මෙරට සහල් නිෂ්පාදනයට අවශ්ය වී තොග දැනට ක්රියාත්මක සහල් මෝල්වලටත් අවශ්ය පරිදි සපයා ගැනීමේ බරපතල දුෂ්කරතාවක් පවතින පසුබිමක් තුළ සහ තවමත් රජය මගින් නියම කරන ලද මිලට සහල් මිලදී ගැනීමට පාරිභෝගිකයන්ට ඉඩකඩ සලසා නොමැති පසුබිමක් තුළ අධික මුදලක් වියදම් කර තවත් සහල් මෝල් පහක් දිස්ත්රික්ක පහක රජය මැදිහත්වීමෙන් ක්රියාත්මක කිරීමට කටයුතු යෙදෙමින් පවතින බව වාර්තා වේ.
වෙළෙඳ අමාත්යංශය විසින් ඉදිරිපත් කරන ලද මෙම කැබිනට් පත්රිකාවෙන් සඳහන් කොට ඇත්තේ සමුපකාර සේවා අලෙවි සංවර්ධන හා පාරිභෝගික ආරක්ෂණ රාජ්ය අමාත්යංශය විසින් සහල් නිෂ්පාදනය කර සමුපකාර ජාලය හරහා සහල් අලෙවි කිරීමේ ක්රමෝපායයක් ලෙස නවීන තාක්ෂණයෙන් යුතු සහල් මෝල් පහක් අනුරාධපුර, කුරුණෑගල, මඩකලපුව , අම්පාර සහ හම්බන්තොට යන දිස්ත්රික්කවල ඉදි කිරීමටය.
මේ වනවිට මෙරට මහා පරිමාණ සහල් නිෂ්පාදකයන් සුළු සහ මධ්ය පරිමාණ නිෂ්පාදකයන් අතුළු සහල් නිෂ්පාදකයන් සතුව මෝල් දෙදහසකට අධික ප්රමාණයක් පවතින අතර සතොස ආයතනය සතුවද සාර්ථක මොල් දෙකක් පවතී.
මෙම සහල් මෝල්වලටද මේ වනවිට සහල් නිෂ්පාදනය කර ගැනිමට ප්රමාණවත් වී තොග නොමැති කමින් මහත් අසීරුතාවට ලක්ව තිබේ.
මේ තත්ත්වයට හේතු වී ඇත්තේ ගොවි ජනතාව විසින් නිපදවනු ලබන වී තොග අතරමැදි තොග රැස්කරන්නන් විසින් අඩු මිලට ලබාගෙන වැඩි මිලට විකිණීම සඳහා රැස් කිරීම බවත් එම ප්රශ්නයට විසඳුමක් ලබා දැනට පවතින සහල් මෝල්වලට අවශ්ය වී ලබා දෙන ලෙස සහල් මෝල් හිමියෝ පසුගිය කාලය පුරාම රජයෙන් ඉල්ලා සිටියහ.
මෙම ඉල්ලීමට නිසි විසඳුමක් ලබා දීමට තවමත් අපොහොසත් වී ඇති රජය පසුගිය සතියේ පැවති කැබිනට් රැස්වීමේ දී ගත් මෙම තීරණය පවතින සහල් වෙළෙඳපොළ ගැටලුවට කිසිදු විසඳුමක් ලබා නොදෙන එකක් බවත් එය තනිකරම රජයේ මුදල් නාස්ති කිරීමේ යෝජනාවක් බවත් මේ පිළිබඳව අදහස් දැක්වූ ක්ෂේත්රයේ විශේෂඥයෙක් ලංකාසරට පැවසීය.
