දුනිත් වෙල්ලාලගේ ක්රීඩා පිටියේ දී මුහුණ දුන් පීඩනය ඔහුගේ පියාගේ මරණයෙන් කෙළවරවීම පිළිබඳ වූ සංවේගාත්මක සිද්ධිය මේ වනවිට ක්රිකට් ලෝකය තුළම මහා වේදනාවක් උපදවා තිබේ. ඇෆ්ගනිස්තානය තුළ මේ සම්බන්ධව ඇති වී තිබෙන සංවාදය අතිශය මානුෂික කම්පනයක් ඇති කර තිබෙන අයුරු දකිමු. ඒ මොහොමඩ නබී විසින් තැබූ කෙටි X සටහනත් සමගිනි.
මේ සිදුවීම දැනගත් වහාම තමන් කම්පනයට පත් වූ ආකාරය මොහොමඩ් නබී පෙන්වයි. දුනිත් වෙල්ලාලගේ සහ පවුලේ අය වෙනුවෙන් හදවතින්ම නැගෙන ශෝකය පළකරමින් නබී මෙසේ කියයි…
ශක්තිමත්ව ඉන්න සහෝදරයා…
නබීගේ සටහනත් සමගම ඇෆ්ගනිස්ථාන ක්රිකට් ලොලීන්ට මෙය අදහාගත නොහැකි ප්රවෘත්තියක් වනු පෙනේ. අයෙක් ප්රකාශ කරන්නේ මෙය බොරු ප්රවෘත්තියක් විය හැකි බවය. දුනිත් වෙල්ලාලගේ සමග වේදනාව බෙදා ගැනීමට ඇෆ්ගනිස්ථාන ක්රිකට් ලොලීන් නබී ගේ X සටහන හා එක් වී සිටින ආකාරය අතිශයින්ම සංවේදීය.
සම්ටි නස්රාට් නැමැති ක්රිකට් ලෝලියෙක් කියන්නේ මේ වේදනාත්මක සිද්ධිය සැලවීමත් සමග තමන්ට තරගය පැදීමේ වේදනාව අමතක වුන බවය. “ඇෆ්ගන් ජාතිකයෙක් විදිහට මාව විශ්වාස කරන්න, අපි තරගය පැරදුනා කියලා මට සම්පූර්ණයෙන්ම අමතක වුණා… තාත්තා නැති නැතිවීම ගැන ආරංචිය මහා වේදනාවක්. ශක්තිමත්ව ඉන්න වෙල්ලාලගේ…”
ෆසාල් ඇෆ්ගන් තවත් ඇෆ්ගන් ක්රිකට් ලෝලියෙකි. ඔහු මෙසේ සටහන් කර ඇත. ” ඒ ආරංචිය මගේ හදවත කැබලිවලට බිඳ දැම්මා… අපි ඔබේ පවුල වෙනුවෙන් යාඥා කරනවා….”
මෙහ්රබන් ඇෆ්ගන් සටහනක් තබමින් අමතන්නේ දුනිත්ගේ මිය ගිය පියා ය. ඔහු මෙසේ කියයි. ” සාමයෙන් සැතපෙන්න සොයුර… ඔබේ පුතා වීරයෙක්.”
ආරංචියෙන් කම්පනය වූ හයිකා ඛාන් දුනිත්ව අමතයි. ” දුනිත්.. එබට සහ පවුලේ අයට මගේ බලවත් ශෝකය… ආදරණීය තරුණයා… ශක්තිමත්ව මේ මොහොතට මුහුණ දෙන්න. ඔබ සමග මුළු ඇෆ්ගන් ජාතියම ඉන්නවා…”
පක්ටින් නම් ඇෆ්ගන් ක්රිකට් ලෝලියා ද පවසන්නේ මේ ආරංචියෙන් බලවත් කම්පනයට පත් වූ බවත් මේ අසීරු මොහොතේ මුළු ඇෆ්ගන් ජාතියම දුනිත් සමග සිටින බවත්ය.
නකීබ් ක්වාඩ්රි තබන සටහනත් බෙහෙවින්ම සංවේදී එකකි. “ඇත්තටම හදවත බිඳුනා… ශක්තිමත්ව ඉන්න පුංචි ශූරයා…” ඔහු සිය කෙටි සටහනෙන් කියයි.
දුනිත්ගේ පියා මිය යන්නේ ඔහු ක්රිකට් ජීවිතය කරගෙන සිටි නිසාය. මේ ක්රීඩා ලෝලීන් ජාති ආගම් සීමා භේදයකින් තොරව මේ සංවේදීව හදවතින් හඬා වැටෙන්නේ ක්රිකට් ඔවුන්ගේ ජීවිත වී ඇති නිසාය. ක්රිකට් ගහන උන්ට අපට කියන්නට ඇත්තේ මෙය උඹලා කරන රස්සාවක් නොව, ජීවිත සමග කරන සංවේදී මානුෂික ගනුදෙනුවක් බවය.
දුනිත්ගේ තාත්තා මතක් කර ගියේ ඒ පාඩම බව විශ්වාස කරමු.
