දිනසේන රතුගමගේ –
එල්.ටී.ටී.ඊ. සංවිධානය සතු අවි ආයුධ රත්තරන් හා මුදල් තොගයක් වළ දමා තිබූ ස්ථානයක් පිළිබඳව මුලතිව් ආරක්ෂක අංශවලට ලැබුණු තොරතුරක් මත පුදුකුඩීඉරිප්පු මණ්ඩුවිල් ප්රදේශයේ ස්ථානයක කැණීම් කටයුතු 17 දා ආරම්හ කළේය.
මුලතිව් ආරක්ෂක අංශ වෙත ලැබී තිබූ එම තොරතුරට අනුව පුදුකුඩීඉරිප්පු පොලීසිය දැණුවත් කොට පොලීසිය හරහා ලබා ගත් අධිකරණ නියෝගයක් මත මෙම කැණීම් ආරම්භ කොට තිබේ.
මුලතිව් දිස්ත්රික් මහේස්ත්රාත් ධර්මලිංගම් ප්රදීපන් ද මෙම කැණීම් කටයුතු නිරීක්ෂණය කිරීමට එම ස්ථානයට පැමිණි අතර ඊට අමතරව පළාතේ ග්රාම නිලධාරීවරයා පුරාවිද්යා නිලධාරීන් ප්රාදේශීය ලේකම් වරයා ඇතුලු පිරිසක්ද සහභාගී වී සිටියහ.
බැකෝ යන්ත්රයක් යොදා ගෙන මෙම කැණීම් ආරම්භ කළ අතර එම කැණීම් සිදුවන ආකාරය වාර්තා කිරීමට මාධ්යවේදීන්ට ද මුලතිව් අධිකරණය මගින් නිකුත් කළ අධිකරණ නියෝගයෙන්ම අවසර ලැබී තිබුණි.
මුලතිව් ප්රදේශයේ එල්.ටී.ටී.ඊ. සංවිධානය සතු අවි ආයුධ මුදල් හා රත්තරන් වළ දමා ඇති බවට ලද තොරතුවලට අනුව මෙතෙක් ස්ථාන 34 ක කැනීම් සිදු කොට ඇති නමුත් ඒ එකම ස්ථානයකින් හෝ කිසිවක් හමු නොවීම විශේෂත්වයකි.
මුලතිව් ආරක්ෂක අංශ මේ පිළිබදව අදහස් දක්වමින් කියා සිටින්නේ මීට වසර විස්සකට පමණ ඉහතදී මෙම ද්රව්ය වළ දමා ඇති නිසා එදා තිබූ පොලොවේ ස්වභාවය හා ස්ථානයේ පිහිටීම මේ වන විට වෙනස් වී තිබීම මත තොරතුරු ලබා දෙන පුද්ගලයින් පෙන්වන ස්ථාන වැරදි සහගත වන බවයි.
එදා තිබූ ගොඩනැගිලි ගස් කොලන් හා ගල් වල මතකය මත තොරතුරු ලබා දෙන නමුත් මේ වන විට පරිසරය වෙනස්වීම නිසා මේ තත්ත්වය උද්ගත වී ඇති බව ආරක්ෂක අංශ පවසයි.
