යෝජිත විදුලි බිල සංශෝධනයෙන් දුප්පතුන් මත ඇතිකරන පීඩනයේ තරම චම්පික කියයි !

රජය මේ වනවිට ඉදිරිපත් කර ඇති විදුලි බිල සංශෝධනය තුළින් මාසිකව ඒකක 60කට වඩා අඩුවෙන් වැය කරන දිළිඳු ම කොට්ඨාසයට මාසික විදුලි ගාස්තු සියයට 220කට වඩා වැඩියෙන් වැඩි වෙද්දී මාසිකව ඒකක 1000කට වඩා වැඩියෙන් භාවිත කරන මහා පරිමාණ විදුලි පාරිභෝගිකයනගෙ  විදුලි බිල වැඩිවන්නේ සියයට 4කින් පමණ බව හිටපු විදුලි බල අමාත්‍යවරයකු වන පාර්ලිමෙන්තු මන්ත්‍රි පාඨලී චම්පික රණවක  පවසයි.

පසුගිය අගොස්තු මාසයේ සිදුකළ විදුලි සංශෝධන හේතුවෙන් මේ වනවිට විදුලි බල මණ්ඩලයේ විදුලි ජනන , නඩත්තු සහ පඩි නඩි ඇතුළු සමස්ත වියදම ඉක්මවමින් ආදායම් ලැබෙමින් පවතින බවත් එවැනි තත්ත්වයක් පවතිද්දී අසාධාරණ ලෙස තවත් රුපියල් බිලියන 55ක් 60ක් පමණ ආදායම් ඉලක්කයක් වෙනුවෙන් මෙලෙස විදුලි ගාස්තු සංශෝධනයට සූදානම් බව බවත් හෙකෙම පෙන්වා දුන්නේය.

අද පැවති මාධ්‍ය හමුවකදී අදහස් දැක්වූ චම්පික රණවක  මෙසේ කීවේය.

“ ජූලි මාසයේ විදුලි බල මණ්ඩලයේ ආදායම රුපියල්  මිලියන 19285 යි. එය අගොස්තු වදුලි ගාස්තු වැඩි කිරීමත් සමඟ ඔක්තෝම්බර් මාසය වනවිට රුපියල්  මිලියන 34573 දක්වා වැඩි වී තිබෙනවා.  ඒ අනුව ජූලි මාසයේ සමස්ත ආදායම රුපියල්  බිලියන 20 ක් වන අතර, එය ඔක්තෝබර් මාසයේ රුපියල් බිලියන 34 දක්වා වැඩි වී තිබෙනවා.

ජනන වියදම් සහ විදුලිබල මණ්ඩල සේවක වැටුප්, නඩත්තු කටයුතු ජූලි මාසය වන විට රු. බිලියන 41 ක් වන අතර, අගෝස්තු මාසය වනවිට රු. බි. 32 දක්වා අඩු වී තිබෙනවා. ඔක්තෝම්බර් වනවිට වියදම රු. බිලියන . 26 දක්වා අඩු වී තිබෙන අතර, නොවැම්බර් මාසයේ එය රුපියල් බිලියන 29 ක්. ඒ අනුව මෙම ගාස්තු වැඩිවීම විදුලිබල මණ්ඩලයේ ඉන්ධන වියදම්, වැටුප් සහ අනෙකුත් නඩත්තු කටයුතු යන වියදම් ආවරණය කරගැනීමට ප්‍රමාණවත් බව සංඛ්‍යාලේඛන මගින් පැහැදිලි වෙනවා.

උදාහරණයක් හැටියට ඔක්තෝම්බර් මාසයේ මූල්‍ය වියදම රුපියල්  මිලියන 3600 ක්. එය නොවැම්බර් මාසයේ එය රුපියල්  මිලියන 6442 ක්. එබැවින් එය වෙනම කාරණයක් හැටියට ගත්තත් , අගෝස්තු මාසයේ වැඩි කළ විදුලි බිල මගින් කිසියම් දුරකට ලංකා විදුලිබල මණ්ඩලයේ බලශක්ති වියදමත්, නඩත්තු වියදමත් ආවරණය වී ඇති බව පැහැදිලි යි.

මෙම මූල්‍ය වියදම් සහ සෙසු  ක්ෂය වීමේ වියදම් සියල්ල බැලුවත් සියයට 60 කින් විදුලි ගාස්තු ඉහළ නැංවීම කිසිසේත් අනුමත කළ නොහැකියි. ගාස්තු වැඩිකිරීමට පෙර මසක ආදායම රු. බි. 20 ක් වූ අතර එය රු. බි. 35 දක්වා වැඩි කරලා. දැන් ආදායම රු.බි. 55-60 දක්වා එනම් තුන් ගුණයකින් වැඩි කිරීමට යනවා. මේ වැඩි කිරීම යුක්ති සහගතද?

මෙම විදුලි මිල වැඩි කිරීමේ ක්‍රමවේදය සළකා බැලුවහොත්, දැනට ඒකක 30 ක් භාවිත කරන ඉතාම දුප්පත් ගණයේ අය සම්බන්ධයෙන් විදුලි බිල රු. 360 සිට රු. 1300 දක්වා වැඩිවන බව පෙනී යනවා. . එය 261% ක වැඩි වීමක්. මේ මිලියන 1.1 ක් සිටින රටේ දුප්පත්ම ජන කණ්ඩායමයි. ඒකක 60 ක් භාවිත කරන අයගේ විදුලි බිල රු. 780 සිට රු. 2560 දක්වා ඉහළ යන අතර, එහි ප්රතිශතය 228% ක්. ඒ ලක්ෂ 14 ක් වන රටේ දුප්පත් ජනතාවයි.

ඒකක 90 ක් භාවිත කරන අයගේ විදුලිය බිල රු. 1800 සිට රු. 4430 දක්වා වැඩිවද්දී, ඒකක 1000 ක් භාවිතා කරන අයගේ විදුලිය බිල වැඩි වන්නේ රු. 69,000 සිට රු. 71,000 දක්වා 4% කින්.