හිටපු ජනාධිපති රනිල් වික්රමසිංහ සහභාගී වී තිබුණේ නිල නිවේදනයකට අනුව සැලසුම් කළ නිල සංචාරයකට බවත් පැමිණිල්ල නිසි කරුණු දැක්වීමකින් තොරව සිය සේවාදායකයා අත් අඩංගුවට ගත් බවත් රනිල් වික්රමසිංහ වෙනුවෙන් අධිකරණය ඉදිරියේ පෙනී සිටි ජනාධිපති නීතිඥ තිලක් මාරපන කියා සිටියේය.
එමෙන්ම ඔහු අධිකරණයට දන්වා සිටියේ සිය සේවාදායකයා දැඩි සත්කාර ඒකකයට ඇතුළත් කිරීමට සිදුවූයේ නඩු දිනයේ ඇති වූ සුවිශේෂී තත්ත්වයන් මත බවය. .
ජනාධිපති නීතිඥ තිලක් මාරපන මෙසේ පැවසුවේය.
“මගේ සේවාදායකයා ලැබුණ නිල සංචාරයක් අනුව පිටත් වී ගිය නිල සංචාරයක් මේ. පැමිණිල්ල නිසි සොයා බැලීමකින් තොරව මොහු අත් අඩංගුවට ගත්තේ.”
“මොහුව එදා අත් අඩංගුවට ගත් දවසේ කන්නවත් නෑ මොහුට. පැය 10ක් විතර නඩුවේ. හෘද රෝගියෙක් මේ. ඒ නිසා මොහුව දැඩි සත්කාර එක්කයට යොමු කරන්න වුනේ.”
එහිදී මහේස්ත්රාත්වරයා “පෙර නඩු දිනයේ හැබැයි සැකකරුට තියෙන්න ඕන ලෙඩ ඔක්කොම තියනවා කියලා කරුණු දැක්වීමක් සිදුකර තිබෙනවා නේදැ”යි විමසා සිටියේය.
එහිදී ජනාධිපති නීතිඥවරයා පැවසුවේ ඔහුට රෝහල්ගත වීමට සිදුවූයේ නඩු දිනයේ දවසේ ඇතිවූ තත්ත්වයන් නිසා බවය.
“ස්වාමීනි… මොහු හෘද රෝගියෙක්. ඒ නිසා තමයි අයිසීයූ දාන්න වුනේ.”
හිටපු ජනාධිපති රනිල් වික්රමසිංහගේ හෘදයේ අවහිරතා කීපයක් තිබුණ ද ඒවා මගහැර රුධිරය වෙනත් තැනකින් ගලා යන බව ද ජනාධිපති නීතිඥවරයා කීවේය.
“ස්වාමීනී… මගේ සේවාදායකයාගේ හෘදයේ බ්ලොක් කීපයක් තියනවා. මොහු හෘද රෝගවලට බෙහෙත් ගන්නවා. මේ සම්බන්දයෙන් සිංගප්පූරුවේ සිදුකළ පරීක්ෂණයකින් අනාවරණය වුනා සැකකරුගේ හෘදයේ බ්ලොක් කීපයක්ම තිබෙන නමුත් අවහිර වු තැන්වල ලේ වෙනත් තැනකින් ගලා යන බව.”
