යාල විනෝද සංචාරයක ගිය නාගරික සංවර්ධන හා නිවාස ඇමති ප්රසන්න රණතුංග අමති දියණයගේ ලක්ෂ විසි පහක් වටිනා මගුල් මුද්දක් නැතිවීම නිසා ඊයේ කිරින්ද පොලිසියට දැවැන්ත මෙහෙයුමක් කරන්නට සිදුවූ බව පොලිස් ආරංචි මාර්ග වාර්තා කරන්නේය.
වාර්තාවන පරිදි සිද්ධිය මෙසේය.
ප්රසන්න රණතුංග ඇමති දියණියත්, ඇයගේ පවුලේ ඇත්තන් සහ හිතවතුන් කීප දෙනෙකුත් පෙරේදා යාල විනෝද චාරිකාවක් ගියේය. ඔවුන් නැවතී සිටි හෝටලයේ එදින සිටියේ ඔවුන් පමණය.
ඊයේ දහවල් පිරිස ඇවිදින්නට ගොස් පැමිණ ඇඟපත සෝදා ගන්නා අවස්ථාවේ ඇමති දියණිය සිය විසිපන් ලක්ෂයේ මගුල් මුද්ද ගලවා නාන කාමරයේ උස් බිත්තිය මත තැබුවාය. පරිසර හිතකාමී හෝටලයක්වන එම හෝටලයේ නාන කාමර නිර්මාණය කර තිබුණේ බිත්තිවලින් වටවූ වහලක් නැති විවෘත අවකාශයකය.
ඇමති දියණියට මුද්ද ගන්නට අමතක වී ආවාය. පිරිස සමග සාද කතාවේ නිරතවෙමින් පැය කීපයක් ගත වනවිට මුද්ද සිහි වී බලන විට එය තිබූ තැන නැත.
වහාම කිරින්ද පොලිසියට දුරකථන ඇමතුමක් දී සිද්ධිය දැන්නුවේය. පොලිසිය පැමිණිල්ල සටහන් කරගැනීමට හෝටලයට ආවේය.
හෝටල් කළමනාකාරිත්වය සහ එම කාමරය භාර තරුණයා පැහැදිලිවම කීවේ මුද්ද තමන් නොගත් බවය. එහෙත් පොලිසිය එය විශ්වාස කළේ නැත. කළමණාකරු සහ තරුණයාත් රැගෙන කිරින්ද පොලිසියට ගියේය. ප්රකාශ සටහන් කර ගැනුණි. ඔවුන් පැවසුවේ මේ ගැන තමුන් කිසිවක් නොදන්නා බවය.
අවසානයේ දී සීසීටීවී දර්ශන පරීක්ෂා කෙරිනි. සීසීටීවී දර්ශවනවල අපහැදිලි ඡායාවක් එම මුද්ද නැතිවූ ස්ථානයේ සිට පිටවී යන වග පෙනෙන දර්ශනයක් සටහන් වී තිබිණි.
හෝටල් කළමණාකාරිත්වයට අමතරව හෝටලයේ රැඳී සිටි පුද්ගලයින් කවුරුන්දැයි විමසා බලන විට පෙදරේරුවන් තිදෙනෙක් සිටි බවත් එක් පෙදරේරුවෙක් අද (14) ගෙදර යන්නට සූදානම් වන බවත් පොලිසියට දැගන්නට ලැබිණි.
ඔහුව කැඳවා අද උදෑසන (14) ප්රශ්න කරන විට ඔහු පවසා තිබුණේ දිලිසෙන දෙයක් බිත්ති කණ්ඩිය මත දුටු නිසා එය තමන් අරගත් බවය.
“ උඹ දන්නව ද ඒ මුද්ද කාගෙද කියලා. මේ ඇමති තුමාගෙ දුවගෙ. ඒකෙ වටිනාකම ලක්ෂ 25ක් උඹ ඒක දන්නව ද?“
හෙම්බත් වී සිටි පොලිස් නිලධාරීන් ඉහවහා ගිය කේන්තියෙන් පෙදරේරුවා විමසුවේය.
“ බුදු අම්මේ සර්… ලක්ෂ විසිපහක්… කවුද දෙයියනේ මුද්දක් එච්චර ගණන් වග දන්නෙ“
පෙදරේරුවා ඇස් උඩ තියාගෙන උත්තර දී තිබිණි.
