මනම්පිටිය නිමල් ජයරත්න –
-
කිව්වට වැඩක් නෑ… බලධාරීන් බලන්නේ නෑ… සිංහපුර චේතියාලංකාර හිමි
කවුරුත් කියලා නෑ… ගිහින් බලන්නම්… පුරාවිද්යා දෙපාර්තමේන්තුව…
ඓතිහාසික දිඹුලාගල ආරණ්ය සේනාසනයේ කඳුමුදුනේ, නිදන්ගල ප්රදේශයේ මලියදේව මහරහතන් වහන්සේ සහ භක්කුල මහරහතන් වහන්සේ ධර්ම දේශනා කර ඇති බවට ජන වහරේ පැනෙන පිදුබිමේ ක්රිස්තු පූර්ව යුගයට අයත් ඓතිහාසික බෞද්ධ ආරාමි නටබුන් විනාශ කරමින් පුරාවස්තු සංහාරකයින් බිහිසුණු අපරාධයක් සිදුකර ඇති ආකාරය වාර්තා වේ.
නටබුන්ව පවතින ප්රධාන චෛත්යය ඇතුළු පරිවාස චෛත්යයත්, සඳකඩ පහණ, මල් ආසන, සහිත පෞරාණික පුරාවස්තු රැසක් මෙම ම්ලේච්ඡ සංහාරකයින්ගේ ග්රහණයට හසු වී තිබේ.
මේ පිළිබඳව ආරක්ෂක අංශ නිලධාරීන් සහ පුරාවිද්යා නිලධාරීන් දැනුවත් කළ ද ඊට මෙතෙක් කිසිදු නියමානුකූල විසඳුමක් ගෙන නොමැති බව ද දක්නට ඇත.
කඳු මුදුනේ තිබූ ඉපැරණි චෛත්යය, සඳකඩපහන්, ඇතුළු වටිනා පුරාවස්තු ස්ථාන හොරුන් විසින් වැනසිම නිසා ඓතිහාසික උරුමය අනාගතයට ආරක්ෂා කිරීමේ ජාතික වගකීම ගිලිහී ගොස් ඇති ආකාරයත්, ජාතියක් ලෙස අප සියලු දෙනාම හිස් මිනිසුන් බවට පත්වන තත්ත්වයක් නිර්මාණය වී ඇති ආකාරයත් පුල්ලිගොඩ රජමහා විහාරාධිපති සිංහපුර චේතියාලංකාර නාහිමියෝ සඳහන් කලහ.
නිදන් හෑරීමෙන් අනතුරුව හොරුන් විසින් දමා ගිය වයර්, පහන්, බාල්දි, තාච්චි, ඇතුළු උපකරණ කිහිපයක් ප්රදේශවාසීන් විසින් සොයාගෙන තිබේ.
මීට දින කිහිපයකට පෙර සිට ඓතිහාසික දිඹුලාගල ආරණ්ය සේනාසනයේ නිදන්ගල ප්රදේශයේ පුරාවස්තු සංහාරකයින් බරපතල විනාශයක් කරගෙන ගොස් ඇති බවට තොරතුරු අනාවරණය වී ඇත, රාත්රී කාලයේදී කඳු මුදුනේ ගල්වෙඩි දමන ශබ්ද පවා තමන්ට ඇසුණු බව ද ඒ පිළිබඳ අදාළ බලධාරීන් දැනුවත් කළද, බලධාරීන් නිහඬ පිළිවෙතක් අනුගමනය කිරීම කණගාටුවට කරුණක් බව ද සිංහපුර චේතියාලංකාර නාහිමියෝ ලංකාසරට පැවසූහ.
පොළොන්නරුව ඇතුළු අවට ප්රදේශය සංචාරක ව්යාපාරයක් ආරම්භ කිරීමට සැලසුම් කර තිබුණද, එම සංචාරකයන්ට දැක බලා ගැනීමට පවතින, ඓතිහාසික දිඹුලාගල ආරණ්ය සේනාසනයේ පුරාවස්තු මෙන්ම පෞරාණක සිද්ධස්ථාන මෙලෙස පුරාවස්තු සංහාරකයින් විසින් විනාශ කරන්නේ නම් සංචාරක ව්යාපාරයට පාදක කරගන්නේ මොනවාදැයි නා හිමියෝ නව රජයේ සංස්කෘතික ඇමතිවරයාගෙන් විමසති.
මෙම පුරාවස්තු විනාශ කිරීම පිළිබඳව දිඹුලාගල පුරාවිද්යා කාර්යාලයෙන් දුරකථනයෙන් කල විමසීමකදි එහි නිලධාරීයෙකු සඳහන් කළේ, ගම්වාසීන් සහ නාහිමියන් ඒ පිළිබඳව තම කාර්යාලය දැනුවත් කර නොමැති බවය. ,තමන් එම ස්ථානයට ගොස් ඒ සම්බන්ධයෙන් පරීක්ෂණයක් සිදු කිරීමට කටයුතු කරන බව ද එම නිලධාරියා පැවසුවේය.
