මනම්පිටිය නිමල් ජයරත්න –
පසුගිය වසර 13 ඇතුළත මෙරටේ ආපදා කළමනාකරණයේදි ක්රියාත්මක කළ ව්යාපෘතිවලදී ආපදාවන් ඇතිවීම පාලනය නොවූ බවට විගණකාධිපති වාර්තා මගින් රටට හෙලිවී ඇති බවත්, ආපදා කළමනාකරණ මධ්යස්ථානය නිලධාරීන් විසින් මෙරට ආපදාවන්හිදී ජනතාවට සහන සැලසීම පිලිබඳව සාවද්ය කරුණු සමාජ ගත කරන බවත්, සමස්ත ලංකා ආපදා සහන සේවා නිලධාරීන්ගේ වෘත්තිය සංගමය පවසයි.
වෘත්තීය සංගමය එම අදහස් පලකර සිටියේ ඊයේ ( 07 ) පොළොන්නරුවේ පැවති මාධ්ය හමුවකට සහභාගි වෙමිනි.
මෙහිදී වැඩිදුරටත් අදහස් දක්වමින් සමස්ත ලංකා ආපදා සහන සේවා නිලධාරීන්ගේ වෘත්තිය සංගමයේ සභාපති එම්.ජී.පී. උපුල් කුමාර තම අදහස් මෙසේ දක්වා සිටියේය.
”පසුගිය දිනවල මෙරට ඇතිවුන ආපදා තත්වයෙන් මේ රටේ ජනතාව බේරා ගැනීමට හා සහන සැලසීමට කඩිනමින් ඊට අවශ්ය සියලු කටයුතු සඳහා මැදිහත් වුනා, ඒ වෙනුවෙන් කටයුතු කළ ජනාධිපතිවරයාටත්, රජයටත් ආපදා කළමනාකරණ මධ්යස්ථානයටත් අපි ස්තූතිවන්ත වෙනවා.”
ආපදා කළමනාකරණ මධ්යස්ථාන නිලධාරීන් විසින් ආපදාවන් හේතුවෙන් පීඩාවන්ට පත්වූවන්ට සහන සැලසීම පිලිබදව මාධ්ය හරහා පසුගියදා සාවද්ය තොරතුරු ප්රකාශ කිරීමෙන් වැරදි තොරතුරු සමාජගත වෙලා තියෙනවා. ඒක බරපතල තත්වයක්. එහිදී ආපදා අවම කිරීමේ අධ්යක්ෂකවරිය වන අනෝජා සෙනෙවිරත්න මහත්මිය, සහන සේවා කදවුරුවල රැදී සිටින අවතැන්වූ එක් පුද්ගලයෙකුට දිනක් සඳහා ජාතික ආපදා සහන සේවා මධ්යස්ථානයෙන් රුපියල් 900 ක් වෙන් කරන බව ඒ මාධ්ය වැඩසටහනේදී ප්රකාශ කළා. නමුත් ඒක අසත්ය ප්රකාශයක්. ඒ අවතැන්වූ එක් පුද්ගලයෙකුට වෙන් වෙන්නේ රුපියල් 600 යි.
මෙරට අපදා කළමනාකරණ මධ්යස්ථානය පසුගිය කාලයේ ක්රියාත්මක කරනු ලැබූ ආපදා කළමනාකරණ වැඩසටහන් මගින් ආපදාවන් මැඩ පැවැත්විමට අපොහොසත් වීම පිලිබදව වාර්තාවෙන් එලිවෙලා තියෙනවා. ඒ ආපදාවන් වැළැක්වීමේ ව්යාපෘති සඳහා පහුගිය අවුරුදු 13 සඳහා ආපදා කළමණාකරණ මධ්යස්ථානය මගින් රුපියල් මිලියන 3250ක් වෙන්කරලා තියෙනවා. නමුත් ඒ මුදල් වලින් ආපදාවන් වලක්වා ගැනීමට නිසි ලෙස මුදල් යොදා නොමැති බවට විගණකාධිපති වාර්තාවෙන් මේ වනවිට අනාවරණය වෙලා තියෙනවා. ආපදා කළමනාකරණ වැඩසටහන්වලට වෙන් කරපු සල්ලි වලට මොකද උනේ.
ආපදාවන් ඇති නොවෙන්න කටයුතු කරන්න බැරි උනානම් ඒ වැඩසටහන් අසාර්ථකයි කියලයි අනාවරණය වෙලා තියෙන්නෙ. ඒ මුදල්වලට මොනවද උනේ කියල රටේ ජනතාව දැන ගත යුතුයි. රටේ ආපදාවන් ඇති වීම වැළැක්වීම සඳහා ක්රියාත්මක කළ වැඩසටහන් වෙනුවෙන් කොච්චර මුදලක් වියදම් කළාද කියලා ඒ වැඩසටහන් ක්රියාත්මක කල නිලධාරීන්ට එරෙහිව විගණනයක් කරලා රටට හෙලි කරන්න කියල අපි කියනවා.
අගෝස්තු මාසයේ ඉඳන් ආපදා සහන සේවා නිලධාරීන්ගේ, රුපියල් 3,000 ක ගමන් වියදම් දීමනාව මෙතෙක් ලබා දීලා නෑ. ඒ නිසා ගමන් වියදම් දීමනාව ලබාදෙන ලෙසට රජයෙන් අපි ඉල්ලා සිටිනවා. යැයි ද උපුල් කුමාර මෙහිදී හෙළිදරව් කළේය.
