2012 වසරේ වැලිකඩ බන්ධනාගාරය තුළ ඇතිවූ ගැටුම්වලින් සිරකරු ඝාතන චෝදනාවලට වරදකරු කෙරුණු හිටපු බන්ධනාගාර කොමසාරිස් එමිල් රංජන් ළමාහේවා ට කොළඹ ත්රිපුද්ගල මහාධිකරණ විනිසුරු මඩුල්ලක් විසින් ලබාදුන් මරණීය දණ්ඩනයෙන් නිදොස් කොට නිදහස් කරන ලෙස ශ්රේෂ්ඨාධිකරණය අද (08) තීන්දු කළේය.
එම දඬුවමට එරෙහිව විත්තිකාර ළමාහේවා විසින් ඉදිරිපත් කළ ඇපෑලක් පිළිගැනීමෙන් අනතුරුව පංච පුද්ගල ශ්රේෂ්ඨාධිකරණ විනිසුරු මඩුල්ලක් විසින් එම තීන්දුව ලබා දුන්නේය.
වර්ෂ 2012 නොවැම්බර් මස 09 සහ 10 දෙදින තුළ වැලිකඩ බන්ධනාගාරයේ සිරකරුවන් ඝාතන නඩුවට අදාළ ප්රධාන විත්තිකරුවන් දෙදෙනාගෙන් කෙනෙක් වූ වැලිකඩ බන්ධනාගාරයේ හිටපු බන්ධනාගාර අධිකාරී එමිල් රන්ජන් ළමාහේවාට අධිකරණය විසින් 2022 ජනවාරි මස 12 වැනිදා මරණීය දණ්ඩනය නියම කර තිබිණි.
එදින ගිහාන් කුලතුංග ගේ සභාපතිත්වයෙන් යුතු ප්රදීප් හෙට්ටිආරච්චි සහ මංජුල තිලකරත්න යන විශේෂ ත්රිපුද්ගල මහාධිකරණ විනිසුරු මඩුල්ල විසින් එමිල් රන්ජන් ළමාහේවා ට මරණීය දණ්ඩන නියෝගය ලබා දුන්නේ එම ඝාතන සිද්ධියටම චෝදනා එල්ලවී සිටි පොලිස් මත්ද්රව්ය නාශක කාර්යාංශයේ හිටපු පොලිස් පරීක්ෂක නියෝමාල් රංගජීව නිදොස් කොට නිදහස් කරමිනි.
වැලිකඩ බන්ධනාගාරයේ සිරකරුවන් ඝාතන 27 දෙනා ඝාතනය සම්බන්ධ සිද්ධියේ සාක්ෂි සම්පිණ්ඩනයෙන් පසු කොළඹ මහාධිකරණයේ ගොනුවූ ඝාතන 08ක් සම්බන්ධව වසර 10ක් තිස්සේ ඇසෙමින් පැවති නඩුවේ තීන්දුව ප්රකාශයට පත් කරමින් හිටපු බන්ධනාගාර කොමසාරිස්වරයාට මෙසේ මරණීය දණ්ඩනය හිමි වී තිබිණි.
ශ්රේෂ්ඨාධිකරණය වෙත ඉදිරිපත් කල ඇපෑලක් මගින් අද ඔහු නිදොස් වී නිදහස් වුනේය
