මනම්පිටිය නිමල් ජයරත්න –
සිරිපුර රන්කෙත්ගම ප්රදේශයේදී පුද්ගලයන් දෙදෙනෙකුට අයුතු බලපෑම් හා තර්ජනය කර ඔවුන් සතුව තිබූ රුපියල් තුන්ලක්ෂ අනූ දාහක මුදලක් සහ පවුම් හතරහමාරක් බරැති රන් භාණ්ඩ කොල්ලකෑ බව කියන පැමිණිල්ලක් මත සිරිපුර පොලිස් ස්ථානයේ පොලිස් කොස්තාපල් කෙනෙක් අද (19 ) සවස අත්අඩංගුවට ගත් බව පොළොන්නරුව කොට්ඨාස අපරාධ විමර්ශන අංශය සඳහන් කරයි.
මෙම සිද්ධියට සම්බන්ධ සිරිපුර පොලිස් ස්ථානයේ තවත් පොලිස් කොස්තාපල් දෙදෙනෙකු අත්අඩංගුවට ගැනීමට නියමිත බවද කොට්ඨාස අපරාධ විමර්ශන අංශයේ උසස් නිලධාරියකු අප කළ විමසීමකදී පැවසීය.
මෙම සිද්ධියට සම්බන්ධ අත්අඩංගුවට ගත් සැකකාර පොලිස් කොස්තාපල්වරයා දෙහිඅත්තකන්ඩිය මහේස්ත්රාත් අධිකරණයට ඉදිරිපත් කිරීමෙන් අනතුරුව දෙසැම්බර් 24 වෙනිදා දක්වා රක්ෂිත බන්ධනාගාරගත කිරිමට එම මහේස්ත්රාත්වරයා නියෝග කොට ඇත.
සිද්ධියට සම්බන්ධ, අත්අඩංගුවට ගෙන අධිකරණයට ඉදිරිපත් කෙරු පොලිස් කොස්තාපල්වරයාගේ වැඩ තහනම් කෙරු බව පොළොන්නරුව ජ්යෙෂ්ඨ පොලිස් අධිකාරී නිශාන් ද සිල්වා අප කළ විමසීමකදී පැවසීය.
මාතර උස්ගොඩ තෙලිජ්ජිවල ලිපිනයේ පදිංචිව සිටි, දේශීය වෙද මහතෙකු, සිරිපුර ප්රදේශයේ අසනීප අයෙකුට ප්රතිකාර කිරීමට බව පවසා, පුද්ගලයන් කිහිප දෙනෙකු සමග සැලසුම් සහගතව අදාල පොලිස් නිලධාරින් තිදෙනා විසින් සිරිපුර ප්රදේශයට ගෙන්වාගෙන තිබේ.
පසුව එම වෙද මහතා සිරිපුර රන්කෙත්ගම වැව ආසන්නයට රැගෙන ගොස් රෝගියාට ප්රතිකාර කිරීමේදී, නිධානයකින් ලබාගත් ගල්පෙට්ටියක් තිබෙන බවට පුද්ගලයන් දෙදෙනෙකු වෙද මහතා දැනුවත්කොට කොට ඇත.
එහිදී සැලසුම් සහගතව වැටලීම සිදු කරන ආකාරයෙන් පැමිණි පොලිස් නිලධාරින් තිදෙනා එම සිද්ධිය වීඩියෝ කර මාධ්ය මගින් ප්රසිද්ධ කරන බවට බියගන්වා,තර්ජනය කර, වෙද මහතාගෙන් සහ පැමිණිලි කල අනිත් දෙදෙනාගේ මුදල් සහ රන් භාණ්ඩ පොලිස් නිලධාරින් තිදෙනා විසින් කොල්ලකෑ බවට සිරිපුර පොලිසියට පැමිණිල්ලක් සිදුකර තිබේ.
ඒ අනුව මෙම සිද්ධියට මූලික වූ සිරිපුර ප්රදේශයේ පදිංචි තිදෙනෙකු දෙසැම්බර් 18 වෙනිදා අත්අඩංගුවට ගෙන ඔවුන් දෙහිඅත්තකණ්ඩිය මහේස්ත්රාත් අධිකරණයට ඉදිරිපත් කිරීමෙන් අනතුරුව දෙසැම්බර් 24 වෙනිදා හඳුනා ගැනීමේ පෙරට්ටුවට ඉදිරිපත් කිරීමට කටයුතු කර ඇති බවද කොට්ටාස අපරාධ විමර්ශන අංශය සඳහන් කරයි.
පොළොන්නරුව ජ්යෙෂ්ඨ පොලිස් අධිකාරී නිශාන් ද සිල්වාගේ උපදෙස් මත, පොළොන්නරුව කොට්ඨාස අපරාධ විමර්ශන අංශයේ ස්ථානාධිපති, ප්රධාන පොලිස් පරීක්ෂක ජේ.පී.ආර්. ජාගොඩආරච්චි, පොලිස් පරීක්ෂක ඒ.ටී. බණ්ඩාර ඇතුළු පොලිස් නිලධාරි කණ්ඩායමක් විසින් විමර්ශන කටයුතු කිරීමෙන් පසු මෙම පොලිස් නිලධාරියා අත්අඩංගුවට ගෙන අධිකරණයට ඉදිරිපත් කර තිබේ.
