යාපනය පරාදය. වනිඳුලා අද (17) නුවර අවසන් මහා තරගය ආසන්නයට කැන්දාගෙන පැමිණ තිබේ. ඒ ලකුණු 61ක වික්රමාන්විත ජයග්රහණයක් සමගිනි.
වනිඳු අයි.පී.එල් ඉතිහාසය අලුතින් ලිව්වේය. ඒ ලේසියෙන් බිඳිය නොහැකි වික්රමයක් සමගිනි. ඒ පන්දු 20ක් තුළ ලකුනු 09කට කඩුළු 06ක් බිඳ හෙළමිනි. වනිදු පන්දු ඕවර් 3.2 තුළ මේ කඩුළු හය දවා ගත්තේ ක්රිකට් ලෝලීන් මන්මත් කරවමිනි.
ආර්.ප්රේමදාස ක්රීඩාංගනයේ විදුලි ආලෝකය යට පැවිති තරගයේ කාසියේ වාසිය දිනා ගත්තේ ජැෆ්නා කිංස් කණ්ඩායමය. පිට පිට එල්පීඑල් ශූරතාවය දිනූ කණ්ඩායමේ අත්දැකීම් පිරි නායකයා තිසර පෙරේරාය.
ඒත් තිසරට වැරදුනේය. තිසර බී ලව් කැන්ඩි කණ්ඩායමට පන්දුවට පහර දීමට ආරාධනා කළේය. ආරම්භක පිතිකරු යුවලේ ෆකාර් සමාන් ලකුණු නොලබා දැවී ගිය ද මොහොමඩ් හරිස් පන්දු 49ක දී හතරේ පහර 08ක් සහ හයේ පහර 04ක් සමගින් ලකුණු 79ක් රැස් කළේය.
දෙවැනි කඩුල්ල ලෙස දිනේෂ් චන්දිමාල් දැවී යන විට ඔහු ලකුණු 41ක් රැස් කරගෙන සිටියේය. ඒ පන්දු 24ක් තුළය. චන්දිමාල් හතරේ පහර 06ක් සහ හයේ පහර 1ක් එල්ල කළේය.
පන්දු ඕවර 20 අවසන් වනවිට කඩුළු 08ක් දැවී ලකුණු 188ක් රැස් කරගැනීමට බී ලව් කැන්ඩි කණ්ඩායම සමත් වී සිටියේය. අවසන් පන්දු ඕවරය යැවූ නුවන් තුෂාර කඩුළු 03ක් දවා ගත්තේය. ඒ එක් පහසු උඩපන්දුවක් අසේල ගුණරත්න විසින් අතහැරීමෙන් ද පසුවය.
යාපනය කණ්ඩායම වෙනුවෙන් නුවන් තුෂාර ලකුණු 40ට කඩුළු 04ක් ද මහීෂ් තීක්ෂණ ලකුණු 37ට කඩුළු 02ක් ද, අසේල ගුණරත්න ලකුණු 41ට කඩුළු 02ක් ද බිඳ හෙළුවේය.
පිළිතුරු ඉනිම ක්රීඩා කිරීමට පැමිණි ජැෆ්නා කිංස් කණ්ඩායම වෙනුවෙන් වැඩිම ලකුණ ලාභියා වූයේ ෂොයිබ් මලික් ය. ඔහු පන්දු 23ක් දි ලකුණු 31ක් ලබා ගත්තේය. ඩේවිඩ් මිලර් පන්දු 20ක දී ලකුණු 26ක් ලැබුවේය.
ජැෆ්නා කිංස් කණ්ඩායමේ ක්රීඩකයින් 06 ලකුණු 05 සීමාව ඉක්මවා තිබුණේ නැත. නායක තිසර පෙරේරාත් ලකුණු නොලබා දැවී ගියේය. චරිත් අසලංක එක් ලකුණක් පමණි. දුනිත් වෙල්ලාලගේ ලකුණු 03කි. යාපනය කණ්ඩායම පන්දු ඕවර 20ට පන්දු 04ක් ඉතිරිව තිබිය දී සියල්ලෝ ලකුණු 127කට දැවී ගියහ.
තරගය ඉතිහාසයට එක්කළ පන්දු යැවීමක් වනිඳු හරසංග සිදුකළේය. ඔහු පන්දු ඕවර 3.2ක දී ලකුණු 09කට කඩුළු 06ක් ලැබුවේය. මුජීබ් උර් රහ්මාන්, සහන් ආරච්චිගේ, නුවන් ප්රදීප් කඩුල්ල බැගින් ලැබූහ.
තරගයේ දී දුනිත් වෙල්ලාලගේ දවා ගැනීමට කමිඳු මෙන්ඩිස් රැකගත් උඩපන්දුව මෙන්ම, මහීෂ් තීක්ෂණ දවා ගැනීමට සහන් ආරච්චිගේ රැක ගත් උඩපන්දුව අන්තර්ජාතික තලයේ පන්දු රැකීමක විශිෂ්ඨත්වය පෙන්නුම් කළේය. ඒ කඩුළු දෙකම දවා ගත්තේ වනිඳුය. වනිඳුට මේ වික්රමය කිරීම සඳහා කණ්ඩායමේ අති උත්කර්ෂවත් පන්දු රැකීම හේතු වූයේය.
ඒ අනුව කැන්ඩි කණ්ඩායම සහ ගාල්ල කණ්ඩායම අතර හෙට (19) පැවැත්වෙන දෙවන අවසන් පූර්ව තරගයෙන් ජයගන්නා කණ්ඩායම ලබන 20 දා LPL අවසන් තරගයේදී කුසල් මෙන්ඩිස්ගේ නායකත්වය සහිත දඹුල්ල අවුරා සමග තරග වදිනු ඇත.
