විෂය ප්රමාණික විද්වත් පරිපාලකයින් කණ්ඩායමක් නව ආණ්ඩුකාරවරුන් ලෙස පත් කිරීමට ජනාධිපතිවරයා කටයුතු කර තිබේ.
මධ්යම පළාත් නව ආණ්ඩුකාරවරයා ලෙස පේරාදෙණිය විශ්වවිද්යාලයේ හිටපු උපකුලපති මහාචාර්ය සරත් අබේකෝන් පත්කර ඇත.
උතුරු පළාත් නව ආණ්ඩුකාරවරයා ලෙස නාගලිංගම් වේදනායගම් දිවුරුම්දී තිබේ. නාගලිංගම් වේදනායගම් යනු විශිෂ්ට රාජ්ය පරිපාලකයෙකි. ඔහු උතුරු පළාත තුළ ඉතිහාසයේ මෙතෙක් දීර්ඝම සේවා කාලය සම්පූර්ණ කර විශ්රාම ගිය දිසාපතිවරයාය. ඔහු යාපනය දිසාපතිවරයා ලෙස මෙන්ම කිලිනොච්චිය සහ මුලතිව් දිසාපතිවරයා ලෙසද කටයුතු කර තිබිණි.
දකුණු පළාත් නව ආණ්ඩුකාරවරයා ලෙස ජ්යේෂ්ඨ පාරිපාලන නිලධාරී බන්දුල හරිස්චන්ද්ර දිවුරුම්දී තිබේ. බන්දුල හරිශ්චන්ද්රයන් හිටපු අමාත්යාංශ ලේකම්වරයෙකි.
මහාචාර්ය ජයන්ත ලාල් රත්නසේකර නැගෙනහිර පළාත් ආණ්ඩුකාරවරයා ලෙස දිවුරුම දී ඇත. ජයන්ත ලාල් රත්නසේකර ඌව විශ්වවිද්යාලයේ හිටපු උප කුලපතිය.
සබරගමුව පළාත් ආණ්ඩුකාරවරිය ලෙස විශ්රාමික ශ්රේෂ්ඨාධිකරණ විනිසුරු චම්පා ජානකී රාජරත්න පත්කර ඇත. ඇය පසුගිය යහපාලන රජය සමයේ පිහිටවූ වංචා දූෂණ සම්බන්ධයෙන් විභාග සිදුවන ශ්රේෂ්ඨාධිකරණ ත්රිපුද්ගල විනිසුරු මඩුල්ලේ සාමාජිකාවකි.
ඌව ආණ්ඩුකාරවරයා කපිල ජයසේකර ය. ඔහු දක්ෂ පරිපාලකයෙකි. විදුලිබල හා බලශක්ති අමාත්යාංශය, ක්රීඩා සංචාරක අමාත්යාංශය, ජාතික ප්රතිපත්ති සහ ආර්ථික කටයුතු පිළිබඳ රාජ්ය අමාත්යාංශය, වාරිමාර්ග, ජල සම්පත් සහ ආපදා කළමනාකරණ රාජ්ය අමාත්යාංශය යන අමාත්යාංශවල හිටපු ලේකම් වරයෙකි.
බස්නාහිර පළාත් ආණ්ඩුකාරවරයා ලෙස පත්වන්නේ එක්ස්පෝලංකා සමූහ ව්යාපාරයේ නිර්මාතෘ සහ ශ්රී ලංකාවේ ව්යාපාරික ක්ෂේත්රයේ කැපීපෙනෙන චරිතයක් වන හනීෆ් යූසුෆ් ය. ගෝලීය වෙළඳාම වෙනුවෙන් සිය දායකත්වය සඳහා ප්රසිද්ධ යූසුෆ් විසින් බිහිකළ Expolanka Holdings PLC යනු, 2021 ඔක්තෝම්බර් 22 වන විට කොළඹ කොටස් වෙළඳපොලේ එක්සත් ජනපද ඩොලර් බිලියන 2ක වෙළඳපොළ වටිනාකමක් රූපණය කළ ආයතනයකි. Expolanka Holdings එම තත්ත්වය අත්පත් කරගත් ශ්රී ලංකාවේ පළමු සමාගම වේ.
