ඉරානයට අයත් යාත්රාවකින් මෙරටට රැගෙන එමින් තිබූ හොරෝයින් කිලොග්රෑම් 200ක් ඉන්දීය මත්ද්රව්ය නාශක කාර්යංශය සහ ඉන්දීය නාවික හමුදාව විසින් අත්අඩංගුවට ගෙන තිබේ.
අත් අඩංගුවට ගත් මත්ද්රව්ය ඇෆ්ගනිස්ථානයේ නිපදවා ඇති බවත් එහි වටිනා කම් දළ වශයෙන් ඉන්දීය රුපියල් කෝටි එක්දහස් දෙසීයකට අධික බවත් ඉන්දීය ආරක්ෂක අංශ පවසයි.
මෙම යාත්රාවේ ගමන් කළ ඉරාණ ජාතිකයින් හය දෙනෙකුද අත් අඩංගුවට ගෙන ඔවුන් දකුණු ඉන්දියාව වෙත රැගෙන විත් තිබේ.
අත් අඩංගුවට ගැනීම සම්බන්ධයෙන් ඉන්දීය මත්ද්රව්ය නාශක කර්යාංශයේ නියෝජ්ය අධ්යක්ෂක ජනරාල් සංජෙයි කුමාර් සිං පැවසුවේ අත්අඩංගුවට ගත් හෙරොයින් පැකට් 200 ක් ජලයෙන් හානි නොවන ආකාරයට ආරක්ෂිත ඇසුරුම් සහිත ස්ථර හතකින් ඇසුරුම් කර තිබූ බවය.
මෙම සෑම පැකට්ටුවක්ම ඇෆ්ගනිස්ථාන සහ පාකිස්තාන මත්ද්රව්ය ජාවාරම්කරුවන්ට අනන්ය වූ සලකුණු තිබූ බවයිද නියෝජ්ය අධ්යක්ෂක ජෙනරාල්වරයා පවසයි. එම පැකට් කිහිපයක ගෝනුස්සකුගේ මුද්රා සලකුණු තිබූ අතර අනෙක් පැකට්වල මකරකුගේ මුද්රාව තිබූ බවද ඔහු වැඩිදුරටත් පැවසීය.
“මෙම තොගය පකිස්තාන වෙරළට ඔබ්බෙන් අල්ලා ගත් යාත්රාවට පටවා ඇත්තේ මුහුද මැදදී සිදුවූ හුවමාරුවකින්. ඉන් අනතුරුව එම යාත්රාව ශ්රී ලංකා යාත්රාවකට මත්ද්රව්ය භාරදීම සඳහා ඉන්දීය මුහුදු සීමාව බලා පිටත්ව තිබෙනවා. මෙම ශ්රී ලංකා යාත්රාව හඳුනාගෙන අත්අඩංගුවට ගැනීමටද අපි උත්සාහ දැරුවා,” නියෝජ්ය අධ්යක්ෂ ජනලාරල් සිං පවසයි .
නියෝජ්ය අධ්යක්ෂ ජනරාල් සිං පෙන්වා දෙන ආකාරයට , පසුගිය වසර කිහිපය තුළ අරාබි මුහුද සහ ඉන්දියන් සාගරය හරහා ඉන්දියාවට සිදුකරන ඇෆ්ගන් හෙරොයින් ප්රවාහනය ශීඝ්රයෙන් ඉහළ ගොස් ඇත. ඇෆ්ගනිස්ථානයේ සිට ඉරානයට සහ ඉන් පකිස්ථානයේ මක්රාන් වෙරළ තීරයේ සිට දකුණු දිග මාර්ග ඔස්සේ ඉන්දියාව ඇතුළු ඉන්දියානු සාගර කලාපයේ විවිධ රටවලට හෙරොයින් ප්රවාහනය කිරීම පසුගිය වසර කිහිපය තුළ ප්රමුඛත්වය ගෙන ඇත.
