වර්ෂ 2022 පමණක් නොව 2002 දී මේ රට බේරා ගත්තේත් රනිල් වික්රමසිංහ බවත්, යුද්ධ කළ අයට යුද්ධය කිරීම සදහා අඩිතාලම දැමූ රනිල් වික්රමසිංහගේ කාර්යය භාර්යය කාට අමතක උනත් උතුරේ ජනතාවට මතක බවත් හිටපු රාජ්ය ඇමතිනී විජයකලා මහේස්වරන් ඊයේ ( 9 ) යාපනයේදී පැවසීය.
යාපනයේ සංගිලියන් උද්යානයේ පැවති රැස්වීමකින් අනතුරුව මාධ්යයට අදහස් පල කළ ඇය මේ බව කියා සිටියාය.
වැඩිදුරටත් එම අවස්ථාවේදී අදහස් දැක් වූ විජයකලා මහේස්වරන් හිටපු අමාත්යවරිය මෙසේද කීවාය.
‘’ බොහෝ දෙනෙකු මේ දවස්වල කියන්නේ රනිල් වික්රමසිංහ ජනාධිපතිවරයා 2022 වසරේ මේ රට ආර්ථික ප්රපාතයකට ඇද වටුණු අවස්ථාවේදී ඔහු රට බේරා ගත් කතාව පමණයි. නමුත් උතුරේ ජීවත් වන අප දන්නා කාරණයක් වන්නේ රනිල් වික්රමසිංහ මහතා 2002 වසරේදී යුද්ධය ප්රබලව පැවති සමයේදී එල්.ටී.ටී.ඊ. සංවිධානය සමග සාකච්ඡා කොට සටන් විරාම ගිවිසුමකට ආවා. එක් වරටම මහා යුද්ධයක් නතර වුණා . එදා දෙපිරිස අතර අත්සන් කළ ගිවිසුම නිසා මිනිස්සු මැරෙන එක මිනිස්සුන්ට හිරිහැර සිදු එන එක සම්පූර්ණයෙන්ම නැවතුණා.”
“පසුකාලීනව යුද්ධය හමාර කිරීමට මහන්සි වුණු පිරිසට යුද්ධය හමාර කරන්නට මූලික අඩිතාලම දමා දුන්නේ රනිල් වික්රමසිංහ මහතාය කියන කාරණය දැන් විශාල පිරිසකට මතක නෑ. නමුත් යුද්ධයෙන් බැට කෑ උතුරු නැගෙනහිර දෙමළ වැසියන්ට මේ ඉතිහාසය ඉතා හොදින්ම මතකයි. ඒක නිසා ඔවුන් 2022 ගැන හිතනවට වඩා යුද්ධ කාලේ ඔවුන්ට ලැබුණු නිදහස ගැන හිතලා එතුමාට ඡන්දය ලබා දෙනවා. ඒක නියතයි.”
