සතොස වෙළඳසැල්වලද නාඩු සහල් හිඟයක් පවතින අතර, පාරිභෝගිකයන්ගේ ඉල්ලීමට ඒ අකාරයෙන්ම ලබා දීමට නොහැකි තත්ත්වයක් තුළ සතොස වෙළඳසල් වලද නාඩු සහල් ලබා දෙන්නේ සිමා කිරිමකට යටත්ව බවත් පෙනී ගොස් තිබේ.
සහල් අලෙවියේ දී තමන් මුහුණ දෙන ගැටලුකාරී තත්ත්වය පිළිබඳව අදාළ බලධාරීන්ගේ කඩිනම් අවධානය යොමු කරන ලෙස වෙළෙඳ ප්රජාව රජයට කියයි.
